១០. ទុតិយសេខសុត្តវណ្ណនា

៩០. ទសមេ វិយត្តោតិ ព្យត្តោ ឆេកោ. កិំករណីយេសូតិ ឥតិ កត្តព្ពេសុ. ចេតោសមថន្តិ សមាធិកម្មដ្ឋានំ. អននុលោមិកេនាតិ សាសនស្ស អននុច្ឆវិកេន. អតិកាលេនាតិ អតិបាតោវ. អតិទិវាតិ ទិវា វុច្ចតិ មជ្ឈន្ហិកោ, តំ អតិក្កមិត្វា. អាភិសល្លេខិកាតិ អតិវិយ កិលេសសល្លេខិកា. ចេតោវិវរណសប្បាយាតិ ចិត្តវិវរណសង្ខាតានំ សមថវិបស្សនានំ សប្បាយា. អប្បិច្ឆកថាតិ អប្បិច្ឆា ហោថាតិ កថនកថា. សន្តុដ្ឋិកថាតិ ចតូហិ បច្ចយេហិ សន្តុដ្ឋា ហោថាតិ កថនកថា. បវិវេកកថាតិ តីហិ វិវេកេហិ វិវិត្តា ហោថាតិ កថនកថា. អសំសគ្គកថាតិ បញ្ចវិធេន សំសគ្គេន អសំសដ្ឋា ហោថាតិ កថនកថា. វីរិយារម្ភកថាតិ ទុវិធំ វីរិយំ អារភថាតិ កថនកថា. សីលកថាទីសុ សីលំ អារព្ភ កថា សីលកថា. សមាធិំ អារព្ភ, បញ្ញំ អារព្ភ, បញ្ចវិធំ វិមុត្តិំ អារព្ភ, ឯកូនវីសតិបច្ចវេក្ខណសង្ខាតំ វិមុត្តិញាណទស្សនំ អារព្ភ កថា វិមុត្តិញាណទស្សនកថា. ន និកាមលាភីតិអាទីសុ ន ឥច្ឆិតិច្ឆិតលាភី, ទុក្ខលាភី ន វិបុលលាភីតិ អត្ថោ. សេសំ ឧត្តានត្ថមេវាតិ.

ថេរវគ្គោ ចតុត្ថោ.