៤. ទុតិយធម្មវិហារីសុត្តវណ្ណនា

៧៤. ចតុត្ថេ ឧត្តរិ ចស្ស បញ្ញាយ អត្ថំ នប្បជានាតីតិ តតោ បរិយត្តិតោ ឧត្តរិ តស្ស ធម្មស្ស សហវិបស្សនាយ មគ្គបញ្ញាយ អត្ថំ នប្បជានាតិ, ចត្តារិ សច្ចានិ ន បស្សតិ នប្បដិវិជ្ឈតីតិ អត្ថោ. សេសវារេសុបិ ឯសេវ នយោ. ឯវមេតេសុ ទ្វីសុបិ សុត្តេសុ ពហុស្សុតភិក្ខុ វិបស្សនាកម្មិកោ សោតាបន្នោ សកទាគាមី អនាគាមី ខីណាសវោតិ ឆ ជនា ធម្មវិហារិនោ នាមាតិ វេទិតព្ពា.