១. សង្ឃភេទកសុត្តវណ្ណនា

២៤៣. បញ្ចមស្ស បឋមេ អបិ នុ តំ, អានន្ទ, អធិករណន្តិ វិវាទាធិករណាទីសុ អញ្ញតរំ អធិករណំ ភិក្ខុសង្ឃស្ស ឧប្បជ្ជិ, សត្ថា តស្ស វូបសន្តភាវំ បុច្ឆន្តោ ឯវមាហ. កុតោ តំ, ភន្តេតិ, ភន្តេ, កុតោ កិន្តិ កេន ការណេន តំ អធិករណំ វូបសមិស្សតីតិ វទតិ. កេវលកប្បន្តិ សកលំ សមន្តតោ. សង្ឃភេទាយ ឋិតោតិ សង្ឃេន សទ្ធិំ វាទត្ថាយ កថិតំ បដិកថេន្តោវ ឋិតោ. តត្រាយស្មាតិ តស្មិំ ឯវំ ឋិតេ អាយស្មា អនុរុទ្ធោ. ន ឯកវាចិកម្បិ ភណិតព្ពំ មញ្ញតីតិ ‘‘មា, អាវុសោ, សង្ឃេន សទ្ធិំ ឯវំ អវចា’’តិ ឯកវចនម្បិ វត្តព្ពំ ន មញ្ញតិ. វោយុញ្ជតីតិ អនុយុញ្ជតិ អនុយោគំ អាបជ្ជតិ. អត្ថវសេតិ ការណវសេ. នាសេស្សន្តីតិ ឧបោសថប្បវារណំ ឧបគន្តុំ អទត្វា និក្កឌ្ឍិស្សន្តិ. សេសំ បាឡិវសេនេវ វេទិតព្ពំ.