៧. ខិប្បនិសន្តិសុត្តវណ្ណនា

៩៧. សត្តមេ ខិប្បនិសន្តីតិ ខិប្បនិសាមនោ សីឃំ ជានិតុំ សមត្ថោ. សុតានញ្ច ធម្មានន្តិ សុតប្បគុណានំ តន្តិធម្មានំ. អត្ថូបបរិក្ខីតិ អត្ថំ ឧបបរិក្ខកោ. អត្ថមញ្ញាយ ធម្មមញ្ញាយាតិ អដ្ឋកថញ្ច បាឡិញ្ច ជានិត្វា. ធម្មានុធម្មប្បដិបន្នោ ហោតីតិ នវលោកុត្តរធម្មានំ អនុរូបធម្មភូតំ សសីលកំ បុព្ពភាគប្បដិបទំ បដិបន្នោ ហោតិ. នោ ច កល្យាណវាចោតិ ន សុន្ទរវចនោ. ន កល្យាណវាក្ករណោតិ ន សុន្ទរវចនឃោសោ ហោតិ. បោរិយាតិអាទីហិ សទ្ធិំ នោ-ការោ យោជេតព្ពោយេវ. គុណបរិបុណ្ណាយ អបលិពុទ្ធាយ អទោសាយ អគឡិតបទព្យញ្ជនាយ អត្ថំ វិញ្ញាបេតុំ សមត្ថាយ វាចាយ សមន្នាគតោ ន ហោតីតិ អត្ថោ. ឥមិនា ឧបាយេន សព្ពត្ថ អត្ថោ វេទិតព្ពោ.