៧. សុប្បវាសាសុត្តវណ្ណនា

៥៧. សត្តមេ បជ្ជនិកន្តិ តស្ស និគមស្ស នាមំ. កោលិយានន្តិ កោលរាជកុលានំ. អាយុំ ខោ បន ទត្វាតិ អាយុទានំ ទត្វា. អាយុស្ស ភាគិនី ហោតីតិ អាយុភាគបដិលាភិនី ហោតិ, អាយុំ វា ភជនិកា ហោតិ, អាយុប្បដិលាភិនីតិ អត្ថោ. សេសបទេសុបិ ឯសេវ នយោ.

រសសា ឧបេតន្តិ រសេន ឧបេតំ រសសម្បន្នំ. ឧជ្ជុគតេសូតិ កាយវង្កាទិរហិតត្តា ឧជុកមេវ គតេសុ ខីណាសវេសុ. ចរណូបបន្នេសូតិ បញ្ចទសហិ ចរណធម្មេហិ សមន្នាគតេសុ. មហគ្គតេសូតិ មហត្តំ គតេសុ. ខីណាសវានញ្ញេវេតំ នាមំ. បុញ្ញេន បុញ្ញំ សំសន្ទមានាតិ បុញ្ញេន សទ្ធិំ បុញ្ញំ ឃដយមានា. មហប្ផលា លោកវិទូន វណ្ណិតាតិ ឯវរូបា ទានសង្ខាតា ទក្ខិណា តិវិធលោកំ វិទិតំ កត្វា ឋិតត្តា លោកវិទូនំ ពុទ្ធានំ វណ្ណិតា, ពុទ្ធេហិ បសត្ថាតិ អត្ថោ. យញ្ញមនុស្សរន្តាតិ យញ្ញំ ទានំ អនុស្សរន្តា. វេទជាតាតិ តុដ្ឋិជាតា.