៣. អប្បមេយ្យសុត្តវណ្ណនា

១១៦. តតិយេ សុខេន មេតព្ពោតិ សុប្បមេយ្យោ. ទុក្ខេន មេតព្ពោតិ ទុប្បមេយ្យោ. បមេតុំ ន សក្កោតីតិ អប្បមេយ្យោ. ឧន្នឡោតិ ឧគ្គតនឡោ, តុច្ឆមានំ ឧក្ខិបិត្វា ឋិតោតិ អត្ថោ. ចបលោតិ បត្តមណ្ឌនាទិនា ចាបល្លេន សមន្នាគតោ. មុខរោតិ មុខខរោ. វិកិណ្ណវាចោតិ អសញ្ញតវចនោ. អសមាហិតោតិ ចិត្តេកគ្គតារហិតោ. វិព្ភន្តចិត្តោតិ ភន្តចិត្តោ ភន្តគាវិភន្តមិគសប្បដិភាគោ. បាកតិន្ទ្រិយោតិ វិវដិន្ទ្រិយោ. សេសមេត្ថ ឧត្តានមេវាតិ.