៨. បោត្ថកសុត្តវណ្ណនា

១០០. អដ្ឋមេ នវោតិ ករណំ ឧបាទាយ វុច្ចតិ. បោត្ថកោតិ វាកមយវត្ថំ. មជ្ឈិមោតិ បរិភោគមជ្ឈិមោ. ជិណ្ណោតិ បរិភោគជិណ្ណោ. ឧក្ខលិបរិមជ្ជនន្តិ ឧក្ខលិបរិបុញ្ឆនំ ទុស្សីលោតិ និស្សីលោ. ទុព្ពណ្ណតាយាតិ គុណវណ្ណាភាវេន ទុព្ពណ្ណតាយ. ទិដ្ឋានុគតិំ អាបជ្ជន្តីតិ តេន កតំ អនុករោន្តិ. ន មហប្ផលំ ហោតីតិ វិបាកផលេន មហប្ផលំ ន ហោតិ. ន មហានិសំសន្តិ វិបាកានិសំសេនេវ ន មហានិសំសំ. អប្បគ្ឃតាយាតិ វិបាកគ្ឃេន អប្បគ្ឃតាយ. កាសិកំ វត្ថន្តិ តីហិ កប្បាសអំសូហិ សុត្តំ កន្តិត្វា កតវត្ថំ, តញ្ច ខោ កាសិរដ្ឋេយេវ ឧដ្ឋិតំ. សេសំ ឧត្តានមេវ. សីលំ បនេត្ថ មិស្សកំ កថិតន្តិ.