៣. សរទសុត្តវណ្ណនា

៩៥. តតិយេ វិទ្ធេតិ វលាហកវិគមេន ទូរីភូតេ. ទេវេតិ អាកាសេ. អភិវិហច្ចាតិ អភិវិហនិត្វា. យតោតិ យស្មិំ កាលេ. វិរជន្តិ រាគរជាទិរហិតំ. តេសំយេវ មលានំ វិគតត្តា វីតមលំ. ធម្មចក្ខុន្តិ ចតុសច្ចធម្មបរិគ្គាហកំ សោតាបត្តិមគ្គចក្ខុំ. នត្ថិ តំ សំយោជនន្តិ ទុវិធមេវស្ស សំយោជនំ នត្ថិ, ឥតរម្បិ បន បុន ឥមំ លោកំ អានេតុំ អសមត្ថតាយ នត្ថីតិ វុត្តំ. ឥមស្មិំ សុត្តេ ឈានានាគាមី នាម កថិតោតិ.