១. អច្ចាយិកសុត្តវណ្ណនា

៩៣. បញ្ចមស្ស បឋមេ អច្ចាយិកានីតិ អតិបាតិកានិ. ករណីយានីតិ អវស្សកិច្ចានិ. យញ្ហិ ន អវស្សំ កាតព្ពំ, តំ កិច្ចន្តិ វុច្ចតិ. អវស្សំ កាតព្ពំ ករណីយំ នាម. សីឃំ សីឃន្តិ វេគេន វេគេន. តស្ស ខោ តន្តិ ឯត្ថ តន្តិ និបាតមត្តំ. នត្ថិ សា ឥទ្ធិ វា អានុភាវោ វាតិ សា វា ឥទ្ធិ សោ វា អានុភាវោ នត្ថិ. ឧត្តរស្វេតិ តតិយទិវសេ. ឧតុបរិណាមិនីតិ លទ្ធឧតុបរិណាមានិ ហុត្វា. ជាយន្តិបីតិ តតិយទិវសេ និក្ខន្តសេតង្កុរានិ ហោន្តិ, សត្តាហេ បត្តេ នីលង្កុរានិ ហោន្តិ. គព្ភីនិបិ ហោន្តីតិ ទិយឌ្ឍមាសំ បត្វា គហិតគព្ភានិ ហោន្តិ. បច្ចន្តិបីតិ តយោ មាសេ បត្វា បច្ចន្តិ. ឥទានិ យស្មា ពុទ្ធានំ គហបតិកេន វា សស្សេហិ វា អត្ថោ នត្ថិ, សាសនេ បន តប្បដិរូបកំ បុគ្គលំ វា អត្ថំ វា ទស្សេតុំ តំ តំ ឱបម្មំ អាហរន្តិ. តស្មា យមត្ថំ ទស្សេតុកាមេន ឯតំ អាភតំ, តំ ទស្សេន្តោ ឯវមេវ ខោតិអាទិមាហ. តំ អត្ថតោ ឧត្តានមេវ. សិក្ខា បន ឥធាបិ មិស្សិកា ឯវ កថិតា.