៦. បឋមភវសុត្តវណ្ណនា

៧៧. ឆដ្ឋេ កាមធាតុវេបក្កន្តិ កាមធាតុយា វិបច្ចនកំ. កាមភវោតិ កាមធាតុយំ ឧបបត្តិភវោ. កម្មំ ខេត្តន្តិ កុសលាកុសលកម្មំ វិរុហនដ្ឋានដ្ឋេន ខេត្តំ. វិញ្ញាណំ ពីជន្តិ សហជាតំ អភិសង្ខារវិញ្ញាណំ វិរុហនដ្ឋេន ពីជំ. តណ្ហា ស្នេហោតិ បគ្គណ្ហនានុព្រូហនវសេន តណ្ហា ឧទកំ នាម. អវិជ្ជានីវរណានន្តិ អវិជ្ជាយ អាវរិតានំ. តណ្ហាសំយោជនានន្តិ តណ្ហាពន្ធនេន ពទ្ធានំ. ហីនាយ ធាតុយាតិ កាមធាតុយា. វិញ្ញាណំ បតិដ្ឋិតន្តិ អភិសង្ខារវិញ្ញាណំ បតិដ្ឋិតំ. មជ្ឈិមាយ ធាតុយាតិ រូបធាតុយា. បណីតាយ ធាតុយាតិ អរូបធាតុយា. សេសមេត្ថ ឧត្តានត្ថមេវាតិ.