២. អាជីវកសុត្តវណ្ណនា

៧៣. ទុតិយេ តេន ហិ គហបតីតិ ថេរោ កិរ ចិន្តេសិ – ‘‘អយំ ឥធ អាគច្ឆន្តោ ន អញ្ញាតុកាមោ ហុត្វា អាគមិ, បរិគ្គណ្ហនត្ថំ បន អាគតោ. ឥមិនា បុច្ឆិតបញ្ហំ ឥមិនាវ កថាបេស្សាមី’’តិ. ឥតិ តំយេវ កថំ កថាបេតុកាមោ តេន ហីតិអាទិមាហ. តត្ថ តេន ហីតិ ការណាបទេសោ. យស្មា ត្វំ ឯវំ បុច្ឆសិ, តស្មា តញ្ញេវេត្ថ បដិបុច្ឆាមីតិ. កេសំ នោតិ កតមេសំ នុ. សធម្មុក្កំសនាតិ អត្តនោ លទ្ធិយា ឧក្ខិបិត្វា ឋបនា. បរធម្មាបសាទនាតិ បរេសំ លទ្ធិយា ឃដ្ដនា វម្ភនា អវក្ខិបនា. អាយតនេវ ធម្មទេសនាតិ ការណស្មិំយេវ ធម្មទេសនា. អត្ថោ ច វុត្តោតិ មយា បុច្ឆិតបញ្ហាយ អត្ថោ ច បកាសិតោ. អត្តា ច អនុបនីតោតិ អម្ហេ ឯវរូបាតិ ឯវំ អត្តា ច ន ឧបនីតោ. នុបនីតោតិបិ បាឋោ.