៦. សីលវន្តសុត្តវណ្ណនា

៤៦. ឆដ្ឋេ តីហិ ឋានេហីតិ តីហិ ការណេហិ. កាយេនាតិអាទីសុ ភិក្ខូ អាគច្ឆន្តេ ទិស្វា បច្ចុគ្គមនំ ករោន្តា គច្ឆន្តេ អនុគច្ឆន្តា អាសនសាលាយ សម្មជ្ជនឧបលេបនាទីនិ ករោន្តា អាសនានិ បញ្ញាបេន្តា បានីយំ បច្ចុបដ្ឋាបេន្តា កាយេន បុញ្ញំ បសវន្តិ នាម. ភិក្ខុសង្ឃំ បិណ្ឌាយ ចរន្តំ ទិស្វា ‘‘យាគុំ ទេថ, ភត្តំ ទេថ, សប្បិនវនីតាទីនិ ទេថ, គន្ធបុប្ផាទីហិ បូជេថ, ឧបោសថំ ឧបវសថ, ធម្មំ សុណាថ, ចេតិយំ វន្ទថា’’តិអាទីនិ វទន្តា វាចាយ បុញ្ញំ បសវន្តិ នាម. ភិក្ខូ បិណ្ឌាយ ចរន្តេ ទិស្វា ‘‘លភន្តូ’’តិ ចិន្តេន្តា មនសា បុញ្ញំ បសវន្តិ នាម. បសវន្តីតិ បដិលភន្តិ. បុញ្ញំ បនេត្ថ លោកិយលោកុត្តរមិស្សកំ កថិតំ.