១. សម្មុខីភាវសុត្តវណ្ណនា

៤១. បញ្ចមស្ស បឋមេ សម្មុខីភាវាតិ សម្មុខីភាវេន, វិជ្ជមានតាយាតិ អត្ថោ. បសវតីតិ បដិលភតិ. សទ្ធាយ សម្មុខីភាវាតិ យទិ ហិ សទ្ធា ន ភវេយ្យ, ទេយ្យធម្មោ ន ភវេយ្យ, ទក្ខិណេយ្យសង្ខាតា បដិគ្គាហកបុគ្គលា ន ភវេយ្យុំ, កថំ បុញ្ញកម្មំ ករេយ្យ. តេសំ បន សម្មុខីភាវេន សក្កា កាតុន្តិ តស្មា ‘‘សទ្ធាយ សម្មុខីភាវា’’តិអាទិមាហ. ឯត្ថ ច ទ្វេ ធម្មា សុលភា ទេយ្យធម្មា ចេវ ទក្ខិណេយ្យា ច, សទ្ធា បន ទុល្លភា. បុថុជ្ជនស្ស ហិ សទ្ធា អថាវរា បទវារេន នានា ហោតិ, តេនេវ មហាមោគ្គល្លានសទិសោបិ អគ្គសាវកោ បាដិភោគោ ភវិតុំ អសក្កោន្តោ អាហ – ‘‘ទ្វិន្នំ ខោ តេ អហំ, អាវុសោ, ធម្មានំ បាដិភោគោ ភោគានញ្ច ជីវិតស្ស ច, សទ្ធាយ បន ត្វំយេវ បាដិភោគោ’’តិ (ឧទា. ១៨).