៣. តតិយអធម្មសុត្តវណ្ណនា

១១៥. តតិយេ ឧទ្ទេសំ ឧទ្ទិសិត្វាតិ មាតិកំ និក្ខិបិត្វា. សត្ថុ ចេវ សំវណ្ណិតោតិ បញ្ចសុ ឋានេសុ ឯតទគ្គេ ឋបេន្តេន សត្ថារា សំវណ្ណិតោ. សម្ភាវិតោតិ គុណសម្ភាវនាយ សម្ភាវិតោ. បហោតីតិ សក្កោតិ. អតិសិត្វាតិ អតិក្កមិត្វា. ជានំ ជានាតីតិ ជានិតព្ពកំ ជានាតិ. បស្សំ បស្សតីតិ បស្សិតព្ពកំ បស្សតិ. ចក្ខុភូតោតិ ចក្ខុ វិយ ភូតោ ជាតោ និព្ពត្តោ. ញាណភូតោតិ ញាណសភាវោ. ធម្មភូតោតិ ធម្មសភាវោ. ព្រហ្មភូតោតិ សេដ្ឋសភាវោ. វត្តាតិ វត្តុំ សមត្ថោ. បវត្តាតិ បវត្តេតុំ សមត្ថោ. អត្ថស្ស និន្នេតាតិ អត្ថំ នីហរិត្វា ទស្សេតា. យថា នោ ភគវាតិ យថា អម្ហាកំ ភគវា ព្យាករេយ្យ.