៦. និជ្ជរសុត្តវណ្ណនា

១០៦. ឆដ្ឋេ និជ្ជរវត្ថូនីតិ និជ្ជរការណានិ. មិច្ឆាទិដ្ឋិ និជ្ជិណ្ណា ហោតីតិ អយំ ហេដ្ឋា វិបស្សនាយបិ និជ្ជិណ្ណា ឯវ បហីនា. កស្មា បុន គហិតាតិ? អសមុច្ឆិន្នត្តា. វិបស្សនាយ ហិ កិញ្ចាបិ និជ្ជិណ្ណា, ន បន សមុច្ឆិន្នា. មគ្គោ បន ឧប្បជ្ជិត្វា តំ សមុច្ឆិន្ទតិ, ន បុន វុដ្ឋាតុំ ទេតិ. តស្មា បុន គហិតា. ឯវំ សព្ពបទេសុ យោជេតព្ពោ. ឯត្ថ ច សម្មាវិមុត្តិបច្ចយា ចតុសដ្ឋិ ធម្មា ភាវនាបារិបូរិំ គច្ឆន្តិ. កតមេ ចតុសដ្ឋិ? សោតាបត្តិមគ្គក្ខណេ អធិមោក្ខដ្ឋេន សទ្ធិន្ទ្រិយំ បរិបូរតិ, បគ្គហដ្ឋេន វីរិយិន្ទ្រិយំ, ឧបដ្ឋានដ្ឋេន សតិន្ទ្រិយំ, អវិក្ខេបដ្ឋេន សមាធិន្ទ្រិយំ, ទស្សនដ្ឋេន បញ្ញិន្ទ្រិយំ បរិបូរេតិ, វិជាននដ្ឋេន មនិន្ទ្រិយំ, អភិនន្ទនដ្ឋេន សោមនស្សិន្ទ្រិយំ, បវត្តសន្តតិអាធិបតេយ្យដ្ឋេន ជីវិតិន្ទ្រិយំ បរិបូរតិ…បេ… អរហត្តផលក្ខណេ អធិមោក្ខដ្ឋេន សទ្ធិន្ទ្រិយំ…បេ… បវត្តសន្តតិអាធិបតេយ្យដ្ឋេន ជីវិតិន្ទ្រិយំ បរិបូរតីតិ ឯវំ ចតូសុ ច មគ្គេសុ ចតូសុ ច ផលេសុ អដ្ឋដ្ឋ ហុត្វា ចតុសដ្ឋិ ធម្មា បារិបូរិំ គច្ឆន្តិ.