៥-៧. បឋមសុខសុត្តាទិវណ្ណនា

៦៥-៦៧. បញ្ចមេ វដ្ដមូលកំ សុខទុក្ខំ បុច្ឆិតំ, ឆដ្ឋេ សាសនមូលកំ. សត្តមេ នឡកបានន្តិ អតីតេ ពោធិសត្តស្ស ឱវាទេ ឋត្វា វានរយូថេន នឡេហិ ឧទកស្ស បីតដ្ឋានេ មាបិតត្តា ឯវំលទ្ធនាមោ និគមោ. តុណ្ហីភូតំ តុណ្ហីភូតន្តិ យំ យំ ទិសំ អនុវិលោកេតិ, តត្ថ តត្ថ តុណ្ហីភូតមេវ. អនុវិលោកេត្វាតិ តតោ តតោ វិលោកេត្វា. បិដ្ឋិ មេ អាគិលាយតីតិ កស្មា អាគិលាយតិ? ភគវតោ ហិ ឆ វស្សានិ មហាបធានំ បទហន្តស្ស មហន្តំ កាយទុក្ខំ អហោសិ, អថស្ស អបរភាគេ មហល្លកកាលេ បិដ្ឋិវាតោ ឧប្បជ្ជិ. ឧបាទិន្នកសរីរស្ស ឋាននិសជ្ជាទីហិ អប្បមត្តកេន អាពាធេន ន សក្កា កេនចិ ភវិតុំ. តំ គហេត្វាបិ ថេរស្ស ឱកាសករណត្ថំ ឯវមាហ. សង្ឃាដិំ បញ្ញាបេត្វា ឯកមន្តេ បតិរូបដ្ឋានេ បញ្ញត្តស្ស កប្បិយមញ្ចស្ស ឧបរិ អត្ថរិត្វា.