៣. កាយសុត្តវណ្ណនា

២៣. តតិយេ អាបន្នោ ហោតិ កញ្ចិទេវ ទេសន្តិ កញ្ចិ អាបត្តិកោដ្ឋាសំ អាបន្នោ ហោតិ. អនុវិច្ចាតិ អនុបវិសិត្វា បរិយោគាហេត្វា. កាយទុច្ចរិតន្តិ តិវិធំ កាយទុច្ចរិតំ. វចីទុច្ចរិតន្តិ ចតុព្ពិធំ វចីទុច្ចរិតំ. បាបិកា ឥស្សាតិ លាមិកា ឧសូយា. បញ្ញាយ ទិស្វាតិ សហវិបស្សនាយ មគ្គបញ្ញាយ បស្សិត្វា បស្សិត្វា បហាតព្ពា. ឥជ្ឈតីតិ សមិជ្ឈតិ. ឧបវាសស្សាតិ និស្សាយ ឧបសង្កមិត្វា វសន្តស្ស. អភិភុយ្យាតិ អជ្ឈោត្ថរិត្វា មទ្ទិត្វា. ឥរីយតីតិ វត្តតិ. ឥមស្មិំ សុត្តេ សហវិបស្សនាយ មគ្គោ កថិតោ.