១. កិមត្ថិយសុត្តវណ្ណនា

១. ទសកនិបាតស្ស បឋមេ កុសលានិ សីលានីតិ អនវជ្ជសីលានិ. អមង្កុភាវស្ស អវិប្បដិសារស្ស អត្ថាយ សំវត្តន្តីតិ អវិប្បដិសារត្ថានិ. សោ នេសំ អានិសំសោតិ អវិប្បដិសារានិសំសានិ. យថាភូតញាណទស្សនត្ថោតិអាទីសុ យថាភូតញាណទស្សនំ នាម តរុណវិបស្សនា, និព្ពិទា នាម ពលវវិបស្សនា, វិរាគោ នាម មគ្គោ, វិមុត្តិ នាម អរហត្តផលំ, ញាណទស្សនំ នាម បច្ចវេក្ខណញាណំ. អគ្គាយ បរេន្តីតិ អរហត្តត្ថាយ គច្ឆន្តិ.