១. បច្ចុប្បន្នវារោ

(ក) អនុលោមំ

៤៣៥. (ក) យោ ចក្ខុន្ទ្រិយំ បរិជានាតិ សោ សោតិន្ទ្រិយំ បរិជានាតីតិ? អាមន្តា.

(ខ) យោ វា បន សោតិន្ទ្រិយំ បរិជានាតិ សោ ចក្ខុន្ទ្រិយំ បរិជានាតីតិ? អាមន្តា.

(ក) យោ ចក្ខុន្ទ្រិយំ បរិជានាតិ សោ ទោមនស្សិន្ទ្រិយំ បជហតីតិ? នោ.

(ខ) យោ វា បន ទោមនស្សិន្ទ្រិយំ បជហតិ សោ ចក្ខុន្ទ្រិយំ បរិជានាតីតិ? នោ.

(ក) យោ ចក្ខុន្ទ្រិយំ បរិជានាតិ សោ អនញ្ញាតញ្ញស្សាមីតិន្ទ្រិយំ ភាវេតីតិ? នោ.

(ខ) យោ វា បន អនញ្ញាតញ្ញស្សាមីតិន្ទ្រិយំ ភាវេតិ សោ ចក្ខុន្ទ្រិយំ បរិជានាតីតិ? នោ.

(ក) យោ ចក្ខុន្ទ្រិយំ បរិជានាតិ សោ អញ្ញិន្ទ្រិយំ ភាវេតីតិ? អាមន្តា.

(ខ) យោ វា បន អញ្ញិន្ទ្រិយំ ភាវេតិ សោ ចក្ខុន្ទ្រិយំ បរិជានាតីតិ?

ទ្វេ បុគ្គលា អញ្ញិន្ទ្រិយំ ភាវេន្តិ, នោ ច ចក្ខុន្ទ្រិយំ បរិជានន្តិ. អគ្គមគ្គសមង្គី អញ្ញិន្ទ្រិយញ្ច ភាវេតិ ចក្ខុន្ទ្រិយញ្ច បរិជានាតិ.

(ក) យោ ចក្ខុន្ទ្រិយំ បរិជានាតិ សោ អញ្ញាតាវិន្ទ្រិយំ សច្ឆិករោតីតិ? នោ.

(ខ) យោ វា បន អញ្ញាតាវិន្ទ្រិយំ សច្ឆិករោតិ សោ ចក្ខុន្ទ្រិយំ បរិជានាតីតិ? នោ. (ចក្ខុន្ទ្រិយមូលកំ)

៤៣៦. (ក) យោ ទោមនស្សិន្ទ្រិយំ បជហតិ សោ អនញ្ញាតញ្ញស្សាមីតិន្ទ្រិយំ ភាវេតីតិ? នោ.

(ខ) យោ វា បន អនញ្ញាតញ្ញស្សាមីតិន្ទ្រិយំ ភាវេតិ សោ ទោមនស្សិន្ទ្រិយំ បជហតីតិ? នោ.

(ក) យោ ទោមនស្សិន្ទ្រិយំ បជហតិ សោ អញ្ញិន្ទ្រិយំ ភាវេតីតិ? អាមន្តា.

(ខ) យោ វា បន អញ្ញិន្ទ្រិយំ ភាវេតិ សោ ទោមនស្សិន្ទ្រិយំ បជហតីតិ?

ទ្វេ បុគ្គលា អញ្ញិន្ទ្រិយំ ភាវេន្តិ, នោ ច ទោមនស្សិន្ទ្រិយំ បជហន្តិ. អនាគាមិមគ្គសមង្គី អញ្ញិន្ទ្រិយញ្ច ភាវេតិ ទោមនស្សិន្ទ្រិយញ្ច បជហតិ.

(ក) យោ ទោមនស្សិន្ទ្រិយំ បជហតិ សោ អញ្ញាតាវិន្ទ្រិយំ សច្ឆិករោតីតិ? នោ.

(ខ) យោ វា បន អញ្ញាតាវិន្ទ្រិយំ សច្ឆិករោតិ សោ ទោមនស្សិន្ទ្រិយំ បជហតីតិ? នោ. (ទោមនស្សិន្ទ្រិយមូលកំ)

៤៣៧. (ក) យោ អនញ្ញាតញ្ញស្សាមីតិន្ទ្រិយំ ភាវេតិ សោ អញ្ញិន្ទ្រិយំ ភាវេតីតិ? នោ.

(ខ) យោ វា បន អញ្ញិន្ទ្រិយំ ភាវេតិ សោ អនញ្ញាតញ្ញស្សាមីតិន្ទ្រិយំ ភាវេតីតិ? នោ.

(ក) យោ អនញ្ញាតញ្ញស្សាមីតិន្ទ្រិយំ ភាវេតិ សោ អញ្ញាតាវិន្ទ្រិយំ សច្ឆិករោតីតិ? នោ.

(ខ) យោ វា បន អញ្ញាតាវិន្ទ្រិយំ សច្ឆិករោតិ សោ អនញ្ញាតញ្ញស្សាមីតិន្ទ្រិយំ ភាវេតីតិ? នោ. (អនញ្ញាតញ្ញស្សាមីតិន្ទ្រិយមូលកំ)

៤៣៨. (ក) យោ អញ្ញិន្ទ្រិយំ ភាវេតិ សោ អញ្ញាតាវិន្ទ្រិយំ សច្ឆិករោតីតិ? នោ.

(ខ) យោ វា បន អញ្ញាតាវិន្ទ្រិយំ សច្ឆិករោតិ សោ អញ្ញិន្ទ្រិយំ ភាវេតីតិ? នោ. (អញ្ញិន្ទ្រិយមូលកំ)

(ខ) បច្ចនីកំ

៤៣៩. (ក) យោ ចក្ខុន្ទ្រិយំ ន បរិជានាតិ សោ ទោមនស្សិន្ទ្រិយំ នប្បជហតីតិ?

អនាគាមិមគ្គសមង្គី ចក្ខុន្ទ្រិយំ ន បរិជានាតិ, នោ ច ទោមនស្សិន្ទ្រិយំ នប្បជហតិ. ទ្វេ មគ្គសមង្គិនោ ឋបេត្វា អវសេសា បុគ្គលា ចក្ខុន្ទ្រិយញ្ច ន បរិជានន្តិ ទោមនស្សិន្ទ្រិយញ្ច នប្បជហន្តិ.

(ខ) យោ វា បន ទោមនស្សិន្ទ្រិយំ នប្បជហតិ សោ ចក្ខុន្ទ្រិយំ ន បរិជានាតីតិ?

អគ្គមគ្គសមង្គី ទោមនស្សិន្ទ្រិយំ នប្បជហតិ, នោ ច ចក្ខុន្ទ្រិយំ ន បរិជានាតិ. ទ្វេ មគ្គសមង្គិនោ ឋបេត្វា អវសេសា បុគ្គលា ទោមនស្សិន្ទ្រិយញ្ច នប្បជហន្តិ ចក្ខុន្ទ្រិយញ្ច ន បរិជានន្តិ.

(ក) យោ ចក្ខុន្ទ្រិយំ ន បរិជានាតិ សោ អនញ្ញាតញ្ញស្សាមីតិន្ទ្រិយំ ន ភាវេតីតិ?

អដ្ឋមកោ ចក្ខុន្ទ្រិយំ ន បរិជានាតិ, នោ ច អនញ្ញាតញ្ញស្សាមីតិន្ទ្រិយំ ន ភាវេតិ. ទ្វេ មគ្គសមង្គិនោ ឋបេត្វា អវសេសា បុគ្គលា ចក្ខុន្ទ្រិយញ្ច ន បរិជានន្តិ អនញ្ញាតញ្ញស្សាមីតិន្ទ្រិយញ្ច ន ភាវេន្តិ.

(ខ) យោ វា បន អនញ្ញាតញ្ញស្សាមីតិន្ទ្រិយំ ន ភាវេតិ សោ ចក្ខុន្ទ្រិយំ ន បរិជានាតីតិ?

អគ្គមគ្គសមង្គី អនញ្ញាតញ្ញស្សាមីតិន្ទ្រិយំ ន ភាវេតិ, នោ ច ចក្ខុន្ទ្រិយំ ន បរិជានាតិ. ទ្វេ មគ្គសមង្គិនោ ឋបេត្វា អវសេសា បុគ្គលា អនញ្ញាតញ្ញស្សាមីតិន្ទ្រិយញ្ច ន ភាវេន្តិ ចក្ខុន្ទ្រិយញ្ច ន បរិជានន្តិ.

(ក) យោ ចក្ខុន្ទ្រិយំ ន បរិជានាតិ សោ អញ្ញិន្ទ្រិយំ ន ភាវេតីតិ?

ទ្វេ បុគ្គលា ចក្ខុន្ទ្រិយំ ន បរិជានន្តិ, នោ ច អញ្ញិន្ទ្រិយំ ន ភាវេន្តិ. តយោ មគ្គសមង្គិនោ ឋបេត្វា អវសេសា បុគ្គលា ចក្ខុន្ទ្រិយញ្ច ន បរិជានន្តិ អញ្ញិន្ទ្រិយញ្ច ន ភាវេន្តិ.

(ខ) យោ វា បន អញ្ញិន្ទ្រិយំ ន ភាវេតិ សោ ចក្ខុន្ទ្រិយំ ន បរិជានាតីតិ? អាមន្តា.

(ក) យោ ចក្ខុន្ទ្រិយំ ន បរិជានាតិ សោ អញ្ញាតាវិន្ទ្រិយំ ន សច្ឆិករោតីតិ?

យោ អគ្គផលំ សច្ឆិករោតិ សោ ចក្ខុន្ទ្រិយំ ន បរិជានាតិ, នោ ច អញ្ញាតាវិន្ទ្រិយំ ន សច្ឆិករោតិ. អគ្គមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា ចក្ខុន្ទ្រិយញ្ច ន បរិជានន្តិ អញ្ញាតាវិន្ទ្រិយញ្ច ន សច្ឆិករោន្តិ.

(ខ) យោ វា បន អញ្ញាតាវិន្ទ្រិយំ ន សច្ឆិករោតិ សោ ចក្ខុន្ទ្រិយំ ន បរិជានាតីតិ?

អគ្គមគ្គសមង្គី អញ្ញាតាវិន្ទ្រិយំ ន សច្ឆិករោតិ, នោ ច ចក្ខុន្ទ្រិយំ ន បរិជានាតិ. អគ្គមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា អញ្ញាតាវិន្ទ្រិយញ្ច ន សច្ឆិករោន្តិ ចក្ខុន្ទ្រិយញ្ច ន បរិជានន្តិ. (ចក្ខុន្ទ្រិយមូលកំ)

៤៤០. (ក) យោ ទោមនស្សិន្ទ្រិយំ នប្បជហតិ សោ អនញ្ញាតញ្ញស្សាមីតិន្ទ្រិយំ ន ភាវេតីតិ?

អដ្ឋមកោ ទោមនស្សិន្ទ្រិយំ នប្បជហតិ, នោ ច អនញ្ញាតញ្ញស្សាមីតិន្ទ្រិយំ ន ភាវេតិ. ទ្វេ មគ្គសមង្គិនោ ឋបេត្វា អវសេសា បុគ្គលា ទោមនស្សិន្ទ្រិយញ្ច នប្បជហន្តិ អនញ្ញាតញ្ញស្សាមីតិន្ទ្រិយញ្ច ន ភាវេន្តិ.

(ខ) យោ វា បន អនញ្ញាតញ្ញស្សាមីតិន្ទ្រិយំ ន ភាវេតិ សោ ទោមនស្សិន្ទ្រិយំ នប្បជហតីតិ?

អនាគាមិមគ្គសមង្គី អនញ្ញាតញ្ញស្សាមីតិន្ទ្រិយំ ន ភាវេតិ, នោ ច ទោមនស្សិន្ទ្រិយំ នប្បជហតិ. ទ្វេ មគ្គសមង្គិនោ ឋបេត្វា អវសេសា បុគ្គលា អនញ្ញាតញ្ញស្សាមីតិន្ទ្រិយញ្ច ន ភាវេន្តិ ទោមនស្សិន្ទ្រិយញ្ច នប្បជហន្តិ.

(ក) យោ ទោមនស្សិន្ទ្រិយំ នប្បជហតិ សោ អញ្ញិន្ទ្រិយំ ន ភាវេតីតិ?

ទ្វេ បុគ្គលា ទោមនស្សិន្ទ្រិយំ នប្បជហន្តិ, នោ ច អញ្ញិន្ទ្រិយំ ន ភាវេន្តិ. តយោ មគ្គសមង្គិនោ ឋបេត្វា អវសេសា បុគ្គលា ទោមនស្សិន្ទ្រិយញ្ច នប្បជហន្តិ អញ្ញិន្ទ្រិយញ្ច ន ភាវេន្តិ.

(ខ) យោ វា បន អញ្ញិន្ទ្រិយំ ន ភាវេតិ សោ ទោមនស្សិន្ទ្រិយំ នប្បជហតីតិ? អាមន្តា.

(ក) យោ ទោមនស្សិន្ទ្រិយំ នប្បជហតិ សោ អញ្ញាតាវិន្ទ្រិយំ ន សច្ឆិករោតីតិ?

យោ អគ្គផលំ សច្ឆិករោតិ សោ ទោមនស្សិន្ទ្រិយំ នប្បជហតិ, នោ ច អញ្ញាតាវិន្ទ្រិយំ ន សច្ឆិករោតិ. អនាគាមិមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា ទោមនស្សិន្ទ្រិយញ្ច នប្បជហន្តិ អញ្ញាតាវិន្ទ្រិយញ្ច ន សច្ឆិករោន្តិ.

(ខ) យោ វា បន អញ្ញាតាវិន្ទ្រិយំ ន សច្ឆិករោតិ សោ ទោមនស្សិន្ទ្រិយំ នប្បជហតីតិ?

អនាគាមិមគ្គសមង្គី អញ្ញាតាវិន្ទ្រិយំ ន សច្ឆិករោតិ, នោ ច ទោមនស្សិន្ទ្រិយំ នប្បជហតិ. អនាគាមិមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា អញ្ញាតាវិន្ទ្រិយញ្ច ន សច្ឆិករោន្តិ ទោមនស្សិន្ទ្រិយញ្ច នប្បជហន្តិ. (ទោមនស្សិន្ទ្រិយមូលកំ)

៤៤១. (ក) យោ អនញ្ញាតញ្ញស្សាមីតិន្ទ្រិយំ ន ភាវេតិ សោ អញ្ញិន្ទ្រិយំ ន ភាវេតីតិ?

តយោ មគ្គសមង្គិនោ [តយោ បុគ្គលា (បី.)] អនញ្ញាតញ្ញស្សាមីតិន្ទ្រិយំ ន ភាវេន្តិ, នោ ច អញ្ញិន្ទ្រិយំ ន ភាវេន្តិ. ចត្តារោ មគ្គសមង្គិនោ [អដ្ឋមកញ្ច តយោ មគ្គសមង្គិនោ ច (បី.)] ឋបេត្វា អវសេសា បុគ្គលា អនញ្ញាតញ្ញស្សាមីតិន្ទ្រិយញ្ច ន ភាវេន្តិ អញ្ញិន្ទ្រិយញ្ច ន ភាវេន្តិ.

(ខ) យោ វា បន អញ្ញិន្ទ្រិយំ ន ភាវេតិ សោ អនញ្ញាតញ្ញស្សាមីតិន្ទ្រិយំ ន ភាវេតីតិ?

អដ្ឋមកោ អញ្ញិន្ទ្រិយំ ន ភាវេតិ, នោ ច អនញ្ញាតញ្ញស្សាមីតិន្ទ្រិយំ ន ភាវេតិ. ចត្តារោ មគ្គសមង្គិនោ ឋបេត្វា អវសេសា បុគ្គលា អញ្ញិន្ទ្រិយញ្ច ន ភាវេន្តិ អនញ្ញាតញ្ញស្សាមីតិន្ទ្រិយញ្ច ន ភាវេន្តិ.

(ក) យោ អនញ្ញាតញ្ញស្សាមីតិន្ទ្រិយំ ន ភាវេតិ សោ អញ្ញាតាវិន្ទ្រិយំ ន សច្ឆិករោតីតិ?

យោ អគ្គផលំ សច្ឆិករោតិ សោ អនញ្ញាតញ្ញស្សាមីតិន្ទ្រិយំ ន ភាវេតិ, នោ ច អញ្ញាតាវិន្ទ្រិយំ ន សច្ឆិករោតិ. អដ្ឋមកញ្ច អរហន្តញ្ច ឋបេត្វា អវសេសា បុគ្គលា អនញ្ញាតញ្ញស្សាមីតិន្ទ្រិយញ្ច ន ភាវេន្តិ អញ្ញាតាវិន្ទ្រិយញ្ច ន សច្ឆិករោន្តិ.

(ខ) យោ វា បន អញ្ញាតាវិន្ទ្រិយំ ន សច្ឆិករោតិ សោ អនញ្ញាតញ្ញស្សាមីតិន្ទ្រិយំ ន ភាវេតីតិ?

អដ្ឋមកោ អញ្ញាតាវិន្ទ្រិយំ ន សច្ឆិករោតិ, នោ ច អនញ្ញាតញ្ញស្សាមីតិន្ទ្រិយំ ន ភាវេតិ. អដ្ឋមកញ្ច អរហន្តញ្ច ឋបេត្វា អវសេសា បុគ្គលា អញ្ញាតាវិន្ទ្រិយញ្ច ន សច្ឆិករោន្តិ អនញ្ញាតញ្ញស្សាមីតិន្ទ្រិយញ្ច ន ភាវេន្តិ. (អនញ្ញាតញ្ញស្សាមីតិន្ទ្រិយមូលកំ)

៤៤២. (ក) យោ អញ្ញិន្ទ្រិយំ ន ភាវេតិ សោ អញ្ញាតាវិន្ទ្រិយំ ន សច្ឆិករោតីតិ?

យោ អគ្គផលំ សច្ឆិករោតិ សោ អញ្ញិន្ទ្រិយំ ន ភាវេតិ, នោ ច អញ្ញាតាវិន្ទ្រិយំ ន សច្ឆិករោតិ. តយោ មគ្គសមង្គិនោ ច អរហន្តញ្ច ឋបេត្វា អវសេសា បុគ្គលា អញ្ញិន្ទ្រិយញ្ច ន ភាវេន្តិ អញ្ញាតាវិន្ទ្រិយញ្ច ន សច្ឆិករោន្តិ.

(ខ) យោ វា បន អញ្ញាតាវិន្ទ្រិយំ ន សច្ឆិករោតិ សោ អញ្ញិន្ទ្រិយំ ន ភាវេតីតិ?

តយោ មគ្គសមង្គិនោ អញ្ញាតាវិន្ទ្រិយំ ន សច្ឆិករោន្តិ, នោ ច អញ្ញិន្ទ្រិយំ ន ភាវេន្តិ. តយោ មគ្គសមង្គិនោ ច អរហន្តញ្ច ឋបេត្វា អវសេសា បុគ្គលា អញ្ញាតាវិន្ទ្រិយញ្ច ន សច្ឆិករោន្តិ អញ្ញិន្ទ្រិយញ្ច ន ភាវេន្តិ. (អញ្ញិន្ទ្រិយមូលកំ)