(៤) បច្ចុប្បន្នាតីតវារោ

(ក) អនុលោមបុគ្គលោ

១៩៩. (ក) យស្ស កុសលា ធម្មា ឧប្បជ្ជន្តិ តស្ស អកុសលា ធម្មា និរុជ្ឈិត្ថាតិ? អាមន្តា.

(ខ) យស្ស វា បន អកុសលា ធម្មា និរុជ្ឈិត្ថ តស្ស កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ អកុសលា ធម្មា និរុជ្ឈិត្ថ, នោ ច តេសំ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ អកុសលា ច ធម្មា និរុជ្ឈិត្ថ កុសលា ច ធម្មា ឧប្បជ្ជន្តិ.

(ក) យស្ស កុសលា ធម្មា ឧប្បជ្ជន្តិ តស្ស អព្យាកតា ធម្មា និរុជ្ឈិត្ថាតិ? អាមន្តា.

(ខ) យស្ស វា បន អព្យាកតា ធម្មា និរុជ្ឈិត្ថ តស្ស កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ អព្យាកតា ធម្មា និរុជ្ឈិត្ថ, នោ ច តេសំ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ អព្យាកតា ច ធម្មា និរុជ្ឈិត្ថ កុសលា ច ធម្មា ឧប្បជ្ជន្តិ.

២០០. (ក) យស្ស អកុសលា ធម្មា ឧប្បជ្ជន្តិ តស្ស អព្យាកតា ធម្មា និរុជ្ឈិត្ថាតិ? អាមន្តា.

(ខ) យស្ស វា បន អព្យាកតា ធម្មា និរុជ្ឈិត្ថ តស្ស អកុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ អកុសលវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ អព្យាកតា ធម្មា និរុជ្ឈិត្ថ, នោ ច តេសំ អកុសលា ធម្មា ឧប្បជ្ជន្តិ. អកុសលានំ ឧប្បាទក្ខណេ តេសំ អព្យាកតា ច ធម្មា និរុជ្ឈិត្ថ អកុសលា ច ធម្មា ឧប្បជ្ជន្តិ.

(ខ) អនុលោមឱកាសោ

២០១. យត្ថ កុសលា ធម្មា ឧប្បជ្ជន្តិ តត្ថ អកុសលា ធម្មា និរុជ្ឈិត្ថាតិ?…បេ….

(គ) អនុលោមបុគ្គលោកាសា

២០២. (ក) យស្ស យត្ថ កុសលា ធម្មា ឧប្បជ្ជន្តិ តស្ស តត្ថ អកុសលា ធម្មា និរុជ្ឈិត្ថាតិ? អាមន្តា.

(ខ) យស្ស វា បន យត្ថ អកុសលា ធម្មា និរុជ្ឈិត្ថ តស្ស តត្ថ កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ តេសំ តត្ថ អកុសលា ធម្មា និរុជ្ឈិត្ថ, នោ ច តេសំ តត្ថ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ តត្ថ អកុសលា ច ធម្មា និរុជ្ឈិត្ថ កុសលា ច ធម្មា ឧប្បជ្ជន្តិ.

(ក) យស្ស យត្ថ កុសលា ធម្មា ឧប្បជ្ជន្តិ តស្ស តត្ថ អព្យាកតា ធម្មា និរុជ្ឈិត្ថាតិ? អាមន្តា.

(ខ) យស្ស វា បន យត្ថ អព្យាកតា ធម្មា និរុជ្ឈិត្ថ តស្ស តត្ថ កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ អព្យាកតា ធម្មា និរុជ្ឈិត្ថ, នោ ច តេសំ តត្ថ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ តត្ថ អព្យាកតា ច ធម្មា និរុជ្ឈិត្ថ កុសលា ច ធម្មា ឧប្បជ្ជន្តិ.

២០៣. (ក) យស្ស យត្ថ អកុសលា ធម្មា ឧប្បជ្ជន្តិ តស្ស តត្ថ អព្យាកតា ធម្មា និរុជ្ឈិត្ថាតិ? អាមន្តា.

(ខ) យស្ស វា បន យត្ថ អព្យាកតា ធម្មា និរុជ្ឈិត្ថ តស្ស តត្ថ អកុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ អកុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ អព្យាកតា ធម្មា និរុជ្ឈិត្ថ, នោ ច តេសំ តត្ថ អកុសលា ធម្មា ឧប្បជ្ជន្តិ. អកុសលានំ ឧប្បាទក្ខណេ តេសំ តត្ថ អព្យាកតា ច ធម្មា និរុជ្ឈិត្ថ អកុសលា ច ធម្មា ឧប្បជ្ជន្តិ.

(ឃ) បច្ចនីកបុគ្គលោ

២០៤. (ក) យស្ស កុសលា ធម្មា ន ឧប្បជ្ជន្តិ តស្ស អកុសលា ធម្មា ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន អកុសលា ធម្មា ន និរុជ្ឈិត្ថ តស្ស កុសលា ធម្មា ន ឧប្បជ្ជន្តីតិ? នត្ថិ.

(ក) យស្ស កុសលា ធម្មា ន ឧប្បជ្ជន្តិ តស្ស អព្យាកតា ធម្មា ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន អព្យាកតា ធម្មា ន និរុជ្ឈិត្ថ តស្ស កុសលា ធម្មា ន ឧប្បជ្ជន្តីតិ? នត្ថិ.

២០៥. (ក) យស្ស អកុសលា ធម្មា ន ឧប្បជ្ជន្តិ តស្ស អព្យាកតា ធម្មា ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន អព្យាកតា ធម្មា ន និរុជ្ឈិត្ថ តស្ស អកុសលា ធម្មា ន ឧប្បជ្ជន្តីតិ? នត្ថិ.

(ង) បច្ចនីកឱកាសោ

២០៦. យត្ថ កុសលា ធម្មា ន ឧប្បជ្ជន្តិ តត្ថ អកុសលា ធម្មា ន និរុជ្ឈិត្ថាតិ?…បេ….

(ច) បច្ចនីកបុគ្គលោកាសា

២០៧. (ក) យស្ស យត្ថ កុសលា ធម្មា ន ឧប្បជ្ជន្តិ តស្ស តត្ថ អកុសលា ធម្មា ន និរុជ្ឈិត្ថាតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ តេសំ តត្ថ កុសលា ធម្មា ន ឧប្បជ្ជន្តិ, នោ ច តេសំ តត្ថ អកុសលា ធម្មា ន និរុជ្ឈិត្ថ. សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ កុសលា ច ធម្មា ន ឧប្បជ្ជន្តិ អកុសលា ច ធម្មា ន និរុជ្ឈិត្ថ.

(ខ) យស្ស វា បន យត្ថ អកុសលា ធម្មា ន និរុជ្ឈិត្ថ តស្ស តត្ថ កុសលា ធម្មា ន ឧប្បជ្ជន្តីតិ? អាមន្តា.

(ក) យស្ស យត្ថ កុសលា ធម្មា ន ឧប្បជ្ជន្តិ តស្ស តត្ថ អព្យាកតា ធម្មា ន និរុជ្ឈិត្ថាតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ កុសលា ធម្មា ន ឧប្បជ្ជន្តិ, នោ ច តេសំ តត្ថ អព្យាកតា ធម្មា ន និរុជ្ឈិត្ថ. សុទ្ធាវាសំ ឧបបជ្ជន្តានំ តេសំ តត្ថ កុសលា ច ធម្មា ន ឧប្បជ្ជន្តិ អព្យាកតា ច ធម្មា ន និរុជ្ឈិត្ថ.

(ខ) យស្ស វា បន យត្ថ អព្យាកតា ធម្មា ន និរុជ្ឈិត្ថ តស្ស តត្ថ កុសលា ធម្មា ន ឧប្បជ្ជន្តីតិ? អាមន្តា.

២០៨. (ក) យស្ស យត្ថ អកុសលា ធម្មា ន ឧប្បជ្ជន្តិ តស្ស តត្ថ អព្យាកតា ធម្មា ន និរុជ្ឈិត្ថាតិ?

សព្ពេសំ ចិត្តស្ស ភង្គក្ខណេ អកុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ អកុសលា ធម្មា ន ឧប្បជ្ជន្តិ, នោ ច តេសំ តត្ថ អព្យាកតា ធម្មា ន និរុជ្ឈិត្ថ. សុទ្ធាវាសំ ឧបបជ្ជន្តានំ តេសំ តត្ថ អកុសលា ច ធម្មា ន ឧប្បជ្ជន្តិ អព្យាកតា ច ធម្មា ន និរុជ្ឈិត្ថ.

(ខ) យស្ស វា បន យត្ថ អព្យាកតា ធម្មា ន និរុជ្ឈិត្ថ តស្ស តត្ថ អកុសលា ធម្មា ន ឧប្បជ្ជន្តីតិ? អាមន្តា.