(៨) ឧប្បជ្ជមានុប្បន្នវារោ

៧៦. (ក) យស្ស ចិត្តំ ឧប្បជ្ជមានំ តស្ស ចិត្តំ ឧប្បន្នន្តិ? អាមន្តា.

(ខ) យស្ស វា បន ចិត្តំ ឧប្បន្នំ តស្ស ចិត្តំ ឧប្បជ្ជមានន្តិ?

ចិត្តស្ស ភង្គក្ខណេ តេសំ ចិត្តំ ឧប្បន្នំ, នោ ច តេសំ ចិត្តំ ឧប្បជ្ជមានំ. ចិត្តស្ស ឧប្បាទក្ខណេ តេសំ ចិត្តំ ឧប្បន្នញ្ចេវ ឧប្បជ្ជមានញ្ច.

(ក) យស្ស ចិត្តំ ន ឧប្បជ្ជមានំ តស្ស ចិត្តំ ន ឧប្បន្នន្តិ?

ចិត្តស្ស ភង្គក្ខណេ តេសំ ចិត្តំ ន ឧប្បជ្ជមានំ, នោ ច តេសំ ចិត្តំ ន ឧប្បន្នំ. និរោធសមាបន្នានំ អសញ្ញសត្តានំ តេសំ ចិត្តំ ន ចេវ ឧប្បជ្ជមានំ ន ច ឧប្បន្នំ.

(ខ) យស្ស វា បន ចិត្តំ ន ឧប្បន្នំ តស្ស ចិត្តំ ន ឧប្បជ្ជមានន្តិ? អាមន្តា.