(១៣) និរុទ្ធនិរុជ្ឈមានវារោ

៨២. (ក) និរុទ្ធំ និរុជ្ឈមានន្តិ? នោ.

(ខ) និរុជ្ឈមានំ និរុទ្ធន្តិ? នោ.

(ក) ន និរុទ្ធំ ន និរុជ្ឈមានន្តិ?

ភង្គក្ខណេ ន និរុទ្ធំ, នោ ច ន និរុជ្ឈមានំ. ឧប្បាទក្ខណេ អនាគតញ្ច ចិត្តំ ន ចេវ និរុទ្ធំ ន ច និរុជ្ឈមានំ.

(ខ) ន និរុជ្ឈមានំ ន និរុទ្ធន្តិ?

អតីតំ ចិត្តំ ន និរុជ្ឈមានំ, នោ ច ន និរុទ្ធំ. ឧប្បាទក្ខណេ អនាគតញ្ច ចិត្តំ ន ចេវ និរុជ្ឈមានំ ន ច និរុទ្ធំ.

(១៤) អតិក្កន្តកាលវារោ

៨៣. (ក) យស្ស ចិត្តំ ឧប្បជ្ជមានំ ខណំ ខណំ វីតិក្កន្តំ អតិក្កន្តកាលំ, និរុជ្ឈមានំ ខណំ ខណំ វីតិក្កន្តំ អតិក្កន្តកាលំ តស្ស ចិត្តន្តិ?

ភង្គក្ខណេ ចិត្តំ ឧប្បាទក្ខណំ វីតក្កន្តំ ភង្គក្ខណំ អវីតិក្កន្តំ, អតីតំ ចិត្តំ ឧប្បាទក្ខណញ្ច វីតិក្កន្តំ ភង្គក្ខណញ្ច វីតិក្កន្តំ.

(ខ) យស្ស វា បន ចិត្តំ និរុជ្ឈមានំ ខណំ ខណំ វីតិក្កន្តំ អតិក្កន្តកាលំ, ឧប្បជ្ជមានំ ខណំ ខណំ វីតិក្កន្តំ អតិក្កន្តកាលំ តស្ស ចិត្តន្តិ?

អតីតំ ចិត្តំ.

(ក) យស្ស ចិត្តំ ន ឧប្បជ្ជមានំ ខណំ ខណំ វីតិក្កន្តំ អតិក្កន្តកាលំ, ន និរុជ្ឈមានំ ខណំ ខណំ វីតិក្កន្តំ អតិក្កន្តកាលំ តស្ស ចិត្តន្តិ?

ឧប្បាទក្ខណេ អនាគតំ ចិត្តំ.

(ខ) យស្ស វា បន ចិត្តំ ន និរុជ្ឈមានំ ខណំ ខណំ វីតិក្កន្តំ អតិក្កន្តកាលំ, ន ឧប្បជ្ជមានំ ខណំ ខណំ វីតិក្កន្តំ អតិក្កន្តកាលំ តស្ស ចិត្តន្តិ?

ភង្គក្ខណេ ចិត្តំ ភង្គក្ខណំ អវីតិក្កន្តំ នោ ច ឧប្បាទក្ខណំ អវីតិក្កន្តំ, ឧប្បាទក្ខណេ អនាគតញ្ច ចិត្តំ ភង្គក្ខណញ្ច អវីតិក្កន្តំ ឧប្បាទក្ខណញ្ច អវីតិក្កន្តំ.