(១០) ឧប្បន្នុប្បាទវារោ

៩៩. (ក) យំ ចិត្តំ ឧប្បន្នំ តំ ចិត្តំ ឧប្បជ្ជិត្ថាតិ? នោ.

(ខ) យំ វា បន ចិត្តំ ឧប្បជ្ជិត្ថ តំ ចិត្តំ ឧប្បន្នន្តិ? នោ.

(ក) យំ ចិត្តំ ន ឧប្បន្នំ តំ ចិត្តំ ន ឧប្បជ្ជិត្ថាតិ?

អតីតំ ចិត្តំ ន ឧប្បន្នំ, នោ ច តំ ចិត្តំ ន ឧប្បជ្ជិត្ថ. អនាគតំ ចិត្តំ ន ចេវ ឧប្បន្នំ ន ច ឧប្បជ្ជិត្ថ.

(ខ) យំ វា បន ចិត្តំ ន ឧប្បជ្ជិត្ថ តំ ចិត្តំ ន ឧប្បន្នន្តិ?

បច្ចុប្បន្នំ ចិត្តំ ន ឧប្បជ្ជិត្ថ, នោ ច តំ ចិត្តំ ន ឧប្បន្នំ. អនាគតំ ចិត្តំ ន ចេវ ឧប្បជ្ជិត្ថ ន ច ឧប្បន្នំ.

១០០. (ក) យំ ចិត្តំ ឧប្បន្នំ តំ ចិត្តំ ឧប្បជ្ជិស្សតីតិ? នោ.

(ខ) យំ វា បន ចិត្តំ ឧប្បជ្ជិស្សតិ តំ ចិត្តំ ឧប្បន្នន្តិ? នោ.

(ក) យំ ចិត្តំ ន ឧប្បន្នំ តំ ចិត្តំ ន ឧប្បជ្ជិស្សតីតិ?

អនាគតំ ចិត្តំ ន ឧប្បន្នំ, នោ ច តំ ចិត្តំ ន ឧប្បជ្ជិស្សតិ. អតីតំ ចិត្តំ ន ចេវ ឧប្បន្នំ ន ច ឧប្បជ្ជិស្សតិ.

(ខ) យំ វា បន ចិត្តំ ន ឧប្បជ្ជិស្សតិ តំ ចិត្តំ ន ឧប្បន្នន្តិ?

បច្ចុប្បន្នំ ចិត្តំ ន ឧប្បជ្ជិស្សតិ, នោ ច តំ ចិត្តំ ន ឧប្បន្នំ. អតីតំ ចិត្តំ ន ចេវ ឧប្បជ្ជិស្សតិ ន ច ឧប្បន្នំ.