(១) បច្ចុប្បន្នវារោ

(ក) អនុលោមបុគ្គលោ

១៩. (ក) យស្ស កាយសង្ខារោ ឧប្បជ្ជតិ តស្ស វចីសង្ខារោ ឧប្បជ្ជតីតិ?

វិនា វិតក្កវិចារេហិ អស្សាសបស្សាសានំ ឧប្បាទក្ខណេ តេសំ កាយសង្ខារោ ឧប្បជ្ជតិ, នោ ច តេសំ វចីសង្ខារោ ឧប្បជ្ជតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំ កាយសង្ខារោ ច ឧប្បជ្ជតិ វចីសង្ខារោ ច ឧប្បជ្ជតិ.

(ខ) យស្ស វា បន វចីសង្ខារោ ឧប្បជ្ជតិ តស្ស កាយសង្ខារោ ឧប្បជ្ជតីតិ?

វិនា អស្សាសបស្សាសេហិ វិតក្កវិចារានំ ឧប្បាទក្ខណេ តេសំ វចីសង្ខារោ ឧប្បជ្ជតិ, នោ ច តេសំ កាយសង្ខារោ ឧប្បជ្ជតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំ វចីសង្ខារោ ច ឧប្បជ្ជតិ កាយសង្ខារោ ច ឧប្បជ្ជតិ.

(ក) យស្ស កាយសង្ខារោ ឧប្បជ្ជតិ តស្ស ចិត្តសង្ខារោ ឧប្បជ្ជតីតិ? អាមន្តា.

(ខ) យស្ស វា បន ចិត្តសង្ខារោ ឧប្បជ្ជតិ តស្ស កាយសង្ខារោ ឧប្បជ្ជតីតិ?

វិនា អស្សាសបស្សាសេហិ ចិត្តស្ស ឧប្បាទក្ខណេ តេសំ ចិត្តសង្ខារោ ឧប្បជ្ជតិ, នោ ច តេសំ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ ចិត្តសង្ខារោ ច ឧប្បជ្ជតិ កាយសង្ខារោ ច ឧប្បជ្ជតិ.

២០. (ក) យស្ស វចីសង្ខារោ ឧប្បជ្ជតិ តស្ស ចិត្តសង្ខារោ ឧប្បជ្ជតីតិ? អាមន្តា.

(ខ) យស្ស វា បន ចិត្តសង្ខារោ ឧប្បជ្ជតិ តស្ស វចីសង្ខារោ ឧប្បជ្ជតីតិ?

វិនា វិតក្កវិចារេហិ ចិត្តស្ស ឧប្បាទក្ខណេ តេសំ ចិត្តសង្ខារោ ឧប្បជ្ជតិ, នោ ច តេសំ វចីសង្ខារោ ឧប្បជ្ជតិ. វិតក្កវិចារានំ ឧប្បាទក្ខណេ តេសំ ចិត្តសង្ខារោ ច ឧប្បជ្ជតិ វចីសង្ខារោ ច ឧប្បជ្ជតិ.

(ខ) អនុលោមឱកាសោ

២១. (ក) យត្ថ កាយសង្ខារោ ឧប្បជ្ជតិ តត្ថ វចីសង្ខារោ ឧប្បជ្ជតីតិ?

ទុតិយជ្ឈានេ តតិយជ្ឈានេ តត្ថ កាយសង្ខារោ ឧប្បជ្ជតិ, នោ ច តត្ថ វចីសង្ខារោ ឧប្បជ្ជតិ. បឋមជ្ឈានេ កាមាវចរេ តត្ថ កាយសង្ខារោ ច ឧប្បជ្ជតិ វចីសង្ខារោ ច ឧប្បជ្ជតិ.

(ខ) យត្ថ វា បន វចីសង្ខារោ ឧប្បជ្ជតិ តត្ថ កាយសង្ខារោ ឧប្បជ្ជតីតិ?

រូបាវចរេ អរូបាវចរេ តត្ថ វចីសង្ខារោ ឧប្បជ្ជតិ, នោ ច តត្ថ កាយសង្ខារោ ឧប្បជ្ជតិ. បឋមជ្ឈានេ កាមាវចរេ តត្ថ វចីសង្ខារោ ច ឧប្បជ្ជតិ កាយសង្ខារោ ច ឧប្បជ្ជតិ.

(ក) យត្ថ កាយសង្ខារោ ឧប្បជ្ជតិ តត្ថ ចិត្តសង្ខារោ ឧប្បជ្ជតីតិ? អាមន្តា.

(ខ) យត្ថ វា បន ចិត្តសង្ខារោ ឧប្បជ្ជតិ តត្ថ កាយសង្ខារោ ឧប្បជ្ជតីតិ?

ចតុត្ថជ្ឈានេ រូបាវចរេ អរូបាវចរេ តត្ថ ចិត្តសង្ខារោ ឧប្បជ្ជតិ, នោ ច តត្ថ កាយសង្ខារោ ឧប្បជ្ជតិ. បឋមជ្ឈានេ ទុតិយជ្ឈានេ តតិយជ្ឈានេ កាមាវចរេ តត្ថ ចិត្តសង្ខារោ ច ឧប្បជ្ជតិ កាយសង្ខារោ ច ឧប្បជ្ជតិ.

២២. (ក) យត្ថ វចីសង្ខារោ ឧប្បជ្ជតិ តត្ថ ចិត្តសង្ខារោ ឧប្បជ្ជតីតិ? អាមន្តា.

(ខ) យត្ថ វា បន ចិត្តសង្ខារោ ឧប្បជ្ជតិ តត្ថ វចីសង្ខារោ ឧប្បជ្ជតីតិ?

ទុតិយជ្ឈានេ តតិយជ្ឈានេ ចតុត្ថជ្ឈានេ តត្ថ ចិត្តសង្ខារោ ឧប្បជ្ជតិ, នោ ច តត្ថ វចីសង្ខារោ ឧប្បជ្ជតិ. បឋមជ្ឈានេ កាមាវចរេ រូបាវចរេ អរូបាវចរេ តត្ថ ចិត្តសង្ខារោ ច ឧប្បជ្ជតិ វចីសង្ខារោ ច ឧប្បជ្ជតិ.

(គ) អនុលោមបុគ្គលោកាសា

២៣. យស្ស យត្ថ កាយសង្ខារោ ឧប្បជ្ជតិ…បេ….

(យស្សកម្បិ យស្សយត្ថកម្បិ សទិសំ.)

(ឃ) បច្ចនីកបុគ្គលោ

២៤. (ក) យស្ស កាយសង្ខារោ នុប្បជ្ជតិ តស្ស វចីសង្ខារោ នុប្បជ្ជតីតិ?

វិនា អស្សាសបស្សាសេហិ វិតក្កវិចារានំ ឧប្បាទក្ខណេ តេសំ កាយសង្ខារោ នុប្បជ្ជតិ, នោ ច តេសំ វចីសង្ខារោ នុប្បជ្ជតិ. សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ អវិតក្កអវិចារចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ ច នុប្បជ្ជតិ វចីសង្ខារោ ច នុប្បជ្ជតិ.

(ខ) យស្ស វា បន វចីសង្ខារោ នុប្បជ្ជតិ តស្ស កាយសង្ខារោ នុប្បជ្ជតីតិ?

វិនា វិតក្កវិចារេហិ អស្សាសបស្សាសានំ ឧប្បាទក្ខណេ តេសំ វចីសង្ខារោ នុប្បជ្ជតិ, នោ ច តេសំ កាយសង្ខារោ នុប្បជ្ជតិ. សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ អវិតក្កអវិចារចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ច នុប្បជ្ជតិ កាយសង្ខារោ ច នុប្បជ្ជតិ.

(ក) យស្ស កាយសង្ខារោ នុប្បជ្ជតិ តស្ស ចិត្តសង្ខារោ នុប្បជ្ជតីតិ?

វិនា អស្សាសបស្សាសេហិ ចិត្តស្ស ឧប្បាទក្ខណេ តេសំ កាយសង្ខារោ នុប្បជ្ជតិ, នោ ច តេសំ ចិត្តសង្ខារោ នុប្បជ្ជតិ. សព្ពេសំ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ ច នុប្បជ្ជតិ ចិត្តសង្ខារោ ច នុប្បជ្ជតិ.

(ខ) យស្ស វា បន ចិត្តសង្ខារោ នុប្បជ្ជតិ តស្ស កាយសង្ខារោ នុប្បជ្ជតីតិ? អាមន្តា.

២៥. (ក) យស្ស វចីសង្ខារោ នុប្បជ្ជតិ តស្ស ចិត្តសង្ខារោ នុប្បជ្ជតីតិ?

វិនា វិតក្កវិចារេហិ ចិត្តស្ស ឧប្បាទក្ខណេ តេសំ វចីសង្ខារោ នុប្បជ្ជតិ, នោ ច តេសំ ចិត្តសង្ខារោ នុប្បជ្ជតិ. សព្ពេសំ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ច នុប្បជ្ជតិ ចិត្តសង្ខារោ ច នុប្បជ្ជតិ.

(ខ) យស្ស វា បន ចិត្តសង្ខារោ នុប្បជ្ជតិ តស្ស វចីសង្ខារោ នុប្បជ្ជតីតិ? អាមន្តា.

(ង) បច្ចនីកឱកាសោ

២៦. (ក) យត្ថ កាយសង្ខារោ នុប្បជ្ជតិ តត្ថ វចីសង្ខារោ នុប្បជ្ជតីតិ?

រូបាវចរេ អរូបាវចរេ តត្ថ កាយសង្ខារោ នុប្បជ្ជតិ, នោ ច តត្ថ វចីសង្ខារោ នុប្បជ្ជតិ. ចតុត្ថជ្ឈានេ អសញ្ញសត្តេ តត្ថ កាយសង្ខារោ ច នុប្បជ្ជតិ វចីសង្ខារោ ច នុប្បជ្ជតិ.

(ខ) យត្ថ វា បន វចីសង្ខារោ នុប្បជ្ជតិ តត្ថ កាយសង្ខារោ នុប្បជ្ជតីតិ?

ទុតិយជ្ឈានេ តតិយជ្ឈានេ តត្ថ វចីសង្ខារោ នុប្បជ្ជតិ, នោ ច តត្ថ កាយសង្ខារោ នុប្បជ្ជតិ. ចតុត្ថជ្ឈានេ អសញ្ញសត្តេ តត្ថ វចីសង្ខារោ ច នុប្បជ្ជតិ កាយសង្ខារោ ច នុប្បជ្ជតិ.

(ក) យត្ថ កាយសង្ខារោ នុប្បជ្ជតិ តត្ថ ចិត្តសង្ខារោ នុប្បជ្ជតីតិ?

ចតុត្ថជ្ឈានេ រូបាវចរេ អរូបាវចរេ តត្ថ កាយសង្ខារោ នុប្បជ្ជតិ, នោ ច តត្ថ ចិត្តសង្ខារោ នុប្បជ្ជតិ. អសញ្ញសត្តេ តត្ថ កាយសង្ខារោ ច នុប្បជ្ជតិ ចិត្តសង្ខារោ ច នុប្បជ្ជតិ.

(ខ) យត្ថ វា បន…បេ…? អាមន្តា.

២៧. (ក) យត្ថ វចីសង្ខារោ នុប្បជ្ជតិ តត្ថ ចិត្តសង្ខារោ នុប្បជ្ជតីតិ?

ទុតិយជ្ឈានេ តតិយជ្ឈានេ ចតុត្ថជ្ឈានេ តត្ថ វចីសង្ខារោ នុប្បជ្ជតិ, នោ ច តត្ថ ចិត្តសង្ខារោ នុប្បជ្ជតិ. អសញ្ញសត្តេ តត្ថ វចីសង្ខារោ ច នុប្បជ្ជតិ ចិត្តសង្ខារោ ច នុប្បជ្ជតិ.

(ខ) យត្ថ វា បន…បេ…? អាមន្តា.

(ច) បច្ចនីកបុគ្គលោកាសា

២៨. (ក) យស្ស យត្ថ កាយសង្ខារោ នុប្បជ្ជតិ តស្ស តត្ថ វចីសង្ខារោ នុប្បជ្ជតីតិ?

វិនា អស្សាសបស្សាសេហិ វិតក្កវិចារានំ ឧប្បាទក្ខណេ តេសំ តត្ថ កាយសង្ខារោ នុប្បជ្ជតិ, នោ ច តេសំ តត្ថ វចីសង្ខារោ នុប្បជ្ជតិ. សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ អវិតក្កអវិចារចិត្តស្ស ឧប្បាទក្ខណេ អសញ្ញសត្តានំ តេសំ តត្ថ កាយសង្ខារោ ច នុប្បជ្ជតិ វចីសង្ខារោ ច នុប្បជ្ជតិ.

(ខ) យស្ស វា បន យត្ថ…បេ…? អាមន្តា.

(យស្សកម្បិ យស្សយត្ថកម្បិ សទិសំ វិត្ថារេតព្ពំ, យស្សយត្ថកេ និរោធសមាបន្នានន្តិ ន លព្ភតិ.)