១. បទសោធនវារោ

(ក) អនុលោមំ

៨. (ក) កាយោ កាយសង្ខារោតិ? នោ.

(ខ) កាយសង្ខារោ កាយោតិ? នោ.

(ក) វចី វចីសង្ខារោតិ? នោ.

(ខ) វចីសង្ខារោ វចីតិ? នោ.

(ក) ចិត្តំ ចិត្តសង្ខារោតិ? នោ.

(ខ) ចិត្តសង្ខារោ ចិត្តន្តិ? នោ.

(ខ) បច្ចនីកំ

៩. (ក) ន កាយោ ន កាយសង្ខារោតិ?

កាយសង្ខារោ ន កាយោ, កាយសង្ខារោ. កាយញ្ច កាយសង្ខារញ្ច ឋបេត្វា អវសេសា ន ចេវ កាយោ ន ច កាយសង្ខារោ.

(ខ) ន កាយសង្ខារោ ន កាយោតិ?

កាយោ ន កាយសង្ខារោ, កាយោ. កាយញ្ច កាយសង្ខារញ្ច ឋបេត្វា អវសេសា ន ចេវ កាយោ ន ច កាយសង្ខារោ.

(ក) ន វចី ន វចីសង្ខារោតិ?

វចីសង្ខារោ ន វចី, វចីសង្ខារោ. វចិញ្ច វចីសង្ខារញ្ច ឋបេត្វា អវសេសា ន ចេវ វចី ន ច វចីសង្ខារោ.

(ខ) ន វចីសង្ខារោ ន វចីតិ?

វចី ន វចីសង្ខារោ, វចី. វចិញ្ច វចីសង្ខារញ្ច ឋបេត្វា អវសេសា ន ចេវ វចី ន ច វចីសង្ខារោ.

(ក) ន ចិត្តំ ន ចិត្តសង្ខារោតិ?

ចិត្តសង្ខារោ ន ចិត្តំ, ចិត្តសង្ខារោ. ចិត្តញ្ច ចិត្តសង្ខារញ្ច ឋបេត្វា អវសេសា ន ចេវ ចិត្តំ ន ច ចិត្តសង្ខារោ.

(ខ) ន ចិត្តសង្ខារោ ន ចិត្តន្តិ?

ចិត្តំ ន ចិត្តសង្ខារោ, ចិត្តំ. ចិត្តញ្ច ចិត្តសង្ខារញ្ច ឋបេត្វា អវសេសា ន ចេវ ចិត្តំ ន ច ចិត្តសង្ខារោ.