(៣) អនាគតវារោ

(ក) អនុលោមបុគ្គលោ

១៣៧. (ក) យស្ស កាយសង្ខារោ ឧប្បជ្ជិស្សតិ តស្ស វចីសង្ខារោ និរុជ្ឈិស្សតីតិ? អាមន្តា.

(ខ) យស្ស វា បន វចីសង្ខារោ និរុជ្ឈិស្សតិ តស្ស កាយសង្ខារោ ឧប្បជ្ជិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ រូបាវចរេ អរូបាវចរេ បច្ឆិមភវិកានំ យេ ច រូបាវចរំ អរូបាវចរំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ វចីសង្ខារោ និរុជ្ឈិស្សតិ, នោ ច តេសំ កាយសង្ខារោ ឧប្បជ្ជិស្សតិ. ឥតរេសំ តេសំ វចីសង្ខារោ ច និរុជ្ឈិស្សតិ កាយសង្ខារោ ច ឧប្បជ្ជិស្សតិ.

(ក) យស្ស កាយសង្ខារោ ឧប្បជ្ជិស្សតិ តស្ស ចិត្តសង្ខារោ និរុជ្ឈិស្សតីតិ? អាមន្តា.

(ខ) យស្ស វា បន ចិត្តសង្ខារោ និរុជ្ឈិស្សតិ តស្ស កាយសង្ខារោ ឧប្បជ្ជិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ រូបាវចរេ អរូបាវចរេ បច្ឆិមភវិកានំ យេ ច រូបាវចរំ អរូបាវចរំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ ចិត្តសង្ខារោ និរុជ្ឈិស្សតិ, នោ ច តេសំ កាយសង្ខារោ ឧប្បជ្ជិស្សតិ. ឥតរេសំ តេសំ ចិត្តសង្ខារោ ច និរុជ្ឈិស្សតិ កាយសង្ខារោ ច ឧប្បជ្ជិស្សតិ.

១៣៨. (ក) យស្ស វចីសង្ខារោ ឧប្បជ្ជិស្សតិ តស្ស ចិត្តសង្ខារោ និរុជ្ឈិស្សតីតិ? អាមន្តា.

(ខ) យស្ស វា បន ចិត្តសង្ខារោ និរុជ្ឈិស្សតិ តស្ស វចីសង្ខារោ ឧប្បជ្ជិស្សតីតិ?

បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ តេសំ ចិត្តសង្ខារោ និរុជ្ឈិស្សតិ, នោ ច តេសំ វចីសង្ខារោ ឧប្បជ្ជិស្សតិ. ឥតរេសំ តេសំ ចិត្តសង្ខារោ ច និរុជ្ឈិស្សតិ វចីសង្ខារោ ច ឧប្បជ្ជិស្សតិ.

(ខ) អនុលោមឱកាសោ

១៣៩. យត្ថ កាយសង្ខារោ ឧប្បជ្ជិស្សតិ…បេ….

(គ) អនុលោមបុគ្គលោកាសា

១៤០. (ក) យស្ស យត្ថ កាយសង្ខារោ ឧប្បជ្ជិស្សតិ តស្ស តត្ថ វចីសង្ខារោ និរុជ្ឈិស្សតីតិ?

ទុតិយជ្ឈានំ តតិយជ្ឈានំ សមាបន្នានំ តេសំ តត្ថ កាយសង្ខារោ ឧប្បជ្ជិស្សតិ, នោ ច តេសំ តត្ថ វចីសង្ខារោ និរុជ្ឈិស្សតិ. បឋមជ្ឈានំ សមាបន្នានំ កាមាវចរានំ តេសំ តត្ថ កាយសង្ខារោ ច ឧប្បជ្ជិស្សតិ វចីសង្ខារោ ច និរុជ្ឈិស្សតិ.

(ខ) យស្ស វា បន យត្ថ វចីសង្ខារោ និរុជ្ឈិស្សតិ តស្ស តត្ថ កាយសង្ខារោ ឧប្បជ្ជិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ រូបាវចរានំ អរូបាវចរានំ តេសំ តត្ថ វចីសង្ខារោ និរុជ្ឈិស្សតិ, នោ ច តេសំ តត្ថ កាយសង្ខារោ ឧប្បជ្ជិស្សតិ. បឋមជ្ឈានំ សមាបន្នានំ ឥតរេសំ កាមាវចរានំ តេសំ តត្ថ វចីសង្ខារោ ច និរុជ្ឈិស្សតិ កាយសង្ខារោ ច ឧប្បជ្ជិស្សតិ.

(ក) យស្ស យត្ថ កាយសង្ខារោ ឧប្បជ្ជិស្សតិ តស្ស តត្ថ ចិត្តសង្ខារោ និរុជ្ឈិស្សតីតិ? អាមន្តា.

(ខ) យស្ស វា បន យត្ថ ចិត្តសង្ខារោ និរុជ្ឈិស្សតិ តស្ស តត្ថ កាយសង្ខារោ ឧប្បជ្ជិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ រូបាវចរានំ អរូបាវចរានំ តេសំ តត្ថ ចិត្តសង្ខារោ និរុជ្ឈិស្សតិ, នោ ច តេសំ តត្ថ កាយសង្ខារោ ឧប្បជ្ជិស្សតិ. បឋមជ្ឈានំ ទុតិយជ្ឈានំ តតិយជ្ឈានំ សមាបន្នានំ ឥតរេសំ កាមាវចរានំ តេសំ តត្ថ ចិត្តសង្ខារោ ច និរុជ្ឈិស្សតិ កាយសង្ខារោ ច ឧប្បជ្ជិស្សតិ.

១៤១. (ក) យស្ស យត្ថ វចីសង្ខារោ ឧប្បជ្ជិស្សតិ តស្ស តត្ថ ចិត្តសង្ខារោ និរុជ្ឈិស្សតីតិ? អាមន្តា.

(ខ) យស្ស វា បន យត្ថ ចិត្តសង្ខារោ និរុជ្ឈិស្សតិ តស្ស តត្ថ វចីសង្ខារោ ឧប្បជ្ជិស្សតីតិ?

បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ទុតិយជ្ឈានំ តតិយជ្ឈានំ ចតុត្ថជ្ឈានំ សមាបន្នានំ តេសំ តត្ថ ចិត្តសង្ខារោ និរុជ្ឈិស្សតិ, នោ ច តេសំ តត្ថ វចីសង្ខារោ ឧប្បជ្ជិស្សតិ. បឋមជ្ឈានំ សមាបន្នានំ កាមាវចរានំ ឥតរេសំ រូបាវចរានំ អរូបាវចរានំ តេសំ តត្ថ ចិត្តសង្ខារោ ច និរុជ្ឈិស្សតិ វចីសង្ខារោ ច ឧប្បជ្ជិស្សតិ.

(ឃ) បច្ចនីកបុគ្គលោ

១៤២. (ក) យស្ស កាយសង្ខារោ នុប្បជ្ជិស្សតិ តស្ស វចីសង្ខារោ ន និរុជ្ឈិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ រូបាវចរេ អរូបាវចរេ បច្ឆិមភវិកានំ យេ ច រូបាវចរំ អរូបាវចរំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ កាយសង្ខារោ នុប្បជ្ជិស្សតិ, នោ ច តេសំ វចីសង្ខារោ ន និរុជ្ឈិស្សតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ តេសំ កាយសង្ខារោ ច នុប្បជ្ជិស្សតិ វចីសង្ខារោ ច ន និរុជ្ឈិស្សតិ.

(ខ) យស្ស វា បន…បេ…? អាមន្តា.

(ក) យស្ស កាយសង្ខារោ នុប្បជ្ជិស្សតិ តស្ស ចិត្តសង្ខារោ ន និរុជ្ឈិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ រូបាវចរេ អរូបាវចរេ បច្ឆិមភវិកានំ យេ ច រូបាវចរំ អរូបាវចរំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ កាយសង្ខារោ នុប្បជ្ជិស្សតិ, នោ ច តេសំ ចិត្តសង្ខារោ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ កាយសង្ខារោ ច នុប្បជ្ជិស្សតិ ចិត្តសង្ខារោ ច ន និរុជ្ឈិស្សតិ.

(ខ) យស្ស វា បន…បេ…? អាមន្តា.

១៤៣. (ក) យស្ស វចីសង្ខារោ នុប្បជ្ជិស្សតិ តស្ស ចិត្តសង្ខារោ ន និរុជ្ឈិស្សតីតិ?

បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ តេសំ វចីសង្ខារោ នុប្បជ្ជិស្សតិ, នោ ច តេសំ ចិត្តសង្ខារោ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ វចីសង្ខារោ ច នុប្បជ្ជិស្សតិ ចិត្តសង្ខារោ ច ន និរុជ្ឈិស្សតិ.

(ខ) យស្ស វា បន…បេ…? អាមន្តា.

(ង) បច្ចនីកឱកាសោ

១៤៤. យត្ថ កាយសង្ខារោ នុប្បជ្ជិស្សតិ…បេ….

(ច) បច្ចនីកបុគ្គលោកាសា

១៤៥. (ក) យស្ស យត្ថ កាយសង្ខារោ នុប្បជ្ជិស្សតិ តស្ស តត្ថ វចីសង្ខារោ ន និរុជ្ឈិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ រូបាវចរានំ អរូបាវចរានំ តេសំ តត្ថ កាយសង្ខារោ នុប្បជ្ជិស្សតិ, នោ ច តេសំ តត្ថ វចីសង្ខារោ ន និរុជ្ឈិស្សតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ កាយសង្ខារោ ច នុប្បជ្ជិស្សតិ វចីសង្ខារោ ច ន និរុជ្ឈិស្សតិ.

(ខ) យស្ស វា បន យត្ថ វចីសង្ខារោ ន និរុជ្ឈិស្សតិ តស្ស តត្ថ កាយសង្ខារោ នុប្បជ្ជិស្សតីតិ?

ទុតិយជ្ឈានំ តតិយជ្ឈានំ សមាបន្នានំ តេសំ តត្ថ វចីសង្ខារោ ន និរុជ្ឈិស្សតិ, នោ ច តេសំ តត្ថ កាយសង្ខារោ នុប្បជ្ជិស្សតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ វចីសង្ខារោ ច ន និរុជ្ឈិស្សតិ កាយសង្ខារោ ច នុប្បជ្ជិស្សតិ.

(ក) យស្ស យត្ថ កាយសង្ខារោ នុប្បជ្ជិស្សតិ តស្ស តត្ថ ចិត្តសង្ខារោ ន និរុជ្ឈិស្សតីតិ?

កាមាវចរានំ បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា កាមាវចរានំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ រូបាវចរានំ អរូបាវចរានំ តេសំ តត្ថ កាយសង្ខារោ នុប្បជ្ជិស្សតិ, នោ ច តេសំ តត្ថ ចិត្តសង្ខារោ ន និរុជ្ឈិស្សតិ. បច្ឆិមចិត្តស្ស ភង្គក្ខណេ អសញ្ញសត្តានំ តេសំ តត្ថ កាយសង្ខារោ ច នុប្បជ្ជិស្សតិ ចិត្តសង្ខារោ ច ន និរុជ្ឈិស្សតិ.

(ខ) យស្ស វា បន យត្ថ…បេ…? អាមន្តា.

១៤៦. (ក) យស្ស យត្ថ វចីសង្ខារោ នុប្បជ្ជិស្សតិ តស្ស តត្ថ ចិត្តសង្ខារោ ន និរុជ្ឈិស្សតីតិ?

បច្ឆិមចិត្តស្ស ឧប្បាទក្ខណេ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ទុតិយជ្ឈានំ តតិយជ្ឈានំ ចតុត្ថជ្ឈានំ សមាបន្នានំ តេសំ តត្ថ វចីសង្ខារោ នុប្បជ្ជិស្សតិ, នោ ច តេសំ តត្ថ ចិត្តសង្ខារោ ន និរុជ្ឈិស្សតិ. បច្ឆិមចិត្តស្ស ភង្គក្ខណេ អសញ្ញសត្តានំ តេសំ តត្ថ វចីសង្ខារោ ច នុប្បជ្ជិស្សតិ ចិត្តសង្ខារោ ច ន និរុជ្ឈិស្សតិ.

(ខ) យស្ស វា បន យត្ថ…បេ…? អាមន្តា.