(៤) បច្ចុប្បន្នាតីតវារោ

(ក) អនុលោមបុគ្គលោ

៩៨. (ក) យស្ស កាយសង្ខារោ និរុជ្ឈតិ តស្ស វចីសង្ខារោ និរុជ្ឈិត្ថាតិ? អាមន្តា.

(ខ) យស្ស វា បន វចីសង្ខារោ និរុជ្ឈិត្ថ តស្ស កាយសង្ខារោ និរុជ្ឈតីតិ?

សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ និរុជ្ឈិត្ថ, នោ ច តេសំ កាយសង្ខារោ និរុជ្ឈតិ. អស្សាសបស្សាសានំ ភង្គក្ខណេ តេសំ វចីសង្ខារោ ច និរុជ្ឈិត្ថ កាយសង្ខារោ ច និរុជ្ឈតិ.

(ក) យស្ស កាយសង្ខារោ និរុជ្ឈតិ តស្ស ចិត្តសង្ខារោ និរុជ្ឈិត្ថាតិ? អាមន្តា.

(ខ) យស្ស វា បន ចិត្តសង្ខារោ និរុជ្ឈិត្ថ តស្ស កាយសង្ខារោ និរុជ្ឈតីតិ?

សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ និរុជ្ឈិត្ថ, នោ ច តេសំ កាយសង្ខារោ និរុជ្ឈតិ. អស្សាសបស្សាសានំ ភង្គក្ខណេ តេសំ ចិត្តសង្ខារោ ច និរុជ្ឈិត្ថ កាយសង្ខារោ ច និរុជ្ឈតិ.

៩៩. (ក) យស្ស វចីសង្ខារោ និរុជ្ឈតិ តស្ស ចិត្តសង្ខារោ និរុជ្ឈិត្ថាតិ? អាមន្តា.

(ខ) យស្ស វា បន ចិត្តសង្ខារោ និរុជ្ឈិត្ថ តស្ស វចីសង្ខារោ និរុជ្ឈតីតិ?

សព្ពេសំ ចិត្តស្ស ឧប្បាទក្ខណេ វិនា វិតក្កវិចារេហិ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ និរុជ្ឈិត្ថ, នោ ច តេសំ វចីសង្ខារោ និរុជ្ឈតិ. វិតក្កវិចារានំ ភង្គក្ខណេ តេសំ ចិត្តសង្ខារោ ច និរុជ្ឈិត្ថ វចីសង្ខារោ ច និរុជ្ឈតិ.

(ខ) អនុលោមឱកាសោ

១០០. យត្ថ កាយសង្ខារោ និរុជ្ឈតិ…បេ….

(គ) អនុលោមបុគ្គលោកាសា

១០១. (ក) យស្ស យត្ថ កាយសង្ខារោ និរុជ្ឈតិ តស្ស តត្ថ វចីសង្ខារោ និរុជ្ឈិត្ថាតិ?

ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ភង្គក្ខណេ តេសំ តត្ថ កាយសង្ខារោ និរុជ្ឈតិ, នោ ច តេសំ តត្ថ វចីសង្ខារោ និរុជ្ឈិត្ថ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំ តត្ថ កាយសង្ខារោ ច និរុជ្ឈតិ វចីសង្ខារោ ច និរុជ្ឈិត្ថ.

(ខ) យស្ស វា បន យត្ថ វចីសង្ខារោ និរុជ្ឈិត្ថ តស្ស តត្ថ កាយសង្ខារោ និរុជ្ឈតីតិ?

បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំយេវ វិនា អស្សាសបស្សាសេហិ ចិត្តស្ស ភង្គក្ខណេ រូបាវចរានំ អរូបាវចរានំ តេសំ តត្ថ វចីសង្ខារោ និរុជ្ឈិត្ថ, នោ ច តេសំ តត្ថ កាយសង្ខារោ និរុជ្ឈតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំ តត្ថ វចីសង្ខារោ ច និរុជ្ឈិត្ថ កាយសង្ខារោ ច និរុជ្ឈតិ.

(ក) យស្ស យត្ថ កាយសង្ខារោ និរុជ្ឈតិ តស្ស តត្ថ ចិត្តសង្ខារោ និរុជ្ឈិត្ថាតិ? អាមន្តា.

(ខ) យស្ស វា បន យត្ថ ចិត្តសង្ខារោ និរុជ្ឈិត្ថ តស្ស តត្ថ កាយសង្ខារោ និរុជ្ឈតីតិ?

សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ ចិត្តស្ស ភង្គក្ខណេ តេសំ តត្ថ ចិត្តសង្ខារោ និរុជ្ឈិត្ថ, នោ ច តេសំ តត្ថ កាយសង្ខារោ និរុជ្ឈតិ. អស្សាសបស្សាសានំ ភង្គក្ខណេ តេសំ តត្ថ ចិត្តសង្ខារោ ច និរុជ្ឈិត្ថ កាយសង្ខារោ ច និរុជ្ឈតិ.

១០២. (ក) យស្ស យត្ថ វចីសង្ខារោ និរុជ្ឈតិ តស្ស តត្ថ ចិត្តសង្ខារោ និរុជ្ឈិត្ថាតិ? អាមន្តា.

(ខ) យស្ស វា បន យត្ថ ចិត្តសង្ខារោ និរុជ្ឈិត្ថ តស្ស តត្ថ វចីសង្ខារោ និរុជ្ឈតីតិ?

សព្ពេសំ ចិត្តស្ស ឧប្បាទក្ខណេ វិនា វិតក្កវិចារេហិ ចិត្តស្ស ភង្គក្ខណេ តេសំ តត្ថ ចិត្តសង្ខារោ និរុជ្ឈិត្ថ, នោ ច តេសំ តត្ថ វចីសង្ខារោ និរុជ្ឈតិ. វិតក្កវិចារានំ ភង្គក្ខណេ តេសំ តត្ថ ចិត្តសង្ខារោ ច និរុជ្ឈិត្ថ វចីសង្ខារោ ច និរុជ្ឈតិ.

(ឃ) បច្ចនីកបុគ្គលោ

១០៣. (ក) យស្ស កាយសង្ខារោ ន និរុជ្ឈតិ តស្ស វចីសង្ខារោ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន វចីសង្ខារោ ន និរុជ្ឈិត្ថ តស្ស កាយសង្ខារោ ន និរុជ្ឈតីតិ? នត្ថិ.

(ក) យស្ស កាយសង្ខារោ ន និរុជ្ឈតិ តស្ស ចិត្តសង្ខារោ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន ចិត្តសង្ខារោ ន និរុជ្ឈិត្ថ តស្ស កាយសង្ខារោ ន និរុជ្ឈតីតិ? នត្ថិ.

១០៤. (ក) យស្ស វចីសង្ខារោ ន និរុជ្ឈតិ តស្ស ចិត្តសង្ខារោ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន ចិត្តសង្ខារោ ន និរុជ្ឈិត្ថ តស្ស វចីសង្ខារោ ន និរុជ្ឈតីតិ? នត្ថិ.

(ង) បច្ចនីកឱកាសោ

១០៥. យត្ថ កាយសង្ខារោ ន និរុជ្ឈតិ…បេ….

(ច) បច្ចនីកបុគ្គលោកាសា

១០៦. (ក) យស្ស យត្ថ កាយសង្ខារោ ន និរុជ្ឈតិ តស្ស តត្ថ វចីសង្ខារោ ន និរុជ្ឈិត្ថាតិ?

បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំយេវ វិនា អស្សាសបស្សាសេហិ ចិត្តស្ស ភង្គក្ខណេ រូបាវចរានំ អរូបាវចរានំ តេសំ តត្ថ កាយសង្ខារោ ន និរុជ្ឈតិ, នោ ច តេសំ តត្ថ វចីសង្ខារោ ន និរុជ្ឈិត្ថ. ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ឧប្បាទក្ខណេ តេសំយេវ វិនា អស្សាសបស្សាសេហិ ចិត្តស្ស ភង្គក្ខណេ ចតុត្ថជ្ឈានំ សមាបន្នានំ សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ កាយសង្ខារោ ច ន និរុជ្ឈតិ វចីសង្ខារោ ច ន និរុជ្ឈិត្ថ.

(ខ) យស្ស វា បន យត្ថ វចីសង្ខារោ ន និរុជ្ឈិត្ថ តស្ស តត្ថ កាយសង្ខារោ ន និរុជ្ឈតីតិ?

ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ភង្គក្ខណេ តេសំ តត្ថ វចីសង្ខារោ ន និរុជ្ឈិត្ថ, នោ ច តេសំ តត្ថ កាយសង្ខារោ ន និរុជ្ឈតិ. ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ឧប្បាទក្ខណេ តេសំយេវ វិនា អស្សាសបស្សាសេហិ ចិត្តស្ស ភង្គក្ខណេ ចតុត្ថជ្ឈានំ សមាបន្នានំ សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ វចីសង្ខារោ ច ន និរុជ្ឈិត្ថ កាយសង្ខារោ ច ន និរុជ្ឈតិ.

(ក) យស្ស យត្ថ កាយសង្ខារោ ន និរុជ្ឈតិ តស្ស តត្ថ ចិត្តសង្ខារោ ន និរុជ្ឈិត្ថាតិ?

សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ ចិត្តស្ស ភង្គក្ខណេ តេសំ តត្ថ កាយសង្ខារោ ន និរុជ្ឈតិ, នោ ច តេសំ តត្ថ ចិត្តសង្ខារោ ន និរុជ្ឈិត្ថ. សុទ្ធាវាសំ ឧបបជ្ជន្តានំ អសញ្ញសត្តានំ តេសំ តត្ថ កាយសង្ខារោ ច ន និរុជ្ឈតិ ចិត្តសង្ខារោ ច ន និរុជ្ឈិត្ថ.

(ខ) យស្ស វា បន យត្ថ ចិត្តសង្ខារោ ន និរុជ្ឈិត្ថ តស្ស តត្ថ កាយសង្ខារោ ន និរុជ្ឈតីតិ? អាមន្តា.

១០៧. (ក) យស្ស យត្ថ វចីសង្ខារោ ន និរុជ្ឈតិ តស្ស តត្ថ ចិត្តសង្ខារោ ន និរុជ្ឈិត្ថាតិ?

សព្ពេសំ ចិត្តស្ស ឧប្បាទក្ខណេ វិនា វិតក្កវិចារេហិ ចិត្តស្ស ភង្គក្ខណេ តេសំ តត្ថ វចីសង្ខារោ ន និរុជ្ឈតិ, នោ ច តេសំ តត្ថ ចិត្តសង្ខារោ ន និរុជ្ឈិត្ថ. សុទ្ធាវាសំ ឧបបជ្ជន្តានំ អសញ្ញសត្តានំ តេសំ តត្ថ វចីសង្ខារោ ច ន និរុជ្ឈតិ ចិត្តសង្ខារោ ច ន និរុជ្ឈិត្ថ.

(ខ) យស្ស វា បន យត្ថ ចិត្តសង្ខារោ ន និរុជ្ឈិត្ថ តស្ស តត្ថ វចីសង្ខារោ ន និរុជ្ឈតីតិ? អាមន្តា.