(៥) បច្ចុប្បន្នានាគតវារោ

(ក) អនុលោមបុគ្គលោ

៥៩. (ក) យស្ស កាយសង្ខារោ ឧប្បជ្ជតិ តស្ស វចីសង្ខារោ ឧប្បជ្ជិស្សតីតិ? អាមន្តា.

(ខ) យស្ស វា បន វចីសង្ខារោ ឧប្បជ្ជិស្សតិ តស្ស កាយសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ឧប្បជ្ជិស្សតិ, នោ ច តេសំ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ វចីសង្ខារោ ច ឧប្បជ្ជិស្សតិ កាយសង្ខារោ ច ឧប្បជ្ជតិ.

(ក) យស្ស កាយសង្ខារោ ឧប្បជ្ជតិ តស្ស ចិត្តសង្ខារោ ឧប្បជ្ជិស្សតីតិ? អាមន្តា.

(ខ) យស្ស វា បន ចិត្តសង្ខារោ ឧប្បជ្ជិស្សតិ តស្ស កាយសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ ឧប្បជ្ជិស្សតិ, នោ ច តេសំ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ ចិត្តសង្ខារោ ច ឧប្បជ្ជិស្សតិ កាយសង្ខារោ ច ឧប្បជ្ជតិ.

៦០. (ក) យស្ស វចីសង្ខារោ ឧប្បជ្ជតិ តស្ស ចិត្តសង្ខារោ ឧប្បជ្ជិស្សតីតិ?

សវិតក្កសវិចារបច្ឆិមចិត្តស្ស ឧប្បាទក្ខណេ តេសំ វចីសង្ខារោ ឧប្បជ្ជតិ, នោ ច តេសំ ចិត្តសង្ខារោ ឧប្បជ្ជិស្សតិ. ឥតរេសំ វិតក្កវិចារានំ ឧប្បាទក្ខណេ តេសំ វចីសង្ខារោ ច ឧប្បជ្ជតិ ចិត្តសង្ខារោ ច ឧប្បជ្ជិស្សតិ.

(ខ) យស្ស វា បន ចិត្តសង្ខារោ ឧប្បជ្ជិស្សតិ តស្ស វចីសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ ឧប្បជ្ជិស្សតិ, នោ ច តេសំ វចីសង្ខារោ ឧប្បជ្ជតិ. វិតក្កវិចារានំ ឧប្បាទក្ខណេ តេសំ ចិត្តសង្ខារោ ច ឧប្បជ្ជិស្សតិ វចីសង្ខារោ ច ឧប្បជ្ជតិ.

(ខ) អនុលោមឱកាសោ

៦១. យត្ថ កាយសង្ខារោ ឧប្បជ្ជតិ…បេ….

(គ) អនុលោមបុគ្គលោកាសា

៦២. (ក) យស្ស យត្ថ កាយសង្ខារោ ឧប្បជ្ជតិ តស្ស តត្ថ វចីសង្ខារោ ឧប្បជ្ជិស្សតីតិ?

ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ឧប្បាទក្ខណេ តេសំ តត្ថ កាយសង្ខារោ ឧប្បជ្ជតិ, នោ ច តេសំ តត្ថ វចីសង្ខារោ ឧប្បជ្ជិស្សតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំ តត្ថ កាយសង្ខារោ ច ឧប្បជ្ជតិ វចីសង្ខារោ ច ឧប្បជ្ជិស្សតិ.

(ខ) យស្ស វា បន យត្ថ វចីសង្ខារោ ឧប្បជ្ជិស្សតិ តស្ស តត្ថ កាយសង្ខារោ ឧប្បជ្ជតីតិ?

បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ រូបាវចរានំ អរូបាវចរានំ តេសំ តត្ថ វចីសង្ខារោ ឧប្បជ្ជិស្សតិ, នោ ច តេសំ តត្ថ កាយសង្ខារោ ឧប្បជ្ជតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំ តត្ថ វចីសង្ខារោ ច ឧប្បជ្ជិស្សតិ កាយសង្ខារោ ច ឧប្បជ្ជតិ.

(ក) យស្ស យត្ថ កាយសង្ខារោ ឧប្បជ្ជតិ តស្ស តត្ថ ចិត្តសង្ខារោ ឧប្បជ្ជិស្សតីតិ? អាមន្តា.

(ខ) យស្ស វា បន យត្ថ ចិត្តសង្ខារោ ឧប្បជ្ជិស្សតិ តស្ស តត្ថ កាយសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ តេសំ តត្ថ ចិត្តសង្ខារោ ឧប្បជ្ជិស្សតិ, នោ ច តេសំ តត្ថ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ តត្ថ ចិត្តសង្ខារោ ច ឧប្បជ្ជិស្សតិ កាយសង្ខារោ ច ឧប្បជ្ជតិ.

៦៣. (ក) យស្ស យត្ថ វចីសង្ខារោ ឧប្បជ្ជតិ តស្ស តត្ថ ចិត្តសង្ខារោ ឧប្បជ្ជិស្សតីតិ?

សវិតក្កសវិចារបច្ឆិមចិត្តស្ស ឧប្បាទក្ខណេ តេសំ តត្ថ វចីសង្ខារោ ឧប្បជ្ជតិ, នោ ច តេសំ តត្ថ ចិត្តសង្ខារោ ឧប្បជ្ជិស្សតិ. ឥតរេសំ វិតក្កវិចារានំ ឧប្បាទក្ខណេ តេសំ តត្ថ វចីសង្ខារោ ច ឧប្បជ្ជតិ ចិត្តសង្ខារោ ច ឧប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ ឧប្បជ្ជិស្សតិ តស្ស តត្ថ វចីសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ តេសំ តត្ថ ចិត្តសង្ខារោ ឧប្បជ្ជិស្សតិ, នោ ច តេសំ តត្ថ វចីសង្ខារោ ឧប្បជ្ជតិ. វិតក្កវិចារានំ ឧប្បាទក្ខណេ តេសំ តត្ថ ចិត្តសង្ខារោ ច ឧប្បជ្ជិស្សតិ វចីសង្ខារោ ច ឧប្បជ្ជតិ.

(ឃ) បច្ចនីកបុគ្គលោ

៦៤. (ក) យស្ស កាយសង្ខារោ នុប្បជ្ជតិ តស្ស វចីសង្ខារោ នុប្បជ្ជិស្សតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ នុប្បជ្ជតិ, នោ ច តេសំ វចីសង្ខារោ នុប្បជ្ជិស្សតិ. បច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ តេសំ កាយសង្ខារោ ច នុប្បជ្ជតិ វចីសង្ខារោ ច នុប្បជ្ជិស្សតិ.

(ខ) យស្ស វា បន វចីសង្ខារោ នុប្បជ្ជិស្សតិ តស្ស កាយសង្ខារោ នុប្បជ្ជតីតិ? អាមន្តា.

(ក) យស្ស កាយសង្ខារោ នុប្បជ្ជតិ តស្ស ចិត្តសង្ខារោ នុប្បជ្ជិស្សតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ នុប្បជ្ជតិ, នោ ច តេសំ ចិត្តសង្ខារោ នុប្បជ្ជិស្សតិ. បច្ឆិមចិត្តសមង្គីនំ តេសំ កាយសង្ខារោ ច នុប្បជ្ជតិ ចិត្តសង្ខារោ ច នុប្បជ្ជិស្សតិ.

(ខ) យស្ស វា បន…បេ…? អាមន្តា.

៦៥. (ក) យស្ស វចីសង្ខារោ នុប្បជ្ជតិ តស្ស ចិត្តសង្ខារោ នុប្បជ្ជិស្សតីតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ នុប្បជ្ជតិ, នោ ច តេសំ ចិត្តសង្ខារោ នុប្បជ្ជិស្សតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ តេសំ វចីសង្ខារោ ច នុប្បជ្ជតិ ចិត្តសង្ខារោ ច នុប្បជ្ជិស្សតិ.

(ខ) យស្ស វា បន ចិត្តសង្ខារោ នុប្បជ្ជិស្សតិ តស្ស វចីសង្ខារោ នុប្បជ្ជតីតិ?

សវិតក្កសវិចារបច្ឆិមចិត្តស្ស ឧប្បាទក្ខណេ តេសំ ចិត្តសង្ខារោ នុប្បជ្ជិស្សតិ, នោ ច តេសំ វចីសង្ខារោ នុប្បជ្ជតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ តេសំ ចិត្តសង្ខារោ ច នុប្បជ្ជិស្សតិ វចីសង្ខារោ ច នុប្បជ្ជតិ.

៤. (ង) បច្ចនីកឱកាសោ

៦៦. យត្ថ កាយសង្ខារោ នុប្បជ្ជតិ…បេ….

(ច) បច្ចនីកបុគ្គលោកាសា

៦៧. (ក) យស្ស យត្ថ កាយសង្ខារោ នុប្បជ្ជតិ តស្ស តត្ថ វចីសង្ខារោ នុប្បជ្ជិស្សតីតិ?

បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ រូបាវចរានំ អរូបាវចរានំ តេសំ តត្ថ កាយសង្ខារោ នុប្បជ្ជតិ, នោ ច តេសំ តត្ថ វចីសង្ខារោ នុប្បជ្ជិស្សតិ. បច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ កាយសង្ខារោ ច នុប្បជ្ជតិ វចីសង្ខារោ ច នុប្បជ្ជិស្សតិ.

(ខ) យស្ស វា បន យត្ថ វចីសង្ខារោ នុប្បជ្ជិស្សតិ តស្ស តត្ថ កាយសង្ខារោ នុប្បជ្ជតីតិ?

ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ឧប្បាទក្ខណេ តេសំ តត្ថ វចីសង្ខារោ នុប្បជ្ជិស្សតិ, នោ ច តេសំ តត្ថ កាយសង្ខារោ នុប្បជ្ជតិ. បច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ វចីសង្ខារោ ច នុប្បជ្ជិស្សតិ កាយសង្ខារោ ច នុប្បជ្ជតិ.

(ក) យស្ស យត្ថ កាយសង្ខារោ នុប្បជ្ជតិ តស្ស តត្ថ ចិត្តសង្ខារោ នុប្បជ្ជិស្សតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ តេសំ តត្ថ កាយសង្ខារោ នុប្បជ្ជតិ, នោ ច តេសំ តត្ថ ចិត្តសង្ខារោ នុប្បជ្ជិស្សតិ. បច្ឆិមចិត្តសមង្គីនំ អសញ្ញសត្តានំ តេសំ តត្ថ កាយសង្ខារោ ច នុប្បជ្ជតិ ចិត្តសង្ខារោ ច នុប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ នុប្បជ្ជិស្សតិ តស្ស តត្ថ កាយសង្ខារោ នុប្បជ្ជតីតិ? អាមន្តា.

៦៨. (ក) យស្ស យត្ថ វចីសង្ខារោ នុប្បជ្ជតិ តស្ស តត្ថ ចិត្តសង្ខារោ នុប្បជ្ជិស្សតីតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ តេសំ តត្ថ វចីសង្ខារោ នុប្បជ្ជតិ, នោ ច តេសំ តត្ថ ចិត្តសង្ខារោ នុប្បជ្ជិស្សតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ អសញ្ញសត្តានំ តេសំ តត្ថ វចីសង្ខារោ ច នុប្បជ្ជតិ ចិត្តសង្ខារោ ច នុប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ នុប្បជ្ជិស្សតិ តស្ស តត្ថ វចីសង្ខារោ នុប្បជ្ជតីតិ?

សវិតក្កសវិចារបច្ឆិមចិត្តស្ស ឧប្បាទក្ខណេ តេសំ តត្ថ ចិត្តសង្ខារោ នុប្បជ្ជិស្សតិ, នោ ច តេសំ តត្ថ វចីសង្ខារោ នុប្បជ្ជតិ. សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ អសញ្ញសត្តានំ តេសំ តត្ថ ចិត្តសង្ខារោ ច នុប្បជ្ជិស្សតិ វចីសង្ខារោ ច នុប្បជ្ជតិ.