(៦) អតីតានាគតវារោ

(ក) អនុលោមបុគ្គលោ

៦៩. (ក) យស្ស កាយសង្ខារោ ឧប្បជ្ជិត្ថ តស្ស វចីសង្ខារោ ឧប្បជ្ជិស្សតីតិ?

បច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ តេសំ កាយសង្ខារោ ឧប្បជ្ជិត្ថ, នោ ច តេសំ វចីសង្ខារោ ឧប្បជ្ជិស្សតិ. ឥតរេសំ តេសំ កាយសង្ខារោ ច ឧប្បជ្ជិត្ថ វចីសង្ខារោ ច ឧប្បជ្ជិស្សតិ.

(ខ) យស្ស វា បន…បេ…? អាមន្តា.

(ក) យស្ស កាយសង្ខារោ ឧប្បជ្ជិត្ថ តស្ស ចិត្តសង្ខារោ ឧប្បជ្ជិស្សតីតិ?

បច្ឆិមចិត្តសមង្គីនំ តេសំ កាយសង្ខារោ ឧប្បជ្ជិត្ថ, នោ ច តេសំ ចិត្តសង្ខារោ ឧប្បជ្ជិស្សតិ. ឥតរេសំ តេសំ កាយសង្ខារោ ច ឧប្បជ្ជិត្ថ ចិត្តសង្ខារោ ច ឧប្បជ្ជិស្សតិ.

(ខ) យស្ស វា បន…បេ…. អាមន្តា.

៧០. (ក) យស្ស វចីសង្ខារោ ឧប្បជ្ជិត្ថ តស្ស ចិត្តសង្ខារោ ឧប្បជ្ជិស្សតីតិ?

បច្ឆិមចិត្តសមង្គីនំ តេសំ វចីសង្ខារោ ឧប្បជ្ជិត្ថ, នោ ច តេសំ ចិត្តសង្ខារោ ឧប្បជ្ជិស្សតិ. ឥតរេសំ តេសំ វចីសង្ខារោ ច ឧប្បជ្ជិត្ថ ចិត្តសង្ខារោ ច ឧប្បជ្ជិស្សតិ.

(ខ) យស្ស វា បន…បេ…? អាមន្តា.

(ខ) អនុលោមឱកាសោ

៧១. យត្ថ កាយសង្ខារោ ឧប្បជ្ជិត្ថ…បេ….

(គ) អនុលោមបុគ្គលោកាសា

៧២. (ក) យស្ស យត្ថ កាយសង្ខារោ ឧប្បជ្ជិត្ថ តស្ស តត្ថ វចីសង្ខារោ ឧប្បជ្ជិស្សតីតិ?

កាមាវចរេ បច្ឆិមចិត្តសមង្គីនំ ទុតិយជ្ឈានំ តតិយជ្ឈានំ សមាបន្នានំ តេសំ តត្ថ កាយសង្ខារោ ឧប្បជ្ជិត្ថ, នោ ច តេសំ តត្ថ វចីសង្ខារោ ឧប្បជ្ជិស្សតិ. បឋមជ្ឈានំ សមាបន្នានំ ឥតរេសំ កាមាវចរានំ តេសំ តត្ថ កាយសង្ខារោ ច ឧប្បជ្ជិត្ថ វចីសង្ខារោ ច ឧប្បជ្ជិស្សតិ.

(ខ) យស្ស វា បន យត្ថ វចីសង្ខារោ ឧប្បជ្ជិស្សតិ តស្ស តត្ថ កាយសង្ខារោ ឧប្បជ្ជិត្ថាតិ?

រូបាវចរានំ អរូបាវចរានំ តេសំ តត្ថ វចីសង្ខារោ ឧប្បជ្ជិស្សតិ, នោ ច តេសំ តត្ថ កាយសង្ខារោ ឧប្បជ្ជិត្ថ. បឋមជ្ឈានំ សមាបន្នានំ កាមាវចរានំ តេសំ តត្ថ វចីសង្ខារោ ច ឧប្បជ្ជិស្សតិ កាយសង្ខារោ ច ឧប្បជ្ជិត្ថ.

(ក) យស្ស យត្ថ កាយសង្ខារោ ឧប្បជ្ជិត្ថ តស្ស តត្ថ ចិត្តសង្ខារោ ឧប្បជ្ជិស្សតីតិ?

កាមាវចរេ បច្ឆិមចិត្តសមង្គីនំ តេសំ តត្ថ កាយសង្ខារោ ឧប្បជ្ជិត្ថ, នោ ច តេសំ តត្ថ ចិត្តសង្ខារោ ឧប្បជ្ជិស្សតិ. បឋមជ្ឈានំ ទុតិយជ្ឈានំ តតិយជ្ឈានំ សមាបន្នានំ ឥតរេសំ កាមាវចរានំ តេសំ តត្ថ កាយសង្ខារោ ច ឧប្បជ្ជិត្ថ ចិត្តសង្ខារោ ច ឧប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ ឧប្បជ្ជិស្សតិ តស្ស តត្ថ កាយសង្ខារោ ឧប្បជ្ជិត្ថាតិ?

ចតុត្ថជ្ឈានំ សមាបន្នានំ រូបាវចរានំ អរូបាវចរានំ តេសំ តត្ថ ចិត្តសង្ខារោ ឧប្បជ្ជិស្សតិ, នោ ច តេសំ តត្ថ កាយសង្ខារោ ឧប្បជ្ជិត្ថ. បឋមជ្ឈានំ ទុតិយជ្ឈានំ តតិយជ្ឈានំ សមាបន្នានំ កាមាវចរានំ តេសំ តត្ថ ចិត្តសង្ខារោ ច ឧប្បជ្ជិស្សតិ កាយសង្ខារោ ច ឧប្បជ្ជិត្ថ.

៧៣. (ក) យស្ស យត្ថ វចីសង្ខារោ ឧប្បជ្ជិត្ថ តស្ស តត្ថ ចិត្តសង្ខារោ ឧប្បជ្ជិស្សតីតិ?

សវិតក្កសវិចារភូមិយំ បច្ឆិមចិត្តសមង្គីនំ តេសំ តត្ថ វចីសង្ខារោ ឧប្បជ្ជិត្ថ, នោ ច តេសំ តត្ថ ចិត្តសង្ខារោ ឧប្បជ្ជិស្សតិ. ឥតរេសំ សវិតក្កសវិចារភូមិយំ តេសំ តត្ថ វចីសង្ខារោ ច ឧប្បជ្ជិត្ថ ចិត្តសង្ខារោ ច ឧប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ ឧប្បជ្ជិស្សតិ តស្ស តត្ថ វចីសង្ខារោ ឧប្បជ្ជិត្ថាតិ?

អវិតក្កអវិចារភូមិយំ តេសំ តត្ថ ចិត្តសង្ខារោ ឧប្បជ្ជិស្សតិ, នោ ច តេសំ តត្ថ វចីសង្ខារោ ឧប្បជ្ជិត្ថ. សវិតក្កសវិចារភូមិយំ តេសំ តត្ថ ចិត្តសង្ខារោ ច ឧប្បជ្ជិស្សតិ វចីសង្ខារោ ច ឧប្បជ្ជិត្ថ.

(ឃ) បច្ចនីកបុគ្គលោ

៧៤. (ក) យស្ស កាយសង្ខារោ នុប្បជ្ជិត្ថ តស្ស វចីសង្ខារោ នុប្បជ្ជិស្សតីតិ? នត្ថិ.

(ខ) យស្ស វា បន វចីសង្ខារោ នុប្បជ្ជិស្សតិ តស្ស កាយសង្ខារោ នុប្បជ្ជិត្ថាតិ? ឧប្បជ្ជិត្ថ.

(ក) យស្ស កាយសង្ខារោ នុប្បជ្ជិត្ថ តស្ស ចិត្តសង្ខារោ នុប្បជ្ជិស្សតីតិ? នត្ថិ.

(ខ) យស្ស វា បន ចិត្តសង្ខារោ នុប្បជ្ជិស្សតិ តស្ស កាយសង្ខារោ នុប្បជ្ជិត្ថាតិ? ឧប្បជ្ជិត្ថ.

៧៥. (ក) យស្ស វចីសង្ខារោ នុប្បជ្ជិត្ថ តស្ស ចិត្តសង្ខារោ នុប្បជ្ជិស្សតីតិ? នត្ថិ.

(ខ) យស្ស វា បន ចិត្តសង្ខារោ នុប្បជ្ជិស្សតិ តស្ស វចីសង្ខារោ នុប្បជ្ជិត្ថាតិ? ឧប្បជ្ជិត្ថ.

(ង) បច្ចនីកឱកាសោ

៧៦. យត្ថ កាយសង្ខារោ នុប្បជ្ជិត្ថ…បេ….

(ច) បច្ចនីកបុគ្គលោកាសា

៧៧. (ក) យស្ស យត្ថ កាយសង្ខារោ នុប្បជ្ជិត្ថ តស្ស តត្ថ វចីសង្ខារោ នុប្បជ្ជិស្សតីតិ?

រូបាវចរានំ អរូបាវចរានំ តេសំ តត្ថ កាយសង្ខារោ នុប្បជ្ជិត្ថ, នោ ច តេសំ តត្ថ វចីសង្ខារោ នុប្បជ្ជិស្សតិ. រូបាវចរេ អរូបាវចរេ បច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ កាយសង្ខារោ ច នុប្បជ្ជិត្ថ វចីសង្ខារោ ច នុប្បជ្ជិស្សតិ.

(ខ) យស្ស វា បន យត្ថ វចីសង្ខារោ នុប្បជ្ជិស្សតិ តស្ស តត្ថ កាយសង្ខារោ នុប្បជ្ជិត្ថាតិ?

កាមាវចរេ បច្ឆិមចិត្តសមង្គីនំ ទុតិយជ្ឈានំ តតិយជ្ឈានំ សមាបន្នានំ តេសំ តត្ថ វចីសង្ខារោ នុប្បជ្ជិស្សតិ, នោ ច តេសំ តត្ថ កាយសង្ខារោ នុប្បជ្ជិត្ថ. រូបាវចរេ អរូបាវចរេ បច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ វចីសង្ខារោ ច នុប្បជ្ជិស្សតិ កាយសង្ខារោ ច នុប្បជ្ជិត្ថ.

(ក) យស្ស យត្ថ កាយសង្ខារោ នុប្បជ្ជិត្ថ តស្ស តត្ថ ចិត្តសង្ខារោ នុប្បជ្ជិស្សតីតិ?

ចតុត្ថជ្ឈានំ សមាបន្នានំ រូបាវចរានំ អរូបាវចរានំ តេសំ តត្ថ កាយសង្ខារោ នុប្បជ្ជិត្ថ, នោ ច តេសំ តត្ថ ចិត្តសង្ខារោ នុប្បជ្ជិស្សតិ. រូបាវចរេ អរូបាវចរេ បច្ឆិមចិត្តសមង្គីនំ អសញ្ញសត្តានំ តេសំ តត្ថ កាយសង្ខារោ ច នុប្បជ្ជិត្ថ ចិត្តសង្ខារោ ច នុប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ នុប្បជ្ជិស្សតិ តស្ស តត្ថ កាយសង្ខារោ នុប្បជ្ជិត្ថាតិ?

កាមាវចរេ បច្ឆិមចិត្តសមង្គីនំ តេសំ តត្ថ ចិត្តសង្ខារោ នុប្បជ្ជិស្សតិ, នោ ច តេសំ តត្ថ កាយសង្ខារោ នុប្បជ្ជិត្ថ. រូបាវចរេ អរូបាវចរេ បច្ឆិមចិត្តសមង្គីនំ អសញ្ញសត្តានំ តេសំ តត្ថ ចិត្តសង្ខារោ ច នុប្បជ្ជិស្សតិ កាយសង្ខារោ ច នុប្បជ្ជិត្ថ.

៧៨. (ក) យស្ស យត្ថ វចីសង្ខារោ នុប្បជ្ជិត្ថ តស្ស តត្ថ ចិត្តសង្ខារោ នុប្បជ្ជិស្សតីតិ?

អវិតក្កអវិចារភូមិយំ តេសំ តត្ថ វចីសង្ខារោ នុប្បជ្ជិត្ថ, នោ ច តេសំ តត្ថ ចិត្តសង្ខារោ នុប្បជ្ជិស្សតិ. អវិតក្កអវិចារភូមិយំ បច្ឆិមចិត្តសមង្គីនំ អសញ្ញសត្តានំ តេសំ តត្ថ វចីសង្ខារោ ច នុប្បជ្ជិត្ថ ចិត្តសង្ខារោ ច នុប្បជ្ជិស្សតិ.

(ខ) យស្ស វា បន យត្ថ ចិត្តសង្ខារោ នុប្បជ្ជិស្សតិ តស្ស តត្ថ វចីសង្ខារោ នុប្បជ្ជិត្ថាតិ?

សវិតក្កសវិចារភូមិយំ បច្ឆិមចិត្តសមង្គីនំ តេសំ តត្ថ ចិត្តសង្ខារោ នុប្បជ្ជិស្សតិ, នោ ច តេសំ តត្ថ វចីសង្ខារោ នុប្បជ្ជិត្ថ. អវិតក្កអវិចារភូមិយំ បច្ឆិមចិត្តសមង្គីនំ អសញ្ញសត្តានំ តេសំ តត្ថ ចិត្តសង្ខារោ ច នុប្បជ្ជិស្សតិ វចីសង្ខារោ ច នុប្បជ្ជិត្ថ.

ឧប្បាទវារោ.