(៤) បច្ចុប្បន្នាតីតវារោ

(ក) អនុលោមបុគ្គលោ

៤៩. (ក) យស្ស កាយសង្ខារោ ឧប្បជ្ជតិ តស្ស វចីសង្ខារោ ឧប្បជ្ជិត្ថាតិ? អាមន្តា.

(ខ) យស្ស វា បន វចីសង្ខារោ ឧប្បជ្ជិត្ថ តស្ស កាយសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ឧប្បជ្ជិត្ថ, នោ ច តេសំ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ វចីសង្ខារោ ច ឧប្បជ្ជិត្ថ កាយសង្ខារោ ច ឧប្បជ្ជតិ.

(ក) យស្ស កាយសង្ខារោ ឧប្បជ្ជតិ តស្ស ចិត្តសង្ខារោ ឧប្បជ្ជិត្ថាតិ? អាមន្តា.

(ខ) យស្ស វា បន ចិត្តសង្ខារោ ឧប្បជ្ជិត្ថ តស្ស កាយសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ ឧប្បជ្ជិត្ថ, នោ ច តេសំ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ ចិត្តសង្ខារោ ច ឧប្បជ្ជិត្ថ កាយសង្ខារោ ច ឧប្បជ្ជតិ.

៥០. (ក) យស្ស វចីសង្ខារោ ឧប្បជ្ជតិ តស្ស ចិត្តសង្ខារោ ឧប្បជ្ជិត្ថាតិ? អាមន្តា.

(ខ) យស្ស វា បន ចិត្តសង្ខារោ ឧប្បជ្ជិត្ថ តស្ស វចីសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ ឧប្បជ្ជិត្ថ, នោ ច តេសំ វចីសង្ខារោ ឧប្បជ្ជតិ. វិតក្កវិចារានំ ឧប្បាទក្ខណេ តេសំ ចិត្តសង្ខារោ ច ឧប្បជ្ជិត្ថ វចីសង្ខារោ ច ឧប្បជ្ជតិ.

(ខ) អនុលោមឱកាសោ

៥១. យត្ថ កាយសង្ខារោ ឧប្បជ្ជតិ…បេ….

(គ) អនុលោមបុគ្គលោកាសា

៥២. (ក) យស្ស យត្ថ កាយសង្ខារោ ឧប្បជ្ជតិ តស្ស តត្ថ វចីសង្ខារោ ឧប្បជ្ជិត្ថាតិ?

ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ឧប្បាទក្ខណេ តេសំ តត្ថ កាយសង្ខារោ ឧប្បជ្ជតិ, នោ ច តេសំ តត្ថ វចីសង្ខារោ ឧប្បជ្ជិត្ថ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំ តត្ថ កាយសង្ខារោ ច ឧប្បជ្ជតិ វចីសង្ខារោ ច ឧប្បជ្ជិត្ថ.

(ខ) យស្ស វា បន យត្ថ វចីសង្ខារោ ឧប្បជ្ជិត្ថ តស្ស តត្ថ កាយសង្ខារោ ឧប្បជ្ជតីតិ?

បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ រូបាវចរានំ អរូបាវចរានំ តេសំ តត្ថ វចីសង្ខារោ ឧប្បជ្ជិត្ថ, នោ ច តេសំ តត្ថ កាយសង្ខារោ ឧប្បជ្ជតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ឧប្បាទក្ខណេ តេសំ តត្ថ វចីសង្ខារោ ច ឧប្បជ្ជិត្ថ កាយសង្ខារោ ច ឧប្បជ្ជតិ.

(ក) យស្ស យត្ថ កាយសង្ខារោ ឧប្បជ្ជតិ តស្ស តត្ថ ចិត្តសង្ខារោ ឧប្បជ្ជិត្ថាតិ? អាមន្តា.

(ខ) យស្ស វា បន យត្ថ ចិត្តសង្ខារោ ឧប្បជ្ជិត្ថ តស្ស តត្ថ កាយសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ តេសំ តត្ថ ចិត្តសង្ខារោ ឧប្បជ្ជិត្ថ, នោ ច តេសំ តត្ថ កាយសង្ខារោ ឧប្បជ្ជតិ. អស្សាសបស្សាសានំ ឧប្បាទក្ខណេ តេសំ តត្ថ ចិត្តសង្ខារោ ច ឧប្បជ្ជិត្ថ កាយសង្ខារោ ច ឧប្បជ្ជតិ.

៥៣. (ក) យស្ស យត្ថ វចីសង្ខារោ ឧប្បជ្ជតិ តស្ស តត្ថ ចិត្តសង្ខារោ ឧប្បជ្ជិត្ថាតិ? អាមន្តា.

(ខ) យស្ស វា បន យត្ថ ចិត្តសង្ខារោ ឧប្បជ្ជិត្ថ តស្ស តត្ថ វចីសង្ខារោ ឧប្បជ្ជតីតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ តេសំ តត្ថ ចិត្តសង្ខារោ ឧប្បជ្ជិត្ថ, នោ ច តេសំ តត្ថ វចីសង្ខារោ ឧប្បជ្ជតិ. វិតក្កវិចារានំ ឧប្បាទក្ខណេ តេសំ តត្ថ ចិត្តសង្ខារោ ច ឧប្បជ្ជិត្ថ វចីសង្ខារោ ច ឧប្បជ្ជតិ.

(ឃ) បច្ចនីកបុគ្គលោ

៥៤. (ក) យស្ស កាយសង្ខារោ នុប្បជ្ជតិ តស្ស វចីសង្ខារោ នុប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន វចីសង្ខារោ នុប្បជ្ជិត្ថ តស្ស កាយសង្ខារោ នុប្បជ្ជតីតិ? នត្ថិ.

(ក) យស្ស កាយសង្ខារោ នុប្បជ្ជតិ តស្ស ចិត្តសង្ខារោ នុប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន ចិត្តសង្ខារោ នុប្បជ្ជិត្ថ តស្ស កាយសង្ខារោ នុប្បជ្ជតីតិ? នត្ថិ.

៥៥. (ក) យស្ស វចីសង្ខារោ នុប្បជ្ជតិ តស្ស ចិត្តសង្ខារោ នុប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន…បេ…? នត្ថិ.

(ង) បច្ចនីកឱកាសោ

៥៦. យត្ថ កាយសង្ខារោ នុប្បជ្ជតិ…បេ….

(ច) បច្ចនីកបុគ្គលោកាសា

៥៧. (ក) យស្ស យត្ថ កាយសង្ខារោ នុប្បជ្ជតិ តស្ស តត្ថ វចីសង្ខារោ នុប្បជ្ជិត្ថាតិ?

បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ រូបាវចរានំ អរូបាវចរានំ តេសំ តត្ថ កាយសង្ខារោ នុប្បជ្ជតិ, នោ ច តេសំ តត្ថ វចីសង្ខារោ នុប្បជ្ជិត្ថ. ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ ចតុត្ថជ្ឈានំ សមាបន្នានំ សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ កាយសង្ខារោ ច នុប្បជ្ជតិ វចីសង្ខារោ ច នុប្បជ្ជិត្ថ.

(ខ) យស្ស វា បន យត្ថ វចីសង្ខារោ នុប្បជ្ជិត្ថ តស្ស តត្ថ កាយសង្ខារោ នុប្បជ្ជតីតិ?

ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ឧប្បាទក្ខណេ តេសំ តត្ថ វចីសង្ខារោ នុប្បជ្ជិត្ថ, នោ ច តេសំ តត្ថ កាយសង្ខារោ នុប្បជ្ជតិ. ទុតិយជ្ឈានំ តតិយជ្ឈានំ សមាបន្នានំ អស្សាសបស្សាសានំ ភង្គក្ខណេ តេសំយេវ វិនា អស្សាសបស្សាសេហិ ចិត្តស្ស ឧប្បាទក្ខណេ ចតុត្ថជ្ឈានំ សមាបន្នានំ សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ វចីសង្ខារោ ច នុប្បជ្ជិត្ថ កាយសង្ខារោ ច នុប្បជ្ជតិ.

(ក) យស្ស យត្ថ កាយសង្ខារោ នុប្បជ្ជតិ តស្ស តត្ថ ចិត្តសង្ខារោ នុប្បជ្ជិត្ថាតិ?

សព្ពេសំ ចិត្តស្ស ភង្គក្ខណេ វិនា អស្សាសបស្សាសេហិ ចិត្តស្ស ឧប្បាទក្ខណេ តេសំ តត្ថ កាយសង្ខារោ នុប្បជ្ជតិ, នោ ច តេសំ តត្ថ ចិត្តសង្ខារោ នុប្បជ្ជិត្ថ. សុទ្ធាវាសំ ឧបបជ្ជន្តានំ អសញ្ញសត្តានំ តេសំ តត្ថ កាយសង្ខារោ ច នុប្បជ្ជតិ ចិត្តសង្ខារោ ច នុប្បជ្ជិត្ថ.

(ខ) យស្ស វា បន យត្ថ ចិត្តសង្ខារោ នុប្បជ្ជិត្ថ តស្ស តត្ថ កាយសង្ខារោ នុប្បជ្ជតីតិ? អាមន្តា.

៥៨. (ក) យស្ស យត្ថ វចីសង្ខារោ នុប្បជ្ជតិ តស្ស តត្ថ ចិត្តសង្ខារោ នុប្បជ្ជិត្ថាតិ?

សព្ពេសំ ចិត្តស្ស ភង្គក្ខណេ វិនា វិតក្កវិចារេហិ ចិត្តស្ស ឧប្បាទក្ខណេ តេសំ តត្ថ វចីសង្ខារោ នុប្បជ្ជតិ, នោ ច តេសំ តត្ថ ចិត្តសង្ខារោ នុប្បជ្ជិត្ថ. សុទ្ធាវាសំ ឧបបជ្ជន្តានំ អសញ្ញសត្តានំ តេសំ តត្ថ វចីសង្ខារោ ច នុប្បជ្ជតិ ចិត្តសង្ខារោ ច នុប្បជ្ជិត្ថ.

(ខ) យស្ស វា បន យត្ថ…បេ…? អាមន្តា.