៦. អតីតានាគតវារោ

១៧០. (ក) យោ ទុក្ខសច្ចំ បរិជានិត្ថ សោ សមុទយសច្ចំ បជហិស្សតីតិ? នោ.

(ខ) យោ វា បន សមុទយសច្ចំ បជហិស្សតិ សោ ទុក្ខសច្ចំ បរិជានិត្ថាតិ? នោ.

(ក) យោ ទុក្ខសច្ចំ ន បរិជានិត្ថ សោ សមុទយសច្ចំ នប្បជហិស្សតីតិ?

យេ មគ្គំ បដិលភិស្សន្តិ តេ ទុក្ខសច្ចំ ន បរិជានិត្ថ, នោ ច តេ សមុទយសច្ចំ នប្បជហិស្សន្តិ. អគ្គមគ្គសមង្គី យេ ច បុថុជ្ជនា មគ្គំ ន បដិលភិស្សន្តិ តេ ទុក្ខសច្ចញ្ច ន បរិជានិត្ថ សមុទយសច្ចញ្ច នប្បជហិស្សន្តិ.

(ខ) យោ វា បន សមុទយសច្ចំ នប្បជហិស្សតិ សោ ទុក្ខសច្ចំ ន បរិជានិត្ថាតិ?

អរហា សមុទយសច្ចំ នប្បជហិស្សតិ, នោ ច ទុក្ខសច្ចំ ន បរិជានិត្ថ. អគ្គមគ្គសមង្គី យេ ច បុថុជ្ជនា មគ្គំ ន បដិលភិស្សន្តិ តេ សមុទយសច្ចញ្ច នប្បជហិស្សន្តិ ទុក្ខសច្ចញ្ច ន បរិជានិត្ថ.

បរិញ្ញាវារោ.

សច្ចយមកំ និដ្ឋិតំ.