(១) បច្ចុប្បន្នវារោ

(ក) អនុលោមបុគ្គលោ

១៣៦. (ក) យស្ស ទុក្ខសច្ចំ ឧប្បជ្ជតិ តស្ស សមុទយសច្ចំ និរុជ្ឈតីតិ? នោ.

(ខ) យស្ស វា បន សមុទយសច្ចំ និរុជ្ឈតិ តស្ស ទុក្ខសច្ចំ ឧប្បជ្ជតីតិ? នោ.

(ក) យស្ស ទុក្ខសច្ចំ ឧប្បជ្ជតិ តស្ស មគ្គសច្ចំ និរុជ្ឈតីតិ? នោ.

(ខ) យស្ស វា បន មគ្គសច្ចំ និរុជ្ឈតិ តស្ស ទុក្ខសច្ចំ ឧប្បជ្ជតីតិ? នោ.

១៣៧. (ក) យស្ស សមុទយសច្ចំ ឧប្បជ្ជតិ តស្ស មគ្គសច្ចំ និរុជ្ឈតីតិ? នោ.

(ខ) យស្ស វា បន មគ្គសច្ចំ និរុជ្ឈតិ តស្ស សមុទយសច្ចំ ឧប្បជ្ជតីតិ? នោ.

(ខ) អនុលោមឱកាសោ

១៣៨. យត្ថ ទុក្ខសច្ចំ ឧប្បជ្ជតិ តត្ថ សមុទយសច្ចំ និរុជ្ឈតីតិ?

អសញ្ញសត្តេ តត្ថ ទុក្ខសច្ចំ ឧប្បជ្ជតិ, នោ ច តត្ថ សមុទយសច្ចំ និរុជ្ឈតិ…បេ….

(យត្ថកំ ឧប្បាទវារេបិ និរោធវារេបិ ឧប្បាទនិរោធវារេបិ សទិសំ នត្ថិ នានាករណំ).

(គ) អនុលោមបុគ្គលោកាសា

១៣៩. យស្ស យត្ថ ទុក្ខសច្ចំ ឧប្បជ្ជតិ តស្ស តត្ថ សមុទយសច្ចំ និរុជ្ឈតីតិ? នោ.

(យស្សកម្បិ យស្សយត្ថកម្បិ សទិសំ).

(ឃ) បច្ចនីកបុគ្គលោ

១៤០. (ក) យស្ស ទុក្ខសច្ចំ នុប្បជ្ជតិ តស្ស សមុទយសច្ចំ ន និរុជ្ឈតីតិ?

តណ្ហាយ ភង្គក្ខណេ តេសំ ទុក្ខសច្ចំ នុប្បជ្ជតិ, នោ ច តេសំ សមុទយសច្ចំ ន និរុជ្ឈតិ. សព្ពេសំ ចវន្តានំ បវត្តេ តណ្ហាវិប្បយុត្តចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ ទុក្ខសច្ចញ្ច នុប្បជ្ជតិ សមុទយសច្ចញ្ច ន និរុជ្ឈតិ.

(ខ) យស្ស វា បន សមុទយសច្ចំ ន និរុជ្ឈតិ តស្ស ទុក្ខសច្ចំ នុប្បជ្ជតីតិ?

សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ សមុទយសច្ចំ ន និរុជ្ឈតិ, នោ ច តេសំ ទុក្ខសច្ចំ នុប្បជ្ជតិ. សព្ពេសំ ចវន្តានំ បវត្តេ តណ្ហាវិប្បយុត្តចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ សមុទយសច្ចញ្ច ន និរុជ្ឈតិ ទុក្ខសច្ចញ្ច នុប្បជ្ជតិ.

(ក) យស្ស ទុក្ខសច្ចំ នុប្បជ្ជតិ តស្ស មគ្គសច្ចំ ន និរុជ្ឈតីតិ?

មគ្គស្ស ភង្គក្ខណេ តេសំ ទុក្ខសច្ចំ នុប្បជ្ជតិ, នោ ច តេសំ មគ្គសច្ចំ ន និរុជ្ឈតិ. សព្ពេសំ ចវន្តានំ បវត្តេ មគ្គវិប្បយុត្តចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ ទុក្ខសច្ចញ្ច នុប្បជ្ជតិ មគ្គសច្ចញ្ច ន និរុជ្ឈតិ.

(ខ) យស្ស វា បន មគ្គសច្ចំ ន និរុជ្ឈតិ តស្ស ទុក្ខសច្ចំ នុប្បជ្ជតីតិ?

សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ មគ្គសច្ចំ ន និរុជ្ឈតិ, នោ ច តេសំ ទុក្ខសច្ចំ នុប្បជ្ជតិ. សព្ពេសំ ចវន្តានំ បវត្តេ មគ្គវិប្បយុត្តចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ មគ្គសច្ចញ្ច ន និរុជ្ឈតិ ទុក្ខសច្ចញ្ច នុប្បជ្ជតិ.

១៤១. (ក) យស្ស សមុទយសច្ចំ នុប្បជ្ជតិ តស្ស មគ្គសច្ចំ ន និរុជ្ឈតីតិ?

មគ្គស្ស ភង្គក្ខណេ តេសំ សមុទយសច្ចំ នុប្បជ្ជតិ, នោ ច តេសំ មគ្គសច្ចំ ន និរុជ្ឈតិ. តណ្ហាវិប្បយុត្តចិត្តស្ស ឧប្បាទក្ខណេ មគ្គវិប្បយុត្តចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ សមុទយសច្ចញ្ច នុប្បជ្ជតិ មគ្គសច្ចញ្ច ន និរុជ្ឈតិ.

(ខ) យស្ស វា បន មគ្គសច្ចំ ន និរុជ្ឈតិ តស្ស សមុទយសច្ចំ នុប្បជ្ជតីតិ?

តណ្ហាយ ឧប្បាទក្ខណេ តេសំ មគ្គសច្ចំ ន និរុជ្ឈតិ, នោ ច តេសំ សមុទយសច្ចំ នុប្បជ្ជតិ. មគ្គវិប្បយុត្តចិត្តស្ស ភង្គក្ខណេ តណ្ហាវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ មគ្គសច្ចញ្ច ន និរុជ្ឈតិ សមុទយសច្ចញ្ច នុប្បជ្ជតិ.

(ង) បច្ចនីកឱកាសោ

១៤២. យត្ថ ទុក្ខសច្ចំ នុប្បជ្ជតិ…បេ….

(ច) បច្ចនីកបុគ្គលោកាសា

១៤៣. យស្ស យត្ថ ទុក្ខសច្ចំ នុប្បជ្ជតិ…បេ….

(យស្សកម្បិ យស្សយត្ថកម្បិ សទិសំ, យស្សយត្ថកេបិ និរោធសមាបន្នានន្តិ ន កាតព្ពំ).