(៦) អតីតានាគតវារោ

(ក) អនុលោមបុគ្គលោ

១២៦. (ក) យស្ស ទុក្ខសច្ចំ និរុជ្ឈិត្ថ តស្ស សមុទយសច្ចំ និរុជ្ឈិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ ទុក្ខសច្ចំ និរុជ្ឈិត្ថ, នោ ច តេសំ សមុទយសច្ចំ និរុជ្ឈិស្សតិ. ឥតរេសំ តេសំ ទុក្ខសច្ចញ្ច និរុជ្ឈិត្ថ សមុទយសច្ចញ្ច និរុជ្ឈិស្សតិ.

(ខ) យស្ស វា បន…បេ…? អាមន្តា.

(ក) យស្ស ទុក្ខសច្ចំ និរុជ្ឈិត្ថ តស្ស មគ្គសច្ចំ និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ ទុក្ខសច្ចំ និរុជ្ឈិត្ថ, នោ ច តេសំ មគ្គសច្ចំ និរុជ្ឈិស្សតិ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ ទុក្ខសច្ចញ្ច និរុជ្ឈិត្ថ មគ្គសច្ចញ្ច និរុជ្ឈិស្សតិ.

(ខ) យស្ស វា បន…បេ…? អាមន្តា.

១២៧. (ក) យស្ស សមុទយសច្ចំ និរុជ្ឈិត្ថ តស្ស មគ្គសច្ចំ និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ សមុទយសច្ចំ និរុជ្ឈិត្ថ, នោ ច តេសំ មគ្គសច្ចំ និរុជ្ឈិស្សតិ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ សមុទយសច្ចញ្ច និរុជ្ឈិត្ថ មគ្គសច្ចញ្ច និរុជ្ឈិស្សតិ.

(ខ) យស្ស វា បន…បេ…? អាមន្តា.

(ខ) អនុលោមឱកាសោ

១២៨. យត្ថ ទុក្ខសច្ចំ និរុជ្ឈិត្ថ…បេ….

(គ) អនុលោមបុគ្គលោកាសា

១២៩. (ក) យស្ស យត្ថ ទុក្ខសច្ចំ និរុជ្ឈិត្ថ តស្ស តត្ថ សមុទយសច្ចំ និរុជ្ឈិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ អសញ្ញសត្តានំ តេសំ តត្ថ ទុក្ខសច្ចំ និរុជ្ឈិត្ថ, នោ ច តេសំ តត្ថ សមុទយសច្ចំ និរុជ្ឈិស្សតិ. ឥតរេសំ ចតុវោការានំ បញ្ចវោការានំ តេសំ តត្ថ ទុក្ខសច្ចញ្ច និរុជ្ឈិត្ថ សមុទយសច្ចញ្ច និរុជ្ឈិស្សតិ.

(ខ) យស្ស វា បន យត្ថ សមុទយសច្ចំ និរុជ្ឈិស្សតិ តស្ស តត្ថ ទុក្ខសច្ចំ និរុជ្ឈិត្ថាតិ?

សុទ្ធាវាសំ ឧបបជ្ជន្តានំ តេសំ តត្ថ សមុទយសច្ចំ និរុជ្ឈិស្សតិ, នោ ច តេសំ តត្ថ ទុក្ខសច្ចំ និរុជ្ឈិត្ថ. ឥតរេសំ ចតុវោការានំ បញ្ចវោការានំ តេសំ តត្ថ សមុទយសច្ចញ្ច និរុជ្ឈិស្សតិ ទុក្ខសច្ចញ្ច និរុជ្ឈិត្ថ.

(ក) យស្ស យត្ថ ទុក្ខសច្ចំ និរុជ្ឈិត្ថ តស្ស តត្ថ មគ្គសច្ចំ និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ អសញ្ញសត្តានំ តេសំ តត្ថ ទុក្ខសច្ចំ និរុជ្ឈិត្ថ, នោ ច តេសំ តត្ថ មគ្គសច្ចំ និរុជ្ឈិស្សតិ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ ទុក្ខសច្ចញ្ច និរុជ្ឈិត្ថ មគ្គសច្ចញ្ច និរុជ្ឈិស្សតិ.

(ខ) យស្ស វា បន យត្ថ មគ្គសច្ចំ និរុជ្ឈិស្សតិ តស្ស តត្ថ ទុក្ខសច្ចំ និរុជ្ឈិត្ថាតិ?

សុទ្ធាវាសំ ឧបបជ្ជន្តានំ តេសំ តត្ថ មគ្គសច្ចំ និរុជ្ឈិស្សតិ, នោ ច តេសំ តត្ថ ទុក្ខសច្ចំ និរុជ្ឈិត្ថ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ មគ្គសច្ចញ្ច និរុជ្ឈិស្សតិ ទុក្ខសច្ចញ្ច និរុជ្ឈិត្ថ.

១៣០. (ក) យស្ស យត្ថ សមុទយសច្ចំ និរុជ្ឈិត្ថ តស្ស តត្ថ មគ្គសច្ចំ និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ តេសំ តត្ថ សមុទយសច្ចំ និរុជ្ឈិត្ថ, នោ ច តេសំ តត្ថ មគ្គសច្ចំ និរុជ្ឈិស្សតិ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ សមុទយសច្ចញ្ច និរុជ្ឈិត្ថ មគ្គសច្ចញ្ច និរុជ្ឈិស្សតិ.

(ខ) យស្ស វា បន យត្ថ មគ្គសច្ចំ និរុជ្ឈិស្សតិ តស្ស តត្ថ សមុទយសច្ចំ និរុជ្ឈិត្ថាតិ.

សុទ្ធាវាសានំ ទុតិយេ ចិត្តេ វត្តមានេ តេសំ តត្ថ មគ្គសច្ចំ និរុជ្ឈិស្សតិ, នោ ច តេសំ តត្ថ សមុទយសច្ចំ និរុជ្ឈិត្ថ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ មគ្គសច្ចញ្ច និរុជ្ឈិស្សតិ សមុទយសច្ចញ្ច និរុជ្ឈិត្ថ.

(ឃ) បច្ចនីកបុគ្គលោ

១៣១. (ក) យស្ស ទុក្ខសច្ចំ ន និរុជ្ឈិត្ថ តស្ស សមុទយសច្ចំ ន និរុជ្ឈិស្សតីតិ? នត្ថិ.

(ខ) យស្ស វា បន សមុទយសច្ចំ ន និរុជ្ឈិស្សតិ តស្ស ទុក្ខសច្ចំ ន និរុជ្ឈិត្ថាតិ? និរុជ្ឈិត្ថ.

(ក) យស្ស ទុក្ខសច្ចំ ន និរុជ្ឈិត្ថ តស្ស មគ្គសច្ចំ ន និរុជ្ឈិស្សតីតិ? នត្ថិ.

(ខ) យស្ស វា បន មគ្គសច្ចំ ន និរុជ្ឈិស្សតិ តស្ស ទុក្ខសច្ចំ ន និរុជ្ឈិត្ថាតិ? និរុជ្ឈិត្ថ.

១៣២. (ក) យស្ស សមុទយសច្ចំ ន និរុជ្ឈិត្ថ តស្ស មគ្គសច្ចំ ន និរុជ្ឈិស្សតីតិ? នត្ថិ.

(ខ) យស្ស វា បន មគ្គសច្ចំ ន និរុជ្ឈិស្សតិ តស្ស សមុទយសច្ចំ ន និរុជ្ឈិត្ថាតិ? និរុជ្ឈិត្ថ.

(ង) បច្ចនីកឱកាសោ

១៣៣. យត្ថ ទុក្ខសច្ចំ ន និរុជ្ឈិត្ថ…បេ….

(ច) បច្ចនីកបុគ្គលោកាសា

១៣៤. (ក) យស្ស យត្ថ ទុក្ខសច្ចំ ន និរុជ្ឈិត្ថ តស្ស តត្ថ សមុទយសច្ចំ ន និរុជ្ឈិស្សតីតិ? និរុជ្ឈិស្សតិ.

(ខ) យស្ស វា បន យត្ថ សមុទយសច្ចំ ន និរុជ្ឈិស្សតិ តស្ស តត្ថ ទុក្ខសច្ចំ ន និរុជ្ឈិត្ថាតិ? និរុជ្ឈិត្ថ.

(ក) យស្ស យត្ថ ទុក្ខសច្ចំ ន និរុជ្ឈិត្ថ តស្ស តត្ថ មគ្គសច្ចំ ន និរុជ្ឈិស្សតីតិ? និរុជ្ឈិស្សតិ.

(ខ) យស្ស វា បន យត្ថ មគ្គសច្ចំ ន និរុជ្ឈិស្សតិ តស្ស តត្ថ ទុក្ខសច្ចំ ន និរុជ្ឈិត្ថាតិ? និរុជ្ឈិត្ថ.

១៣៥. (ក) យស្ស យត្ថ សមុទយសច្ចំ ន និរុជ្ឈិត្ថ តស្ស តត្ថ មគ្គសច្ចំ ន និរុជ្ឈិស្សតីតិ?

សុទ្ធាវាសានំ ទុតិយេ ចិត្តេ វត្តមានេ តេសំ តត្ថ សមុទយសច្ចំ ន និរុជ្ឈិត្ថ, នោ ច តេសំ តត្ថ មគ្គសច្ចំ ន និរុជ្ឈិស្សតិ. អសញ្ញសត្តានំ តេសំ តត្ថ សមុទយសច្ចញ្ច ន និរុជ្ឈិត្ថ មគ្គសច្ចញ្ច ន និរុជ្ឈិស្សតិ.

(ខ) យស្ស វា បន យត្ថ មគ្គសច្ចំ ន និរុជ្ឈិស្សតិ តស្ស តត្ថ សមុទយសច្ចំ ន និរុជ្ឈិត្ថាតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ តេសំ តត្ថ មគ្គសច្ចំ ន និរុជ្ឈិស្សតិ, នោ ច តេសំ តត្ថ សមុទយសច្ចំ ន និរុជ្ឈិត្ថ. អសញ្ញសត្តានំ តេសំ តត្ថ មគ្គសច្ចញ្ច ន និរុជ្ឈិស្សតិ សមុទយសច្ចញ្ច ន និរុជ្ឈិត្ថ.

និរោធវារោ.