(១) បច្ចុប្បន្នវារោ

(ក) អនុលោមបុគ្គលោ

៨៨. (ក) យស្ស ទុក្ខសច្ចំ និរុជ្ឈតិ តស្ស សមុទយសច្ចំ និរុជ្ឈតីតិ?

សព្ពេសំ ចវន្តានំ បវត្តេ តណ្ហាវិប្បយុត្តចិត្តស្ស ភង្គក្ខណេ តេសំ ទុក្ខសច្ចំ និរុជ្ឈតិ, នោ ច តេសំ សមុទយសច្ចំ និរុជ្ឈតិ. តណ្ហាយ ភង្គក្ខណេ តេសំ ទុក្ខសច្ចញ្ច និរុជ្ឈតិ សមុទយសច្ចញ្ច និរុជ្ឈតិ.

(ខ) យស្ស វា បន សមុទយសច្ចំ និរុជ្ឈតិ តស្ស ទុក្ខសច្ចំ និរុជ្ឈតីតិ? អាមន្តា.

(ក) យស្ស ទុក្ខសច្ចំ និរុជ្ឈតិ តស្ស មគ្គសច្ចំ និរុជ្ឈតីតិ?

សព្ពេសំ ចវន្តានំ បវត្តេ មគ្គវិប្បយុត្តចិត្តស្ស ភង្គក្ខណេ តេសំ ទុក្ខសច្ចំ និរុជ្ឈតិ, នោ ច តេសំ មគ្គសច្ចំ និរុជ្ឈតិ. បញ្ចវោការេ មគ្គស្ស ភង្គក្ខណេ តេសំ ទុក្ខសច្ចញ្ច និរុជ្ឈតិ មគ្គសច្ចញ្ច និរុជ្ឈតិ.

(ខ) យស្ស វា បន មគ្គសច្ចំ និរុជ្ឈតិ តស្ស ទុក្ខសច្ចំ និរុជ្ឈតីតិ?

អរូបេ មគ្គស្ស ភង្គក្ខណេ តេសំ មគ្គសច្ចំ និរុជ្ឈតិ, នោ ច តេសំ ទុក្ខសច្ចំ និរុជ្ឈតិ. បញ្ចវោការេ មគ្គស្ស ភង្គក្ខណេ តេសំ មគ្គសច្ចញ្ច និរុជ្ឈតិ ទុក្ខសច្ចញ្ច និរុជ្ឈតិ.

៨៩. (ក) យស្ស សមុទយសច្ចំ និរុជ្ឈតិ តស្ស មគ្គសច្ចំ និរុជ្ឈតីតិ? នោ.

(ខ) យស្ស វា បន មគ្គសច្ចំ និរុជ្ឈតិ តស្ស សមុទយសច្ចំ និរុជ្ឈតីតិ? នោ.

(ខ) អនុលោមឱកាសោ

៩០. យត្ថ ទុក្ខសច្ចំ និរុជ្ឈតិ តត្ថ សមុទយសច្ចំ និរុជ្ឈតីតិ?

អសញ្ញសត្តេ តត្ថ ទុក្ខសច្ចំ និរុជ្ឈតិ…បេ….

(យត្ថកំ ឧប្បាទេបិ និរោធេបិ ឧប្បាទនិរោធេបិ សទិសំ, នត្ថិ នានាករណំ).

(គ) អនុលោមបុគ្គលោកាសា

៩១. យស្ស យត្ថ ទុក្ខសច្ចំ និរុជ្ឈតិ…បេ….

(យស្សយត្ថកម្បិ សទិសំ វិត្ថារេតព្ពំ).

(ឃ) បច្ចនីកបុគ្គលោ

៩២. (ក) យស្ស ទុក្ខសច្ចំ ន និរុជ្ឈតិ តស្ស សមុទយសច្ចំ ន និរុជ្ឈតីតិ? អាមន្តា.

(ខ) យស្ស វា បន សមុទយសច្ចំ ន និរុជ្ឈតិ តស្ស ទុក្ខសច្ចំ ន និរុជ្ឈតីតិ?

សព្ពេសំ ចវន្តានំ បវត្តេ តណ្ហាវិប្បយុត្តចិត្តស្ស ភង្គក្ខណេ តេសំ សមុទយសច្ចំ ន និរុជ្ឈតិ, នោ ច តេសំ ទុក្ខសច្ចំ ន និរុជ្ឈតិ. សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ សមុទយសច្ចញ្ច ន និរុជ្ឈតិ ទុក្ខសច្ចញ្ច ន និរុជ្ឈតិ.

(ក) យស្ស ទុក្ខសច្ចំ ន និរុជ្ឈតិ តស្ស មគ្គសច្ចំ ន និរុជ្ឈតីតិ?

អរូបេ មគ្គស្ស ភង្គក្ខណេ តេសំ ទុក្ខសច្ចំ ន និរុជ្ឈតិ, នោ ច តេសំ មគ្គសច្ចំ ន និរុជ្ឈតិ. សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ ផលស្ស ភង្គក្ខណេ តេសំ ទុក្ខសច្ចញ្ច ន និរុជ្ឈតិ មគ្គសច្ចញ្ច ន និរុជ្ឈតិ.

(ខ) យស្ស វា បន មគ្គសច្ចំ ន និរុជ្ឈតិ តស្ស ទុក្ខសច្ចំ ន និរុជ្ឈតីតិ?

សព្ពេសំ ចវន្តានំ បវត្តេ មគ្គវិប្បយុត្តចិត្តស្ស ភង្គក្ខណេ តេសំ មគ្គសច្ចំ ន និរុជ្ឈតិ, នោ ច តេសំ ទុក្ខសច្ចំ ន និរុជ្ឈតិ. សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ ផលស្ស ភង្គក្ខណេ តេសំ មគ្គសច្ចញ្ច ន និរុជ្ឈតិ ទុក្ខសច្ចញ្ច ន និរុជ្ឈតិ.

៩៣. (ក) យស្ស សមុទយសច្ចំ ន និរុជ្ឈតិ តស្ស មគ្គសច្ចំ ន និរុជ្ឈតីតិ?

មគ្គស្ស ភង្គក្ខណេ តេសំ សមុទយសច្ចំ ន និរុជ្ឈតិ, នោ ច តេសំ មគ្គសច្ចំ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ តណ្ហាវិប្បយុត្តមគ្គវិប្បយុត្តចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ សមុទយសច្ចញ្ច ន និរុជ្ឈតិ មគ្គសច្ចញ្ច ន និរុជ្ឈតិ.

(ខ) យស្ស វា បន មគ្គសច្ចំ ន និរុជ្ឈតិ តស្ស សមុទយសច្ចំ ន និរុជ្ឈតីតិ?

តណ្ហាយ ភង្គក្ខណេ តេសំ មគ្គសច្ចំ ន និរុជ្ឈតិ, នោ ច តេសំ សមុទយសច្ចំ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ មគ្គវិប្បយុត្តតណ្ហាវិប្បយុត្តចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ មគ្គសច្ចញ្ច ន និរុជ្ឈតិ សមុទយសច្ចញ្ច ន និរុជ្ឈតិ.

(ង) បច្ចនីកឱកាសោ

៩៤. យត្ថ ទុក្ខសច្ចំ ន និរុជ្ឈតិ…បេ….

(ច) បច្ចនីកបុគ្គលោកាសា

៩៥. យស្ស យត្ថ ទុក្ខសច្ចំ ន និរុជ្ឈតិ…បេ….

(យស្សកម្បិ [យស្សកម្បិ យត្ថកម្បិ (សី. ស្យា.)] យស្សយត្ថកម្បិ សទិសំ, យស្សយត្ថកេបិ និរោធសមាបន្នានន្តិ ចេតំ ន កាតព្ពំ).