(៦) អតីតានាគតវារោ

(ក) អនុលោមបុគ្គលោ

៧៨. (ក) យស្ស ទុក្ខសច្ចំ ឧប្បជ្ជិត្ថ តស្ស សមុទយសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ ទុក្ខសច្ចំ ឧប្បជ្ជិត្ថ, នោ ច តេសំ សមុទយសច្ចំ ឧប្បជ្ជិស្សតិ. ឥតរេសំ តេសំ ទុក្ខសច្ចញ្ច ឧប្បជ្ជិត្ថ សមុទយសច្ចញ្ច ឧប្បជ្ជិស្សតិ.

(ខ) យស្ស វា បន សមុទយសច្ចំ ឧប្បជ្ជិស្សតិ តស្ស ទុក្ខសច្ចំ ឧប្បជ្ជិត្ថាតិ? អាមន្តា.

(ក) យស្ស ទុក្ខសច្ចំ ឧប្បជ្ជិត្ថ តស្ស មគ្គសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ ទុក្ខសច្ចំ ឧប្បជ្ជិត្ថ, នោ ច តេសំ មគ្គសច្ចំ ឧប្បជ្ជិស្សតិ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ ទុក្ខសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន…បេ…? អាមន្តា.

៧៩. (ក) យស្ស សមុទយសច្ចំ ឧប្បជ្ជិត្ថ តស្ស មគ្គសច្ចំ ឧប្បជ្ជិស្សតីតិ? អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ សមុទយសច្ចំ ឧប្បជ្ជិត្ថ, នោ ច តេសំ មគ្គសច្ចំ ឧប្បជ្ជិស្សតិ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ, យេ ចញ្ញេ មគ្គំ បដិលភិស្សន្តិ តេសំ សមុទយសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន…បេ…? អាមន្តា.

(ខ) អនុលោមឱកាសោ

៨០. យត្ថ ទុក្ខសច្ចំ ឧប្បជ្ជិត្ថ…បេ….

(គ) អនុលោមបុគ្គលោកាសា

៨១. (ក) យស្ស យត្ថ ទុក្ខសច្ចំ ឧប្បជ្ជិត្ថ តស្ស តត្ថ សមុទយសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ អសញ្ញសត្តានំ តេសំ តត្ថ ទុក្ខសច្ចំ ឧប្បជ្ជិត្ថ, នោ ច តេសំ តត្ថ សមុទយសច្ចំ ឧប្បជ្ជិស្សតិ. ឥតរេសំ ចតុវោការានំ បញ្ចវោការានំ តេសំ តត្ថ ទុក្ខសច្ចញ្ច ឧប្បជ្ជិត្ថ សមុទយសច្ចញ្ច ឧប្បជ្ជិស្សតិ.

(ខ) យស្ស វា បន យត្ថ សមុទយសច្ចំ ឧប្បជ្ជិស្សតិ តស្ស តត្ថ ទុក្ខសច្ចំ ឧប្បជ្ជិត្ថាតិ?

សុទ្ធាវាសំ ឧបបជ្ជន្តានំ តេសំ តត្ថ សមុទយសច្ចំ ឧប្បជ្ជិស្សតិ, នោ ច តេសំ តត្ថ ទុក្ខសច្ចំ ឧប្បជ្ជិត្ថ. ឥតរេសំ ចតុវោការានំ បញ្ចវោការានំ តេសំ តត្ថ សមុទយសច្ចញ្ច ឧប្បជ្ជិស្សតិ ទុក្ខសច្ចញ្ច ឧប្បជ្ជិត្ថ.

(ក) យស្ស យត្ថ ទុក្ខសច្ចំ ឧប្បជ្ជិត្ថ តស្ស តត្ថ មគ្គសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ អសញ្ញសត្តានំ តេសំ តត្ថ ទុក្ខសច្ចំ ឧប្បជ្ជិត្ថ, នោ ច តេសំ តត្ថ មគ្គសច្ចំ ឧប្បជ្ជិស្សតិ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ ទុក្ខសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន យត្ថ មគ្គសច្ចំ ឧប្បជ្ជិស្សតិ តស្ស តត្ថ ទុក្ខសច្ចំ ឧប្បជ្ជិត្ថាតិ?

សុទ្ធាវាសំ ឧបបជ្ជន្តានំ តេសំ តត្ថ មគ្គសច្ចំ ឧប្បជ្ជិស្សតិ, នោ ច តេសំ តត្ថ ទុក្ខសច្ចំ ឧប្បជ្ជិត្ថ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ មគ្គសច្ចញ្ច ឧប្បជ្ជិស្សតិ ទុក្ខសច្ចញ្ច ឧប្បជ្ជិត្ថ.

៨២. (ក) យស្ស យត្ថ សមុទយសច្ចំ ឧប្បជ្ជិត្ថ តស្ស តត្ថ មគ្គសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ តេសំ តត្ថ សមុទយសច្ចំ ឧប្បជ្ជិត្ថ, នោ ច តេសំ តត្ថ មគ្គសច្ចំ ឧប្បជ្ជិស្សតិ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ សមុទយសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន យត្ថ មគ្គសច្ចំ ឧប្បជ្ជិស្សតិ តស្ស តត្ថ សមុទយសច្ចំ ឧប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ តេសំ តត្ថ មគ្គសច្ចំ ឧប្បជ្ជិស្សតិ, នោ ច តេសំ តត្ថ សមុទយសច្ចំ ឧប្បជ្ជិត្ថ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ តត្ថ មគ្គសច្ចញ្ច ឧប្បជ្ជិស្សតិ សមុទយសច្ចញ្ច ឧប្បជ្ជិត្ថ.

(ឃ) បច្ចនីកបុគ្គលោ

៨៣. (ក) យស្ស ទុក្ខសច្ចំ នុប្បជ្ជិត្ថ តស្ស សមុទយសច្ចំ នុប្បជ្ជិស្សតីតិ? នត្ថិ.

(ខ) យស្ស វា បន សមុទយសច្ចំ នុប្បជ្ជិស្សតិ តស្ស ទុក្ខសច្ចំ នុប្បជ្ជិត្ថាតិ? ឧប្បជ្ជិត្ថ.

(ក) យស្ស ទុក្ខសច្ចំ នុប្បជ្ជិត្ថ តស្ស មគ្គសច្ចំ នុប្បជ្ជិស្សតីតិ? នត្ថិ.

(ខ) យស្ស វា បន មគ្គសច្ចំ នុប្បជ្ជិស្សតិ តស្ស ទុក្ខសច្ចំ នុប្បជ្ជិត្ថាតិ? ឧប្បជ្ជិត្ថ.

៨៤. (ក) យស្ស សមុទយសច្ចំ នុប្បជ្ជិត្ថ តស្ស មគ្គសច្ចំ នុប្បជ្ជិស្សតីតិ? នត្ថិ.

(ខ) យស្ស វា បន មគ្គសច្ចំ នុប្បជ្ជិស្សតិ តស្ស សមុទយសច្ចំ នុប្បជ្ជិត្ថាតិ? ឧប្បជ្ជិត្ថ.

(ង) បច្ចនីកឱកាសោ

៨៥. យត្ថ ទុក្ខសច្ចំ នុប្បជ្ជិត្ថ…បេ….

(ច) បច្ចនីកបុគ្គលោកាសា

៨៦. (ក) យស្ស យត្ថ ទុក្ខសច្ចំ នុប្បជ្ជិត្ថ តស្ស តត្ថ សមុទយសច្ចំ នុប្បជ្ជិស្សតីតិ? ឧប្បជ្ជិស្សតិ.

(ខ) យស្ស វា បន យត្ថ សមុទយសច្ចំ នុប្បជ្ជិស្សតិ តស្ស តត្ថ ទុក្ខសច្ចំ នុប្បជ្ជិត្ថាតិ? ឧប្បជ្ជិត្ថ.

(ក) យស្ស យត្ថ ទុក្ខសច្ចំ នុប្បជ្ជិត្ថ តស្ស តត្ថ មគ្គសច្ចំ នុប្បជ្ជិស្សតីតិ? ឧប្បជ្ជិស្សតិ.

(ខ) យស្ស វា បន យត្ថ មគ្គសច្ចំ នុប្បជ្ជិស្សតិ តស្ស តត្ថ ទុក្ខសច្ចំ នុប្បជ្ជិត្ថាតិ? ឧប្បជ្ជិត្ថ.

៨៧. (ក) យស្ស យត្ថ សមុទយសច្ចំ នុប្បជ្ជិត្ថ តស្ស តត្ថ មគ្គសច្ចំ នុប្បជ្ជិស្សតីតិ?

សុទ្ធាវាសានំ ទុតិយេ ចិត្តេ វត្តមានេ តេសំ តត្ថ សមុទយសច្ចំ នុប្បជ្ជិត្ថ, នោ ច តេសំ តត្ថ មគ្គសច្ចំ នុប្បជ្ជិស្សតិ. អសញ្ញសត្តានំ តេសំ តត្ថ សមុទយសច្ចញ្ច នុប្បជ្ជិត្ថ មគ្គសច្ចញ្ច នុប្បជ្ជិស្សតិ.

(ខ) យស្ស វា បន យត្ថ មគ្គសច្ចំ នុប្បជ្ជិស្សតិ តស្ស តត្ថ សមុទយសច្ចំ នុប្បជ្ជិត្ថាតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ តេសំ តត្ថ មគ្គសច្ចំ នុប្បជ្ជិស្សតិ, នោ ច តេសំ តត្ថ សមុទយសច្ចំ នុប្បជ្ជិត្ថ. អសញ្ញសត្តានំ តេសំ តត្ថ មគ្គសច្ចញ្ច នុប្បជ្ជិស្សតិ សមុទយសច្ចញ្ច នុប្បជ្ជិត្ថ.

ឧប្បាទវារោ.