(៥) បច្ចុប្បន្នានាគតវារោ

(ក) អនុលោមបុគ្គលោ

១៦៦. (ក) យស្ស ចក្ខាយតនំ និរុជ្ឈតិ តស្ស សោតាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ ចក្ខាយតនំ និរុជ្ឈតិ, នោ ច តេសំ សោតាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ ចក្ខាយតនញ្ច និរុជ្ឈតិ សោតាយតនញ្ច និរុជ្ឈិស្សតិ.

(ខ) យស្ស វា បន សោតាយតនំ និរុជ្ឈិស្សតិ តស្ស ចក្ខាយតនំ និរុជ្ឈតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ សោតាយតនំ និរុជ្ឈិស្សតិ, នោ ច តេសំ ចក្ខាយតនំ និរុជ្ឈតិ. សចក្ខុកានំ ចវន្តានំ តេសំ សោតាយតនញ្ច និរុជ្ឈិស្សតិ ចក្ខាយតនញ្ច និរុជ្ឈតិ.

(ក) យស្ស ចក្ខាយតនំ និរុជ្ឈតិ តស្ស ឃានាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ យេ ច រូបាវចរំ អរូបាវចរំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ ចក្ខាយតនំ និរុជ្ឈតិ, នោ ច តេសំ ឃានាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ ចក្ខាយតនញ្ច និរុជ្ឈតិ ឃានាយតនញ្ច និរុជ្ឈិស្សតិ.

(ខ) យស្ស វា បន ឃានាយតនំ…បេ….

(ក) យស្ស ចក្ខាយតនំ និរុជ្ឈតិ តស្ស រូបាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ ចក្ខាយតនំ និរុជ្ឈតិ, នោ ច តេសំ រូបាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ ចក្ខាយតនញ្ច និរុជ្ឈតិ រូបាយតនញ្ច និរុជ្ឈិស្សតិ.

(ខ) យស្ស វា បន រូបាយតនំ…បេ….

យស្ស ចក្ខាយតនំ និរុជ្ឈតិ តស្ស មនាយតនំ…បេ… ធម្មាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ ចក្ខាយតនំ និរុជ្ឈតិ, នោ ច តេសំ ធម្មាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ ចក្ខាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

យស្ស វា បន ធម្មាយតនំ និរុជ្ឈិស្សតិ តស្ស ចក្ខាយតនំ និរុជ្ឈតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ…បេ… សចក្ខុកានំ ចវន្តានំ តេសំ…បេ….

១៦៧. (ក) យស្ស ឃានាយតនំ និរុជ្ឈតិ តស្ស រូបាយតនំ និរុជ្ឈិស្សតីតិ?

កាមាវចរេ បរិនិព្ពន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ ឃានាយតនំ និរុជ្ឈតិ, នោ ច តេសំ រូបាយតនំ និរុជ្ឈិស្សតិ. ឥតរេសំ សឃានកានំ ចវន្តានំ តេសំ ឃានាយតនញ្ច និរុជ្ឈតិ រូបាយតនញ្ច និរុជ្ឈិស្សតិ.

(ខ) យស្ស វា បន រូបាយតនំ និរុជ្ឈិស្សតិ តស្ស ឃានាយតនំ និរុជ្ឈតីតិ?

សព្ពេសំ ឧបបជ្ជន្តានំ អឃានកានំ ចវន្តានំ តេសំ រូបាយតនំ និរុជ្ឈិស្សតិ, នោ ច តេសំ ឃានាយតនំ និរុជ្ឈតិ. សឃានកានំ ចវន្តានំ តេសំ រូបាយតនញ្ច និរុជ្ឈិស្សតិ ឃានាយតនញ្ច និរុជ្ឈតិ.

យស្ស ឃានាយតនំ និរុជ្ឈតិ តស្ស មនាយតនំ…បេ… ធម្មាយតនំ និរុជ្ឈិស្សតីតិ?

កាមាវចរេ បរិនិព្ពន្តានំ តេសំ ឃានាយតនំ និរុជ្ឈតិ, នោ ច តេសំ ធម្មាយតនំ និរុជ្ឈិស្សតិ. ឥតរេសំ សឃានកានំ ចវន្តានំ តេសំ ឃានាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

យស្ស វា បន ធម្មាយតនំ…បេ….

១៦៨. យស្ស រូបាយតនំ និរុជ្ឈតិ តស្ស មនាយតនំ…បេ… ធម្មាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ រូបាយតនំ និរុជ្ឈតិ, នោ ច តេសំ ធម្មាយតនំ និរុជ្ឈិស្សតិ. ឥតរេសំ សរូបកានំ ចវន្តានំ តេសំ រូបាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

យស្ស វា បន ធម្មាយតនំ និរុជ្ឈិស្សតិ តស្ស រូបាយតនំ និរុជ្ឈតីតិ?

សព្ពេសំ ឧបបជ្ជន្តានំ អរូបកានំ ចវន្តានំ តេសំ ធម្មាយតនំ និរុជ្ឈិស្សតិ, នោ ច តេសំ រូបាយតនំ និរុជ្ឈតិ. សរូបកានំ ចវន្តានំ តេសំ ធម្មាយតនញ្ច និរុជ្ឈិស្សតិ រូបាយតនញ្ច និរុជ្ឈតិ.

១៦៩. (ក) យស្ស មនាយតនំ និរុជ្ឈតិ តស្ស ធម្មាយតនំ និរុជ្ឈិស្សតីតិ?

បរិនិព្ពន្តានំ តេសំ មនាយតនំ និរុជ្ឈតិ, នោ ច តេសំ ធម្មាយតនំ និរុជ្ឈិស្សតិ. ឥតរេសំ សចិត្តកានំ ចវន្តានំ តេសំ មនាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

(ខ) យស្ស វា បន ធម្មាយតនំ និរុជ្ឈិស្សតិ តស្ស មនាយតនំ និរុជ្ឈតីតិ?

សព្ពេសំ ឧបបជ្ជន្តានំ អចិត្តកានំ ចវន្តានំ តេសំ ធម្មាយតនំ និរុជ្ឈិស្សតិ, នោ ច តេសំ មនាយតនំ និរុជ្ឈតិ. សចិត្តកានំ ចវន្តានំ តេសំ ធម្មាយតនញ្ច និរុជ្ឈិស្សតិ មនាយតនញ្ច និរុជ្ឈតិ.

(ខ) អនុលោមឱកាសោ

១៧០. យត្ថ ចក្ខាយតនំ និរុជ្ឈតិ…បេ….

(គ) អនុលោមបុគ្គលោកាសា

១៧១. (ក) យស្ស យត្ថ ចក្ខាយតនំ និរុជ្ឈតិ តស្ស តត្ថ សោតាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ តត្ថ ចក្ខាយតនំ និរុជ្ឈតិ, នោ ច តេសំ តត្ថ សោតាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ តត្ថ ចក្ខាយតនញ្ច និរុជ្ឈតិ សោតាយតនញ្ច និរុជ្ឈិស្សតិ.

(ខ) យស្ស វា បន យត្ថ សោតាយតនំ និរុជ្ឈិស្សតិ តស្ស តត្ថ ចក្ខាយតនំ និរុជ្ឈតីតិ?

បញ្ចវោការំ ឧបបជ្ជន្តានំ អចក្ខុកានំ កាមាវចរា ចវន្តានំ តេសំ តត្ថ សោតាយតនំ និរុជ្ឈិស្សតិ, នោ ច តេសំ តត្ថ ចក្ខាយតនំ និរុជ្ឈតិ. សចក្ខុកានំ ចវន្តានំ តេសំ តត្ថ សោតាយតនញ្ច និរុជ្ឈិស្សតិ ចក្ខាយតនញ្ច និរុជ្ឈតិ.

(ក) យស្ស យត្ថ ចក្ខាយតនំ និរុជ្ឈតិ តស្ស តត្ថ ឃានាយតនំ និរុជ្ឈិស្សតីតិ?

កាមាវចរេ បរិនិព្ពន្តានំ រូបាវចរា ចវន្តានំ តេសំ តត្ថ ចក្ខាយតនំ និរុជ្ឈតិ, នោ ច តេសំ តត្ថ ឃានាយតនំ និរុជ្ឈិស្សតិ. ឥតរេសំ សចក្ខុកានំ កាមាវចរា ចវន្តានំ តេសំ តត្ថ ចក្ខាយតនញ្ច និរុជ្ឈតិ ឃានាយតនញ្ច និរុជ្ឈិស្សតិ.

(ខ) យស្ស វា បន យត្ថ ឃានាយតនំ…បេ… (យថា បច្ចុប្បន្នាតីតេបិ តិវិធំ វិត្ថារិតំ ឯវំ ឥទម្បិ វិត្ថារេតព្ពំ).

(ក) យស្ស យត្ថ ចក្ខាយតនំ និរុជ្ឈតិ តស្ស តត្ថ រូបាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ តត្ថ ចក្ខាយតនំ និរុជ្ឈតិ, នោ ច តេសំ តត្ថ រូបាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ តត្ថ ចក្ខាយតនញ្ច និរុជ្ឈតិ រូបាយតនញ្ច និរុជ្ឈិស្សតិ.

(ខ) យស្ស វា បន យត្ថ រូបាយតនំ…បេ….

(ក) យស្ស យត្ថ ចក្ខាយតនំ និរុជ្ឈតិ តស្ស តត្ថ មនាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ តត្ថ ចក្ខាយតនំ និរុជ្ឈតិ, នោ ច តេសំ តត្ថ មនាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ តត្ថ ចក្ខាយតនញ្ច និរុជ្ឈតិ មនាយតនញ្ច និរុជ្ឈិស្សតិ.

(ខ) យស្ស វា បន យត្ថ មនាយតនំ…បេ….

(ក) យស្ស យត្ថ ចក្ខាយតនំ និរុជ្ឈតិ តស្ស តត្ថ ធម្មាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ តត្ថ ចក្ខាយតនំ និរុជ្ឈតិ, នោ ច តេសំ តត្ថ ធម្មាយតនំ និរុជ្ឈិស្សតិ. ឥតរេសំ សចក្ខុកានំ ចវន្តានំ តេសំ តត្ថ ចក្ខាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

(ខ) យស្ស វា បន យត្ថ ធម្មាយតនំ និរុជ្ឈិស្សតិ តស្ស តត្ថ ចក្ខាយតនំ និរុជ្ឈតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ តត្ថ ធម្មាយតនំ និរុជ្ឈិស្សតិ, នោ ច តេសំ តត្ថ ចក្ខាយតនំ និរុជ្ឈតិ. សចក្ខុកានំ ចវន្តានំ តេសំ តត្ថ ធម្មាយតនញ្ច និរុជ្ឈិស្សតិ ចក្ខាយតនញ្ច និរុជ្ឈតិ. (ចក្ខាយតនមូលកំ)

១៧២. (ក) យស្ស យត្ថ ឃានាយតនំ និរុជ្ឈតិ តស្ស តត្ថ រូបាយតនំ និរុជ្ឈិស្សតីតិ?

កាមាវចរេ បរិនិព្ពន្តានំ តេសំ តត្ថ ឃានាយតនំ និរុជ្ឈតិ, នោ ច តេសំ តត្ថ រូបាយតនំ និរុជ្ឈិស្សតិ. ឥតរេសំ សឃានកានំ ចវន្តានំ តេសំ តត្ថ ឃានាយតនញ្ច និរុជ្ឈតិ រូបាយតនញ្ច និរុជ្ឈិស្សតិ.

(ខ) យស្ស វា បន យត្ថ រូបាយតនំ និរុជ្ឈិស្សតិ តស្ស តត្ថ ឃានាយតនំ និរុជ្ឈតីតិ? កាមាវចរេ បរិនិព្ពាន្តានំ តេសំ តត្ថ…បេ….

កាមាវចរំ ឧបបជ្ជន្តានំ អឃានកានំ កាមាវចរា ចវន្តានំ រូបាវចរានំ តេសំ តត្ថ…បេ….

យស្ស យត្ថ ឃានាយតនំ និរុជ្ឈតិ តស្ស តត្ថ មនាយតនំ…បេ… ធម្មាយតនំ និរុជ្ឈិស្សតីតិ?

កាមាវចរេ បរិនិព្ពន្តានំ តេសំ តត្ថ ឃានាយតនំ និរុជ្ឈតិ, នោ ច តេសំ តត្ថ ធម្មាយតនំ និរុជ្ឈិស្សតិ. ឥតរេសំ សឃានកានំ ចវន្តានំ តេសំ តត្ថ ឃានាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

យស្ស វា បន យត្ថ ធម្មាយតនំ…បេ….

១៧៣. (ក) យស្ស យត្ថ រូបាយតនំ និរុជ្ឈតិ តស្ស តត្ថ មនាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ អសញ្ញសត្តា ចវន្តានំ តេសំ តត្ថ រូបាយតនំ និរុជ្ឈតិ, នោ ច តេសំ តត្ថ មនាយតនំ និរុជ្ឈិស្សតិ. ឥតរេសំ បញ្ចវោការា ចវន្តានំ តេសំ តត្ថ រូបាយតនញ្ច និរុជ្ឈតិ មនាយតនញ្ច និរុជ្ឈិស្សតិ.

(ខ) យស្ស វា បន យត្ថ មនាយតនំ…បេ….

(ក) យស្ស យត្ថ រូបាយតនំ និរុជ្ឈតិ តស្ស តត្ថ ធម្មាយតនំ និរុជ្ឈិស្សតីតិ?

បញ្ចវោការេ បរិនិព្ពន្តានំ តេសំ តត្ថ រូបាយតនំ និរុជ្ឈតិ, នោ ច តេសំ តត្ថ ធម្មាយតនំ និរុជ្ឈិស្សតិ. ឥតរេសំ សរូបកានំ ចវន្តានំ តេសំ តត្ថ រូបាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

(ខ) យស្ស វា បន យត្ថ ធម្មាយតនំ និរុជ្ឈិស្សតិ តស្ស តត្ថ រូបាយតនំ និរុជ្ឈតីតិ?

សព្ពេសំ ឧបបជ្ជន្តានំ អរូបកានំ ចវន្តានំ តេសំ តត្ថ ធម្មាយតនំ និរុជ្ឈិស្សតិ, នោ ច តេសំ តត្ថ រូបាយតនំ និរុជ្ឈតិ. សរូបកានំ ចវន្តានំ តេសំ តត្ថ ធម្មាយតនញ្ច និរុជ្ឈិស្សតិ រូបាយតនញ្ច និរុជ្ឈតិ.

១៧៤. (ក) យស្ស យត្ថ មនាយតនំ និរុជ្ឈតិ តស្ស តត្ថ ធម្មាយតនំ និរុជ្ឈិស្សតីតិ?

បរិនិព្ពន្តានំ តេសំ តត្ថ មនាយតនំ និរុជ្ឈតិ, នោ ច តេសំ តត្ថ ធម្មាយតនំ និរុជ្ឈិស្សតិ. ឥតរេសំ សចិត្តកានំ ចវន្តានំ តេសំ តត្ថ មនាយតនញ្ច និរុជ្ឈតិ ធម្មាយតនញ្ច និរុជ្ឈិស្សតិ.

(ខ) យស្ស វា បន យត្ថ ធម្មាយតនំ និរុជ្ឈិស្សតិ តស្ស តត្ថ មនាយតនំ និរុជ្ឈតីតិ?

សព្ពេសំ ឧបបជ្ជន្តានំ អចិត្តកានំ ចវន្តានំ តេសំ តត្ថ ធម្មាយតនំ និរុជ្ឈិស្សតិ, នោ ច តេសំ តត្ថ មនាយតនំ និរុជ្ឈតិ. សចិត្តកានំ ចវន្តានំ តេសំ តត្ថ ធម្មាយតនញ្ច និរុជ្ឈិស្សតិ មនាយតនញ្ច និរុជ្ឈតិ.

(ឃ) បច្ចនីកបុគ្គលោ

១៧៥. (ក) យស្ស ចក្ខាយតនំ ន និរុជ្ឈតិ តស្ស សោតាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ ចក្ខាយតនំ ន និរុជ្ឈតិ, នោ ច តេសំ សោតាយតនំ ន និរុជ្ឈិស្សតិ. អរូបេ បច្ឆិមភវិកានំ តេសំ ចក្ខាយតនញ្ច ន និរុជ្ឈតិ សោតាយតនញ្ច ន និរុជ្ឈិស្សតិ.

(ខ) យស្ស វា បន សោតាយតនំ ន និរុជ្ឈិស្សតិ តស្ស ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ សោតាយតនំ ន និរុជ្ឈិស្សតិ, នោ ច តេសំ ចក្ខាយតនំ ន និរុជ្ឈតិ. អរូបេ បច្ឆិមភវិកានំ តេសំ សោតាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

(ក) យស្ស ចក្ខាយតនំ ន និរុជ្ឈតិ តស្ស ឃានាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ ចក្ខាយតនំ ន និរុជ្ឈតិ, នោ ច តេសំ ឃានាយតនំ ន និរុជ្ឈិស្សតិ. បច្ឆិមភវិកានំ រូបាវចរំ ឧបបជ្ជន្តានំ អរូបេ បច្ឆិមភវិកានំ តេសំ ចក្ខាយតនញ្ច ន និរុជ្ឈតិ ឃានាយតនញ្ច ន និរុជ្ឈិស្សតិ.

(ខ) យស្ស វា បន ឃានាយតនំ ន និរុជ្ឈិស្សតិ តស្ស ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ យេ ច រូបាវចរំ អរូបាវចរំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ ឃានាយតនំ ន និរុជ្ឈិស្សតិ, នោ ច តេសំ ចក្ខាយតនំ ន និរុជ្ឈតិ. បច្ឆិមភវិកានំ រូបាវចរំ ឧបបជ្ជន្តានំ អរូបេ បច្ឆិមភវិកានំ តេសំ ឃានាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

(ក) យស្ស ចក្ខាយតនំ ន និរុជ្ឈតិ តស្ស រូបាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ ចក្ខាយតនំ ន និរុជ្ឈតិ, នោ ច តេសំ រូបាយតនំ ន និរុជ្ឈិស្សតិ. អរូបេ បច្ឆិមភវិកានំ តេសំ ចក្ខាយតនញ្ច ន និរុជ្ឈតិ រូបាយតនញ្ច ន និរុជ្ឈិស្សតិ.

(ខ) យស្ស វា បន រូបាយតនំ ន និរុជ្ឈិស្សតិ តស្ស ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ រូបាយតនំ ន និរុជ្ឈិស្សតិ, នោ ច តេសំ ចក្ខាយតនំ ន និរុជ្ឈតិ. អរូបេ បច្ឆិមភវិកានំ តេសំ រូបាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

យស្ស ចក្ខាយតនំ ន និរុជ្ឈតិ តស្ស មនាយតនំ…បេ… ធម្មាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ ចក្ខាយតនំ ន និរុជ្ឈតិ, នោ ច តេសំ ធម្មាយតនំ ន និរុជ្ឈិស្សតិ. អរូបេ បរិនិព្ពន្តានំ តេសំ ចក្ខាយតនញ្ច ន និរុជ្ឈតិ ធម្មាយតនញ្ច ន និរុជ្ឈិស្សតិ.

យស្ស វា បន ធម្មាយតនំ ន និរុជ្ឈិស្សតិ តស្ស ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ ធម្មាយតនំ ន និរុជ្ឈិស្សតិ, នោ ច តេសំ ចក្ខាយតនំ ន និរុជ្ឈតិ. អរូបេ បរិនិព្ពន្តានំ តេសំ ធម្មាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

១៧៦. (ក) យស្ស ឃានាយតនំ ន និរុជ្ឈតិ តស្ស រូបាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អឃានកានំ ចវន្តានំ តេសំ ឃានាយតនំ ន និរុជ្ឈតិ, នោ ច តេសំ រូបាយតនំ ន និរុជ្ឈិស្សតិ. រូបាវចរេ បរិនិព្ពន្តានំ អរូបេ បច្ឆិមភវិកានំ តេសំ ឃានាយតនញ្ច ន និរុជ្ឈតិ រូបាយតនញ្ច ន និរុជ្ឈិស្សតិ.

(ខ) យស្ស វា បន រូបាយតនំ ន និរុជ្ឈិស្សតិ តស្ស ឃានាយតនំ ន និរុជ្ឈតីតិ?

កាមាវចរេ បរិនិព្ពន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ រូបាយតនំ ន និរុជ្ឈិស្សតិ, នោ ច តេសំ ឃានាយតនំ ន និរុជ្ឈតិ. រូបាវចរេ បរិនិព្ពន្តានំ អរូបេ បច្ឆិមភវិកានំ តេសំ រូបាយតនញ្ច ន និរុជ្ឈិស្សតិ ឃានាយតនញ្ច ន និរុជ្ឈតិ.

យស្ស ឃានាយតនំ ន និរុជ្ឈតិ តស្ស មនាយតនំ…បេ… ធម្មាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អឃានកានំ ចវន្តានំ តេសំ ឃានាយតនំ ន និរុជ្ឈតិ, នោ ច តេសំ ធម្មាយតនំ ន និរុជ្ឈិស្សតិ. រូបាវចរេ អរូបាវចរេ បរិនិព្ពន្តានំ តេសំ ឃានាយតនញ្ច ន និរុជ្ឈតិ ធម្មាយតនញ្ច ន និរុជ្ឈិស្សតិ.

យស្ស វា បន ធម្មាយតនំ ន និរុជ្ឈិស្សតិ តស្ស ឃានាយតនំ ន និរុជ្ឈតីតិ?

កាមាវចរេ បរិនិព្ពន្តានំ តេសំ ធម្មាយតនំ ន និរុជ្ឈិស្សតិ, នោ ច តេសំ ឃានាយតនំ ន និរុជ្ឈតិ. រូបាវចរេ អរូបាវចរេ បរិនិព្ពន្តានំ តេសំ ធម្មាយតនញ្ច ន និរុជ្ឈិស្សតិ ឃានាយតនញ្ច ន និរុជ្ឈតិ.

១៧៧. យស្ស រូបាយតនំ ន និរុជ្ឈតិ តស្ស មនាយតនំ…បេ… ធម្មាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អរូបកានំ ចវន្តានំ តេសំ រូបាយតនំ ន និរុជ្ឈតិ, នោ ច តេសំ ធម្មាយតនំ ន និរុជ្ឈិស្សតិ. អរូបេ បរិនិព្ពន្តានំ តេសំ រូបាយតនញ្ច ន និរុជ្ឈតិ ធម្មាយតនញ្ច ន និរុជ្ឈិស្សតិ.

យស្ស វា បន ធម្មាយតនំ ន និរុជ្ឈិស្សតិ តស្ស រូបាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ ធម្មាយតនំ ន និរុជ្ឈិស្សតិ, នោ ច តេសំ រូបាយតនំ ន និរុជ្ឈតិ. អរូបេ បរិនិព្ពន្តានំ តេសំ ធម្មាយតនញ្ច ន និរុជ្ឈិស្សតិ រូបាយតនញ្ច ន និរុជ្ឈតិ.

១៧៨. (ក) យស្ស មនាយតនំ ន និរុជ្ឈតិ តស្ស ធម្មាយតនំ ន និរុជ្ឈិស្សតីតិ? និរុជ្ឈិស្សតិ.

(ខ) យស្ស វា បន ធម្មាយតនំ ន និរុជ្ឈិស្សតិ តស្ស មនាយតនំ ន និរុជ្ឈតីតិ? និរុជ្ឈតិ.

(ង) បច្ចនីកឱកាសោ

១៧៩. យត្ថ ចក្ខាយតនំ ន និរុជ្ឈតិ…បេ….

(ច) បច្ចនីកបុគ្គលោកាសា

១៨០. (ក) យស្ស យត្ថ ចក្ខាយតនំ ន និរុជ្ឈតិ តស្ស តត្ថ សោតាយតនំ ន និរុជ្ឈិស្សតីតិ?

បញ្ចវោការំ ឧបបជ្ជន្តានំ អចក្ខុកានំ កាមាវចរា ចវន្តានំ តេសំ តត្ថ ចក្ខាយតនំ ន និរុជ្ឈតិ, នោ ច តេសំ តត្ថ សោតាយតនំ ន និរុជ្ឈិស្សតិ. អសញ្ញសត្តានំ អរូបានំ តេសំ តត្ថ ចក្ខាយតនញ្ច ន និរុជ្ឈតិ សោតាយតនញ្ច ន និរុជ្ឈិស្សតិ.

(ខ) យស្ស វា បន យត្ថ សោតាយតនំ ន និរុជ្ឈិស្សតិ តស្ស តត្ថ ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ តត្ថ សោតាយតនំ ន និរុជ្ឈិស្សតិ, នោ ច តេសំ តត្ថ ចក្ខាយតនំ ន និរុជ្ឈតិ. អសញ្ញសត្តានំ អរូបានំ តេសំ តត្ថ សោតាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

(ក) យស្ស យត្ថ ចក្ខាយតនំ ន និរុជ្ឈតិ តស្ស តត្ថ ឃានាយតនំ ន និរុជ្ឈិស្សតីតិ?

កាមាវចរំ ឧបបជ្ជន្តានំ អចក្ខុកានំ កាមាវចរា ចវន្តានំ តេសំ តត្ថ ចក្ខាយតនំ ន និរុជ្ឈតិ, នោ ច តេសំ តត្ថ ឃានាយតនំ ន និរុជ្ឈិស្សតិ. រូបាវចរំ ឧបបជ្ជន្តានំ អសញ្ញសត្តានំ អរូបានំ តេសំ តត្ថ ចក្ខាយតនញ្ច ន និរុជ្ឈតិ ឃានាយតនញ្ច ន និរុជ្ឈិស្សតិ.

(ខ) យស្ស វា បន យត្ថ ឃានាយតនំ ន និរុជ្ឈិស្សតិ តស្ស តត្ថ ចក្ខាយតនំ ន និរុជ្ឈតីតិ?

កាមាវចរេ បរិនិព្ពន្តានំ រូបាវចរា ចវន្តានំ តេសំ តត្ថ ឃានាយតនំ ន និរុជ្ឈិស្សតិ, នោ ច តេសំ តត្ថ ចក្ខាយតនំ ន និរុជ្ឈតិ. រូបាវចរំ ឧបបជ្ជន្តានំ អសញ្ញសត្តានំ អរូបានំ តេសំ តត្ថ ឃានាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

(ក) យស្ស យត្ថ ចក្ខាយតនំ ន និរុជ្ឈតិ តស្ស តត្ថ រូបាយតនំ ន និរុជ្ឈិស្សតីតិ?

បញ្ចវោការំ ឧបបជ្ជន្តានំ អចក្ខុកានំ កាមាវចរា ចវន្តានំ អសញ្ញសត្តានំ តេសំ តត្ថ ចក្ខាយតនំ ន និរុជ្ឈតិ, នោ ច តេសំ តត្ថ រូបាយតនំ ន និរុជ្ឈិស្សតិ. អរូបានំ តេសំ តត្ថ ចក្ខាយតនញ្ច ន និរុជ្ឈតិ រូបាយតនញ្ច ន និរុជ្ឈិស្សតិ.

(ខ) យស្ស វា បន យត្ថ រូបាយតនំ ន និរុជ្ឈិស្សតិ តស្ស តត្ថ ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ តត្ថ រូបាយតនំ ន និរុជ្ឈិស្សតិ, នោ ច តេសំ តត្ថ ចក្ខាយតនំ ន និរុជ្ឈតិ. អរូបានំ តេសំ តត្ថ រូបាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

(ក) យស្ស យត្ថ ចក្ខាយតនំ ន និរុជ្ឈតិ តស្ស តត្ថ មនាយតនំ ន និរុជ្ឈិស្សតីតិ?

បញ្ចវោការំ ឧបបជ្ជន្តានំ អចក្ខុកានំ កាមាវចរា ចវន្តានំ អរូបានំ តេសំ តត្ថ ចក្ខាយតនំ ន និរុជ្ឈតិ, នោ ច តេសំ តត្ថ មនាយតនំ ន និរុជ្ឈិស្សតិ. អរូបេ បរិនិព្ពន្តានំ អសញ្ញសត្តានំ តេសំ តត្ថ ចក្ខាយតនញ្ច ន និរុជ្ឈតិ មនាយតនញ្ច ន និរុជ្ឈិស្សតិ.

(ខ) យស្ស វា បន យត្ថ មនាយតនំ ន និរុជ្ឈិស្សតិ តស្ស តត្ថ ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ តត្ថ មនាយតនំ ន និរុជ្ឈិស្សតិ, នោ ច តេសំ តត្ថ ចក្ខាយតនំ ន និរុជ្ឈតិ. អរូបេ បរិនិព្ពន្តានំ អសញ្ញសត្តានំ តេសំ តត្ថ មនាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ.

(ក) យស្ស យត្ថ ចក្ខាយតនំ ន និរុជ្ឈតិ តស្ស តត្ថ ធម្មាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អចក្ខុកានំ ចវន្តានំ តេសំ តត្ថ ចក្ខាយតនំ ន និរុជ្ឈតិ, នោ ច តេសំ តត្ថ ធម្មាយតនំ ន និរុជ្ឈិស្សតិ. អរូបេ បរិនិព្ពន្តានំ តេសំ តត្ថ ចក្ខាយតនញ្ច ន និរុជ្ឈតិ ធម្មាយតនញ្ច ន និរុជ្ឈិស្សតិ.

(ខ) យស្ស វា បន យត្ថ ធម្មាយតនំ ន និរុជ្ឈិស្សតិ តស្ស តត្ថ ចក្ខាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ តត្ថ ធម្មាយតនំ ន និរុជ្ឈិស្សតិ, នោ ច តេសំ តត្ថ ចក្ខាយតនំ ន និរុជ្ឈតិ. អរូបេ បរិនិព្ពន្តានំ តេសំ តត្ថ ធម្មាយតនញ្ច ន និរុជ្ឈិស្សតិ ចក្ខាយតនញ្ច ន និរុជ្ឈតិ. (ចក្ខាយតនមូលកំ)

១៨១. (ក) យស្ស យត្ថ ឃានាយតនំ ន និរុជ្ឈតិ តស្ស តត្ថ រូបាយតនំ ន និរុជ្ឈិស្សតីតិ?

កាមាវចរំ ឧបបជ្ជន្តានំ អឃានកានំ កាមាវចរា ចវន្តានំ រូបាវចរានំ តេសំ តត្ថ ឃានាយតនំ ន និរុជ្ឈតិ, នោ ច តេសំ តត្ថ រូបាយតនំ ន និរុជ្ឈិស្សតិ. រូបាវចរេ បរិនិព្ពន្តានំ អរូបានំ តេសំ តត្ថ ឃានាយតនញ្ច ន និរុជ្ឈតិ រូបាយតនញ្ច ន និរុជ្ឈិស្សតិ.

(ខ) យស្ស វា បន យត្ថ រូបាយតនំ ន និរុជ្ឈិស្សតិ តស្ស តត្ថ ឃានាយតនំ ន និរុជ្ឈតីតិ?

កាមាវចរេ បរិនិព្ពន្តានំ តេសំ តត្ថ រូបាយតនំ ន និរុជ្ឈិស្សតិ, នោ ច តេសំ តត្ថ ឃានាយតនំ ន និរុជ្ឈតិ. រូបាវចរេ បរិនិព្ពន្តានំ អរូបានំ តេសំ តត្ថ រូបាយតនញ្ច ន និរុជ្ឈិស្សតិ ឃានាយតនញ្ច ន និរុជ្ឈតិ.

(ក) យស្ស យត្ថ ឃានាយតនំ ន និរុជ្ឈតិ តស្ស តត្ថ មនាយតនំ ន និរុជ្ឈិស្សតីតិ?

កាមាវចរំ ឧបបជ្ជន្តានំ អឃានកានំ កាមាវចរា ចវន្តានំ រូបាវចរានំ អរូបាវចរានំ តេសំ តត្ថ ឃានាយតនំ ន និរុជ្ឈតិ, នោ ច តេសំ តត្ថ មនាយតនំ ន និរុជ្ឈិស្សតិ. រូបាវចរេ អរូបាវចរេ បរិនិព្ពន្តានំ អសញ្ញសត្តានំ តេសំ តត្ថ ឃានាយតនញ្ច ន និរុជ្ឈតិ មនាយតនញ្ច ន និរុជ្ឈិស្សតិ.

(ខ) យស្ស វា បន យត្ថ មនាយតនំ ន និរុជ្ឈិស្សតិ តស្ស តត្ថ ឃានាយតនំ ន និរុជ្ឈតីតិ?

កាមាវចរេ បរិនិព្ពន្តានំ តេសំ តត្ថ មនាយតនំ ន និរុជ្ឈិស្សតិ, នោ ច តេសំ តត្ថ ឃានាយតនំ ន និរុជ្ឈតិ. រូបាវចរេ អរូបាវចរេ បរិនិព្ពន្តានំ អសញ្ញសត្តានំ តេសំ តត្ថ មនាយតនញ្ច ន និរុជ្ឈិស្សតិ ឃានាយតនញ្ច ន និរុជ្ឈតិ.

(ក) យស្ស យត្ថ ឃានាយតនំ ន និរុជ្ឈតិ តស្ស តត្ថ ធម្មាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អឃានកានំ ចវន្តានំ តេសំ តត្ថ ឃានាយតនំ ន និរុជ្ឈតិ, នោ ច តេសំ តត្ថ ធម្មាយតនំ ន និរុជ្ឈិស្សតិ. រូបាវចរេ អរូបាវចរេ បរិនិព្ពន្តានំ តេសំ តត្ថ ឃានាយតនញ្ច ន និរុជ្ឈតិ ធម្មាយតនញ្ច ន និរុជ្ឈិស្សតិ.

(ខ) យស្ស វា បន យត្ថ ធម្មាយតនំ ន និរុជ្ឈិស្សតិ តស្ស តត្ថ ឃានាយតនំ ន និរុជ្ឈតីតិ?

កាមាវចរេ បរិនិព្ពន្តានំ តេសំ តត្ថ ធម្មាយតនំ ន និរុជ្ឈិស្សតិ, នោ ច តេសំ តត្ថ ឃានាយតនំ ន និរុជ្ឈតិ. រូបាវចរេ អរូបាវចរេ បរិនិព្ពន្តានំ តេសំ តត្ថ ធម្មាយតនញ្ច ន និរុជ្ឈិស្សតិ ឃានាយតនញ្ច ន និរុជ្ឈតិ. (ឃានាយតនមូលកំ)

១៨២. (ក) យស្ស យត្ថ រូបាយតនំ ន និរុជ្ឈតិ តស្ស តត្ថ មនាយតនំ ន និរុជ្ឈិស្សតីតិ?

បញ្ចវោការំ ឧបបជ្ជន្តានំ អរូបានំ តេសំ តត្ថ រូបាយតនំ ន និរុជ្ឈតិ, នោ ច តេសំ តត្ថ មនាយតនំ ន និរុជ្ឈិស្សតិ. អរូបេ បរិនិព្ពន្តានំ អសញ្ញសត្តំ ឧបបជ្ជន្តានំ តេសំ តត្ថ រូបាយតនញ្ច ន និរុជ្ឈតិ មនាយតនញ្ច ន និរុជ្ឈិស្សតិ.

(ខ) យស្ស វា បន យត្ថ មនាយតនំ ន និរុជ្ឈិស្សតិ តស្ស តត្ថ រូបាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ អសញ្ញសត្តា ចវន្តានំ តេសំ តត្ថ មនាយតនំ ន និរុជ្ឈិស្សតិ, នោ ច តេសំ តត្ថ រូបាយតនំ ន និរុជ្ឈតិ. អរូបេ បរិនិព្ពន្តានំ អសញ្ញសត្តំ ឧបបជ្ជន្តានំ តេសំ តត្ថ មនាយតនញ្ច ន និរុជ្ឈិស្សតិ រូបាយតនញ្ច ន និរុជ្ឈតិ.

(ក) យស្ស យត្ថ រូបាយតនំ ន និរុជ្ឈតិ តស្ស តត្ថ ធម្មាយតនំ ន និរុជ្ឈិស្សតីតិ?

សព្ពេសំ ឧបបជ្ជន្តានំ អរូបកានំ ចវន្តានំ តេសំ តត្ថ រូបាយតនំ ន និរុជ្ឈតិ, នោ ច តេសំ តត្ថ ធម្មាយតនំ ន និរុជ្ឈិស្សតិ. អរូបេ បរិនិព្ពន្តានំ តេសំ តត្ថ រូបាយតនញ្ច ន និរុជ្ឈតិ ធម្មាយតនញ្ច ន និរុជ្ឈិស្សតិ.

(ខ) យស្ស វា បន យត្ថ ធម្មាយតនំ ន និរុជ្ឈិស្សតិ តស្ស តត្ថ រូបាយតនំ ន និរុជ្ឈតីតិ?

បញ្ចវោការេ បរិនិព្ពន្តានំ តេសំ តត្ថ ធម្មាយតនំ ន និរុជ្ឈិស្សតិ, នោ ច តេសំ តត្ថ រូបាយតនំ ន និរុជ្ឈតិ. អរូបេ បរិនិព្ពន្តានំ តេសំ តត្ថ ធម្មាយតនញ្ច ន និរុជ្ឈិស្សតិ រូបាយតនញ្ច ន និរុជ្ឈតិ. (រូបាយតនមូលកំ)

១៨៣. (ក) យស្ស យត្ថ មនាយតនំ ន និរុជ្ឈតិ តស្ស តត្ថ ធម្មាយតនំ ន និរុជ្ឈិស្សតីតិ? និរុជ្ឈិស្សតិ.

(ខ) យស្ស វា បន យត្ថ ធម្មាយតនំ ន និរុជ្ឈិស្សតិ តស្ស តត្ថ មនាយតនំ ន និរុជ្ឈតីតិ? និរុជ្ឈតិ.