២. បញ្ហាបុច្ឆកំ

២២១. ពាវីសតិន្ទ្រិយានិ – ចក្ខុន្ទ្រិយំ, សោតិន្ទ្រិយំ, ឃានិន្ទ្រិយំ, ជិវ្ហិន្ទ្រិយំ, កាយិន្ទ្រិយំ, មនិន្ទ្រិយំ, ឥត្ថិន្ទ្រិយំ, បុរិសិន្ទ្រិយំ, ជីវិតិន្ទ្រិយំ, សុខិន្ទ្រិយំ, ទុក្ខិន្ទ្រិយំ, សោមនស្សិន្ទ្រិយំ, ទោមនស្សិន្ទ្រិយំ, ឧបេក្ខិន្ទ្រិយំ, សទ្ធិន្ទ្រិយំ, វីរិយិន្ទ្រិយំ, សតិន្ទ្រិយំ, សមាធិន្ទ្រិយំ, បញ្ញិន្ទ្រិយំ, អនញ្ញាតញ្ញស្សាមីតិន្ទ្រិយំ, អញ្ញិន្ទ្រិយំ, អញ្ញាតាវិន្ទ្រិយំ.

២២២. ពាវីសតីនំ ឥន្ទ្រិយានំ កតិ កុសលា, កតិ អកុសលា, កតិ អព្យាកតា…បេ… កតិ សរណា, កតិ អរណា?

១. តិកំ

២២៣. ទសិន្ទ្រិយា អព្យាកតា. ទោមនស្សិន្ទ្រិយំ អកុសលំ. អនញ្ញាតញ្ញស្សាមីតិន្ទ្រិយំ កុសលំ. ចត្តារិន្ទ្រិយា សិយា កុសលា, សិយា អព្យាកតា. ឆ ឥន្ទ្រិយា សិយា កុសលា, សិយា អកុសលា, សិយា អព្យាកតា.

ទ្វាទសិន្ទ្រិយា ន វត្តព្ពា – ‘‘សុខាយ វេទនាយ សម្បយុត្តា’’តិបិ, ‘‘ទុក្ខាយ វេទនាយ សម្បយុត្តា’’តិបិ, ‘‘អទុក្ខមសុខាយ វេទនាយ សម្បយុត្តា’’តិបិ. ឆ ឥន្ទ្រិយា សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. តីណិន្ទ្រិយា សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. ជីវិតិន្ទ្រិយំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ, សិយា ន វត្តព្ពំ – ‘‘សុខាយ វេទនាយ សម្បយុត្ត’’ន្តិបិ, ‘‘ទុក្ខាយ វេទនាយ សម្បយុត្ត’’ន្តិបិ, ‘‘អទុក្ខមសុខាយ វេទនាយ សម្បយុត្ត’’ន្តិបិ.

សត្តិន្ទ្រិយា នេវវិបាកនវិបាកធម្មធម្មា. តីណិន្ទ្រិយា វិបាកា. ទ្វិន្ទ្រិយា វិបាកធម្មធម្មា. អញ្ញិន្ទ្រិយំ សិយា វិបាកំ, សិយា វិបាកធម្មធម្មំ. នវិន្ទ្រិយា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា. នវិន្ទ្រិយា ឧបាទិន្នុបាទានិយា. ទោមនស្សិន្ទ្រិយំ អនុបាទិន្នុបាទានិយំ. តីណិន្ទ្រិយា អនុបាទិន្នអនុបាទានិយា. នវិន្ទ្រិយា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

នវិន្ទ្រិយា អសំកិលិដ្ឋសំកិលេសិកា. ទោមនស្សិន្ទ្រិយំ សំកិលិដ្ឋសំកិលេសិកំ. តីណិន្ទ្រិយា អសំកិលិដ្ឋអសំកិលេសិកា. តីណិន្ទ្រិយា សិយា អសំកិលិដ្ឋសំកិលេសិកា, សិយា អសំកិលិដ្ឋអសំកិលេសិកា. ឆ ឥន្ទ្រិយា សិយា សំកិលិដ្ឋសំកិលេសិកា, សិយា អសំកិលិដ្ឋសំកិលេសិកា, សិយា អសំកិលិដ្ឋអសំកិលេសិកា. នវិន្ទ្រិយា អវិតក្កអវិចារា. ទោមនស្សិន្ទ្រិយំ សវិតក្កសវិចារំ. ឧបេក្ខិន្ទ្រិយំ សិយា សវិតក្កសវិចារំ, សិយា អវិតក្កអវិចារំ. ឯកាទសិន្ទ្រិយា សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា.

ឯកាទសិន្ទ្រិយា ន វត្តព្ពា – ‘‘បីតិសហគតា’’តិបិ, ‘‘សុខសហគតា’’តិបិ, ‘‘ឧបេក្ខាសហគតា’’តិបិ. សោមនស្សិន្ទ្រិយំ សិយា បីតិសហគតំ ន សុខសហគតំ ន ឧបេក្ខាសហគតំ, សិយា ន វត្តព្ពំ – ‘‘បីតិសហគត’’ន្តិ. ឆ ឥន្ទ្រិយា សិយា បីតិសហគតា, សិយា សុខសហគតា, សិយា ឧបេក្ខាសហគតា. ចត្តារិន្ទ្រិយា សិយា បីតិសហគតា, សិយា សុខសហគតា, សិយា ឧបេក្ខាសហគតា, សិយា ន វត្តព្ពា – ‘‘បីតិសហគតា’’តិបិ, ‘‘សុខសហគតា’’តិបិ, ‘‘ឧបេក្ខាសហគតា’’តិបិ.

បន្នរសិន្ទ្រិយា នេវ ទស្សនេន ន ភាវនាយ បហាតព្ពា. ទោមនស្សិន្ទ្រិយំ សិយា ទស្សនេន បហាតព្ពំ, សិយា ភាវនាយ បហាតព្ពំ. ឆ ឥន្ទ្រិយា សិយា ទស្សនេន បហាតព្ពា, សិយា ភាវនាយ បហាតព្ពា, សិយា នេវ ទស្សនេន ន ភាវនាយ បហាតព្ពា. បន្នរសិន្ទ្រិយា នេវ ទស្សនេន ន ភាវនាយ បហាតព្ពហេតុកា. ទោមនស្សិន្ទ្រិយំ សិយា ទស្សនេន បហាតព្ពហេតុកំ, សិយា ភាវនាយ បហាតព្ពហេតុកំ. ឆ ឥន្ទ្រិយា សិយា ទស្សនេន បហាតព្ពហេតុកា, សិយា ភាវនាយ បហាតព្ពហេតុកា, សិយា នេវ ទស្សនេន ន ភាវនាយ បហាតព្ពហេតុកា.

ទសិន្ទ្រិយា នេវាចយគាមិនាបចយគាមិនោ. ទោមនស្សិន្ទ្រិយំ អាចយគាមិ. អនញ្ញាតញ្ញស្សាមីតិន្ទ្រិយំ អបចយគាមិ. អញ្ញិន្ទ្រិយំ សិយា អបចយគាមិ, សិយា នេវាចយគាមិនាបចយគាមិ. នវិន្ទ្រិយា សិយា អាចយគាមិនោ, សិយា អបចយគាមិនោ, សិយា នេវាចយគាមិនាបចយគាមិនោ. ទសិន្ទ្រិយា នេវសេក្ខនាសេក្ខា. ទ្វិន្ទ្រិយា សេក្ខា. អញ្ញាតាវិន្ទ្រិយំ អសេក្ខំ. នវិន្ទ្រិយា សិយា សេក្ខា, សិយា អសេក្ខា, សិយា នេវសេក្ខនាសេក្ខា.

ទសិន្ទ្រិយា បរិត្តា. តីណិន្ទ្រិយា អប្បមាណា. នវិន្ទ្រិយា សិយា បរិត្តា, សិយា មហគ្គតា, សិយា អប្បមាណា. សត្តិន្ទ្រិយា អនារម្មណា. ទ្វិន្ទ្រិយា បរិត្តារម្មណា. តីណិន្ទ្រិយា អប្បមាណារម្មណា. ទោមនស្សិន្ទ្រិយំ សិយា បរិត្តារម្មណំ សិយា មហគ្គតារម្មណំ, ន អប្បមាណារម្មណំ, សិយា ន វត្តព្ពំ – ‘‘បរិត្តារម្មណ’’ន្តិបិ, ‘‘មហគ្គតារម្មណ’’ន្តិ បិ. នវិន្ទ្រិយា សិយា បរិត្តារម្មណា, សិយា មហគ្គតារម្មណា, សិយា អប្បមាណារម្មណា, សិយា ន វត្តព្ពា – ‘‘បរិត្តារម្មណា’’តិបិ, ‘‘មហគ្គតារម្មណា’’តិបិ, ‘‘អប្បមាណារម្មណា’’តិបិ.

នវិន្ទ្រិយា មជ្ឈិមា. ទោមនស្សិន្ទ្រិយំ ហីនំ. តីណិន្ទ្រិយា បណីតា. តីណិន្ទ្រិយា សិយា មជ្ឈិមា, សិយា បណីតា. ឆ ឥន្ទ្រិយា សិយា ហីនា, សិយា មជ្ឈិមា, សិយា បណីតា. ទសិន្ទ្រិយា អនិយតា. អនញ្ញាតញ្ញស្សាមីតិន្ទ្រិយំ សម្មត្តនិយតំ. ចត្តារិន្ទ្រិយា សិយា សម្មត្តនិយតា, សិយា អនិយតា. ទោមនស្សិន្ទ្រិយំ សិយា មិច្ឆត្តនិយតំ, សិយា អនិយតំ. ឆ ឥន្ទ្រិយា សិយា មិច្ឆត្តនិយតា, សិយា សម្មត្តនិយតា, សិយា អនិយតា. សត្តិន្ទ្រិយា អនារម្មណា. ចត្តារិន្ទ្រិយា ន វត្តព្ពា – ‘‘មគ្គារម្មណា’’តិបិ, ‘‘មគ្គហេតុកា’’តិបិ, ‘‘មគ្គាធិបតិនោ’’តិបិ. អនញ្ញាតញ្ញស្សាមីតិន្ទ្រិយំ ន មគ្គារម្មណំ, សិយា មគ្គហេតុកំ, សិយា មគ្គាធិបតិ, សិយា ន វត្តព្ពំ – ‘‘មគ្គហេតុក’’ន្តិបិ, ‘‘មគ្គាធិបតី’’តិបិ. អញ្ញិន្ទ្រិយំ ន មគ្គារម្មណំ, សិយា មគ្គហេតុកំ, សិយា មគ្គាធិបតិ, សិយា ន វត្តព្ពំ – ‘‘មគ្គហេតុក’’ន្តិបិ, ‘‘មគ្គាធិបតី’’តិបិ. នវិន្ទ្រិយា សិយា មគ្គារម្មណា, សិយា មគ្គហេតុកា, សិយា មគ្គាធិបតិនោ, សិយា ន វត្តព្ពា – ‘‘មគ្គារម្មណា’’តិបិ, ‘‘មគ្គហេតុកា’’តិបិ, ‘‘មគ្គាធិបតិនោ’’តិបិ.

ទសិន្ទ្រិយា សិយា ឧប្បន្នា, សិយា ឧប្បាទិនោ, ន វត្តព្ពា – ‘‘អនុប្បន្នា’’តិ. ទ្វិន្ទ្រិយា សិយា ឧប្បន្នា, សិយា អនុប្បន្នា, ន វត្តព្ពា – ‘‘ឧប្បាទិនោ’’តិ. ទសិន្ទ្រិយា សិយា ឧប្បន្នា, សិយា អនុប្បន្នា, សិយា ឧប្បាទិនោ; សិយា អតីតា, សិយា អនាគតា, សិយា បច្ចុប្បន្នា. សត្តិន្ទ្រិយា អនារម្មណា. ទ្វិន្ទ្រិយា បច្ចុប្បន្នារម្មណា. តីណិន្ទ្រិយា ន វត្តព្ពា – ‘‘អតីតារម្មណា’’តិបិ, ‘‘អនាគតារម្មណា’’តិបិ, ‘‘បច្ចុប្បន្នារម្មណា’’តិបិ. ទសិន្ទ្រិយា សិយា អតីតារម្មណា, សិយា អនាគតារម្មណា, សិយា បច្ចុប្បន្នារម្មណា, សិយា ន វត្តព្ពា – ‘‘អតីតារម្មណា’’តិបិ, ‘‘អនាគតារម្មណា’’តិបិ, ‘‘បច្ចុប្បន្នារម្មណា’’តិបិ; សិយា អជ្ឈត្តា, សិយា ពហិទ្ធា, សិយា អជ្ឈត្តពហិទ្ធា. សត្តិន្ទ្រិយា អនារម្មណា. តីណិន្ទ្រិយា ពហិទ្ធារម្មណា. ចត្តារិន្ទ្រិយា សិយា អជ្ឈត្តារម្មណា, សិយា ពហិទ្ធារម្មណា, សិយា អជ្ឈត្តពហិទ្ធារម្មណា, អដ្ឋិន្ទ្រិយា សិយា អជ្ឈត្តារម្មណា, សិយា ពហិទ្ធារម្មណា, សិយា អជ្ឈត្តពហិទ្ធារម្មណា, សិយា ន វត្តព្ពា – ‘‘អជ្ឈត្តារម្មណា’’តិបិ, ‘‘ពហិទ្ធារម្មណា’’តិបិ, ‘‘អជ្ឈត្តពហិទ្ធារម្មណា’’តិបិ. បញ្ចិន្ទ្រិយា អនិទស្សនសប្បដិឃា. សត្តរសិន្ទ្រិយា អនិទស្សនអប្បដិឃា.

២. ទុកំ

២២៤. ចត្តារិន្ទ្រិយា ហេតូ. អដ្ឋារសិន្ទ្រិយា ន ហេតូ. សត្តិន្ទ្រិយា សហេតុកា. នវិន្ទ្រិយា អហេតុកា. ឆ ឥន្ទ្រិយា សិយា សហេតុកា, សិយា អហេតុកា. សត្តិន្ទ្រិយា ហេតុសម្បយុត្តា. នវិន្ទ្រិយា ហេតុវិប្បយុត្តា. ឆ ឥន្ទ្រិយា សិយា ហេតុសម្បយុត្តា, សិយា ហេតុវិប្បយុត្តា. ចត្តារិន្ទ្រិយា ហេតូ ចេវ សហេតុកា ច. នវិន្ទ្រិយា ន វត្តព្ពា – ‘‘ហេតូ ចេវ សហេតុកា ចា’’តិបិ, ‘‘សហេតុកា ចេវ ន ច ហេតូ’’តិបិ. តីណិន្ទ្រិយា ន វត្តព្ពា – ‘‘ហេតូ ចេវ សហេតុកា ចា’’តិ. សហេតុកា ចេវ ន ច ហេតូ. ឆ ឥន្ទ្រិយា ន វត្តព្ពា – ‘‘ហេតូ ចេវ សហេតុកា ចា’’តិ, សិយា សហេតុកា ចេវ ន ច ហេតូ, សិយា ន វត្តព្ពា – ‘‘សហេតុកា ចេវ ន ច ហេតូ’’តិ.

ចត្តារិន្ទ្រិយា ហេតូ ចេវ ហេតុសម្បយុត្តា ច. នវិន្ទ្រិយា ន វត្តព្ពា – ‘‘ហេតូ ចេវ ហេតុសម្បយុត្តា ចា’’តិបិ, ‘‘ហេតុសម្បយុត្តា ចេវ ន ច ហេតូ’’តិបិ. តីណិន្ទ្រិយា ន វត្តព្ពា – ‘‘ហេតូ ចេវ ហេតុសម្បយុត្តា ចា’’តិ, ‘‘ហេតុសម្បយុត្តា ចេវ ន ច ហេតូ’’. ឆ ឥន្ទ្រិយា ន វត្តព្ពា – ‘‘ហេតូ ចេវ ហេតុសម្បយុត្តា ចា’’តិ, សិយា ហេតុសម្បយុត្តា ចេវ ន ច ហេតូ, សិយា ន វត្តព្ពា – ‘‘ហេតុសម្បយុត្តា ចេវ ន ច ហេតូ’’តិ.

នវិន្ទ្រិយា ន ហេតូ អហេតុកា. តីណិន្ទ្រិយា ន ហេតូ សហេតុកា. ចត្តារិន្ទ្រិយា ន វត្តព្ពា – ‘‘ន ហេតូ សហេតុកា’’តិបិ, ‘‘ន ហេតូ អហេតុកា’’តិបិ. ឆ ឥន្ទ្រិយា សិយា ន ហេតូ សហេតុកា, សិយា ន ហេតូ អហេតុកា.

សប្បច្ចយា. សង្ខតា. អនិទស្សនា. បញ្ចិន្ទ្រិយា សប្បដិឃា. សត្តរសិន្ទ្រិយា អប្បដិឃា. សត្តិន្ទ្រិយា រូបា. ចុទ្ទសិន្ទ្រិយា អរូបា. ជីវិតិន្ទ្រិយំ សិយា រូបំ, សិយា អរូបំ. ទសិន្ទ្រិយា លោកិយា. តីណិន្ទ្រិយា លោកុត្តរា. នវិន្ទ្រិយា សិយា លោកិយា, សិយា លោកុត្តរា; កេនចិ វិញ្ញេយ្យា, កេនចិ ន វិញ្ញេយ្យា.

នោ អាសវា. ទសិន្ទ្រិយា សាសវា. តីណិន្ទ្រិយា អនាសវា. នវិន្ទ្រិយា សិយា សាសវា, សិយា អនាសវា. បន្នរសិន្ទ្រិយា អាសវវិប្បយុត្តា. ទោមនស្សិន្ទ្រិយំ អាសវសម្បយុត្តំ. ឆ ឥន្ទ្រិយា សិយា អាសវសម្បយុត្តា, សិយា អាសវវិប្បយុត្តា. ទសិន្ទ្រិយា ន វត្តព្ពា – ‘‘អាសវា ចេវ សាសវា ចា’’តិ, ‘‘សាសវា ចេវ នោ ច អាសវា’’. តីណិន្ទ្រិយា ន វត្តព្ពា – ‘‘អាសវា ចេវ សាសវា ចា’’តិបិ, ‘‘សាសវា ចេវ នោ ច អាសវា’’តិបិ. នវិន្ទ្រិយា ន វត្តព្ពា – ‘‘អាសវា ចេវ សាសវា ចា’’តិ, សិយា សាសវា ចេវ នោ ច អាសវា, សិយា ន វត្តព្ពា – ‘‘សាសវា ចេវ នោ ច អាសវា’’តិ.

បន្នរសិន្ទ្រិយា ន វត្តព្ពា – ‘‘អាសវា ចេវ អាសវសម្បយុត្តា ចា’’តិបិ, ‘‘អាសវសម្បយុត្តា ចេវ នោ ច អាសវា’’តិបិ. ទោមនស្សិន្ទ្រិយំ ន វត្តព្ពំ – ‘‘អាសវោ ចេវ អាសវសម្បយុត្តញ្ចា’’តិ, ‘‘អាសវសម្បយុត្តញ្ចេវ នោ ច អាសវោ’’. ឆ ឥន្ទ្រិយា ន វត្តព្ពា – ‘‘អាសវា ចេវ អាសវសម្បយុត្តា ចា’’តិ, សិយា អាសវសម្បយុត្តា ចេវ នោ ច អាសវា, សិយា ន វត្តព្ពា – ‘‘អាសវសម្បយុត្តា ចេវ នោ ច អាសវា’’តិ. នវិន្ទ្រិយា អាសវវិប្បយុត្តសាសវា. តីណិន្ទ្រិយា អាសវវិប្បយុត្តអនាសវា. ទោមនស្សិន្ទ្រិយំ ន វត្តព្ពំ – ‘‘អាសវវិប្បយុត្តសាសវ’’ន្តិបិ, ‘‘អាសវវិប្បយុត្តអនាសវ’’ន្តិបិ. តីណិន្ទ្រិយា សិយា អាសវវិប្បយុត្តសាសវា, សិយា អាសវវិប្បយុត្តអនាសវា. ឆ ឥន្ទ្រិយា សិយា អាសវវិប្បយុត្តសាសវា, សិយា អាសវវិប្បយុត្តអនាសវា, សិយា ន វត្តព្ពា – ‘‘អាសវវិប្បយុត្តសាសវា’’តិបិ, ‘‘អាសវវិប្បយុត្តអនាសវា’’តិបិ.

នោ សំយោជនា. ទសិន្ទ្រិយា សំយោជនិយា. តីណិន្ទ្រិយា អសំយោជនិយា. នវិន្ទ្រិយា សិយា សំយោជនិយា, សិយា អសំយោជនិយា. បន្នរសិន្ទ្រិយា សំយោជនវិប្បយុត្តា. ទោមនស្សិន្ទ្រិយំ សំយោជនសម្បយុត្តំ. ឆ ឥន្ទ្រិយា សិយា សំយោជនសម្បយុត្តា, សិយា សំយោជនវិប្បយុត្តា. ទសិន្ទ្រិយា ន វត្តព្ពា – ‘‘សំយោជនា ចេវ សំយោជនិយា ចា’’តិ, សំយោជនិយា ចេវ នោ ច សំយោជនា. តីណិន្ទ្រិយា ន វត្តព្ពា – ‘‘សំយោជនា ចេវ សំយោជនិយា ចា’’តិបិ, ‘‘សំយោជនិយា ចេវ នោ ច សំយោជនា’’តិបិ. នវិន្ទ្រិយា ន វត្តព្ពា – ‘‘សំយោជនា ចេវ សំយោជនិយា ចា’’តិ, សិយា សំយោជនិយា ចេវ នោ ច សំយោជនា, សិយា ន វត្តព្ពា – ‘‘សំយោជនិយា ចេវ នោ ច សំយោជនា’’តិ.

បន្នរសិន្ទ្រិយា ន វត្តព្ពា – ‘‘សំយោជនា ចេវ សំយោជនសម្បយុត្តា ចា’’តិបិ, ‘‘សំយោជនសម្បយុត្តា ចេវ នោ ច សំយោជនា’’តិបិ. ទោមនស្សិន្ទ្រិយំ ន វត្តព្ពំ – ‘‘សំយោជនញ្ចេវ សំយោជនសម្បយុត្តញ្ចា’’តិ, សំយោជនសម្បយុត្តញ្ចេវ នោ ច សំយោជនំ. ឆ ឥន្ទ្រិយា ន វត្តព្ពា – ‘‘សំយោជនា ចេវ សំយោជនសម្បយុត្តា ចា’’តិ, សិយា សំយោជនសម្បយុត្តា ចេវ នោ ច សំយោជនា, សិយា ន វត្តព្ពា – ‘‘សំយោជនសម្បយុត្តា ចេវ នោ ច សំយោជនា’’តិ.

នវិន្ទ្រិយា សំយោជនវិប្បយុត្តសំយោជនិយា. តីណិន្ទ្រិយា សំយោជនវិប្បយុត្តអសំយោជនិយា. ទោមនស្សិន្ទ្រិយំ ន វត្តព្ពំ – ‘‘សំយោជនវិប្បយុត្តសំយោជនិយ’’ន្តិបិ, ‘‘សំយោជនវិប្បយុត្តអសំយោជនិយ’’ន្តិបិ. តីណិន្ទ្រិយា សិយា សំយោជនវិប្បយុត្តសំយោជនិយា, សិយា សំយោជនវិប្បយុត្តអសំយោជនិយា. ឆ ឥន្ទ្រិយា សិយា សំយោជនវិប្បយុត្តសំយោជនិយា, សិយា សំយោជនវិប្បយុត្តអសំយោជនិយា, សិយា ន វត្តព្ពា – ‘‘សំយោជនវិប្បយុត្តសំយោជនិយា’’តិបិ, ‘‘សំយោជនវិប្បយុត្តអសំយោជនិយា’’តិបិ.

នោ គន្ថា. ទសិន្ទ្រិយា គន្ថនិយា. តីណិន្ទ្រិយា អគន្ថនិយា. នវិន្ទ្រិយា សិយា គន្ថនិយា, សិយា អគន្ថនិយា. បន្នរសិន្ទ្រិយា គន្ថវិប្បយុត្តា. ទោមនស្សិន្ទ្រិយំ គន្ថសម្បយុត្តំ. ឆ ឥន្ទ្រិយា សិយា គន្ថសម្បយុត្តា, សិយា គន្ថវិប្បយុត្តា. ទសិន្ទ្រិយា ន វត្តព្ពា – ‘‘គន្ថា ចេវ គន្ថនិយា ចា’’តិ, គន្ថនិយា ចេវ នោ ច គន្ថា. តីណិន្ទ្រិយា ន វត្តព្ពា – ‘‘គន្ថា ចេវ គន្ថនិយា ចា’’តិបិ, ‘‘គន្ថនិយា ចេវ នោ ច គន្ថា’’តិបិ. នវិន្ទ្រិយា ន វត្តព្ពា – ‘‘គន្ថា ចេវ គន្ថនិយា ចា’’តិ, សិយា គន្ថនិយា ចេវ នោ ច គន្ថា, សិយា ន វត្តព្ពា – ‘‘គន្ថនិយា ចេវ នោ ច គន្ថា’’តិ.

បន្នរសិន្ទ្រិយា ន វត្តព្ពា – ‘‘គន្ថា ចេវ គន្ថសម្បយុត្តា ចា’’តិបិ, ‘‘គន្ថសម្បយុត្តា ចេវ នោ ច គន្ថា’’តិបិ. ទោមនស្សិន្ទ្រិយំ ន វត្តព្ពំ – ‘‘គន្ថោ ចេវ គន្ថសម្បយុត្ត’’ញ្ចាតិ, គន្ថសម្បយុត្តញ្ចេវ នោ ច គន្ថោ. ឆ ឥន្ទ្រិយា ន វត្តព្ពា – ‘‘គន្ថា ចេវ គន្ថសម្បយុត្តា ចា’’តិ, សិយា គន្ថសម្បយុត្តា ចេវ នោ ច គន្ថា, សិយា ន វត្តព្ពា – ‘‘គន្ថសម្បយុត្តា ចេវ នោ ច គន្ថា’’តិ.

នវិន្ទ្រិយា គន្ថវិប្បយុត្តគន្ថនិយា. តីណិន្ទ្រិយា គន្ថវិប្បយុត្តអគន្ថនិយា. ទោមនស្សិន្ទ្រិយំ ន វត្តព្ពំ – ‘‘គន្ថវិប្បយុត្តគន្ថនិយ’’ន្តិបិ, ‘‘គន្ថវិប្បយុត្តអគន្ថនិយ’’ន្តិបិ. តីណិន្ទ្រិយា សិយា គន្ថវិប្បយុត្តគន្ថនិយា, សិយា គន្ថវិប្បយុត្តអគន្ថនិយា. ឆ ឥន្ទ្រិយា សិយា គន្ថវិប្បយុត្តគន្ថនិយា, សិយា គន្ថវិប្បយុត្តអគន្ថនិយា, សិយា ន វត្តព្ពា – ‘‘គន្ថវិប្បយុត្តគន្ថនិយា’’តិបិ, ‘‘គន្ថវិប្បយុត្តអគន្ថនិយា’’តិបិ.

នោ ឱឃា…បេ… នោ យោគា…បេ… នោ នីវរណា. ទសិន្ទ្រិយា នីវរណិយា. តីណិន្ទ្រិយា អនីវរណិយា. នវិន្ទ្រិយា សិយា នីវរណិយា, សិយា អនីវរណិយា. បន្នរសិន្ទ្រិយា នីវរណវិប្បយុត្តា. ទោមនស្សិន្ទ្រិយំ នីវរណសម្បយុត្តំ. ឆ ឥន្ទ្រិយា សិយា នីវរណសម្បយុត្តា, សិយា នីវរណវិប្បយុត្តា. ទសិន្ទ្រិយា ន វត្តព្ពា – ‘‘នីវរណា ចេវ នីវរណិយា ចា’’តិ, នីវរណិយា ចេវ នោ ច នីវរណា. តីណិន្ទ្រិយា ន វត្តព្ពា – ‘‘នីវរណា ចេវ នីវរណិយា ចា’’តិបិ, ‘‘នីវរណិយា ចេវ នោ ច នីវរណា’’តិបិ. នវិន្ទ្រិយា ន វត្តព្ពា – ‘‘នីវរណា ចេវ នីវរណិយា ចា’’តិ, សិយា នីវរណិយា ចេវ នោ ច នីវរណា, សិយា ន វត្តព្ពា – ‘‘នីវរណិយា ចេវ នោ ច នីវរណា’’តិ.

បន្នរសិន្ទ្រិយា ន វត្តព្ពា – ‘‘នីវរណា ចេវ នីវរណសម្បយុត្តា ចា’’តិបិ, ‘‘នីវរណសម្បយុត្តា ចេវ នោ ច នីវរណា’’តិបិ. ទោមនស្សិន្ទ្រិយំ ន វត្តព្ពំ – ‘‘នីវរណញ្ចេវ នីវរណសម្បយុត្តញ្ចា’’តិ, នីវរណសម្បយុត្តញ្ចេវ នោ ច នីវរណំ. ឆ ឥន្ទ្រិយា ន វត្តព្ពា – ‘‘នីវរណា ចេវ នីវរណសម្បយុត្តា ចា’’តិ, សិយា នីវរណសម្បយុត្តា ចេវ នោ ច នីវរណា, សិយា ន វត្តព្ពា – ‘‘នីវរណសម្បយុត្តា ចេវ នោ ច នីវរណា’’តិ.

នវិន្ទ្រិយា នីវរណវិប្បយុត្តនីវរណិយា. តីណិន្ទ្រិយា នីវរណវិប្បយុត្តអនីវរណិយា. ទោមនស្សិន្ទ្រិយំ ន វត្តព្ពំ – ‘‘នីវរណវិប្បយុត្តនីវរណិយ’’ន្តិបិ, ‘‘នីវរណវិប្បយុត្តអនីវរណិយ’’ន្តិបិ. តីណិន្ទ្រិយា សិយា នីវរណវិប្បយុត្តនីវរណិយា, សិយា នីវរណវិប្បយុត្តអនីវរណិយា. ឆ ឥន្ទ្រិយា សិយា នីវរណវិប្បយុត្តនីវរណិយា, សិយា នីវរណវិប្បយុត្តអនីវរណិយា, សិយា ន វត្តព្ពា – ‘‘នីវរណវិប្បយុត្តនីវរណិយា’’តិបិ, ‘‘នីវរណវិប្បយុត្តអនីវរណិយា’’តិបិ.

នោ បរាមាសា. ទសិន្ទ្រិយា បរាមដ្ឋា. តីណិន្ទ្រិយា អបរាមដ្ឋា. នវិន្ទ្រិយា សិយា បរាមដ្ឋា, សិយា អបរាមដ្ឋា. សោឡសិន្ទ្រិយា បរាមាសវិប្បយុត្តា. ឆ ឥន្ទ្រិយា សិយា បរាមាសសម្បយុត្តា, សិយា បរាមាសវិប្បយុត្តា. ទសិន្ទ្រិយា ន វត្តព្ពា – ‘‘បរាមាសា ចេវ បរាមដ្ឋា ចា’’តិ, បរាមដ្ឋា ចេវ នោ ច បរាមាសា. តីណិន្ទ្រិយា ន វត្តព្ពា – ‘‘បរាមាសា ចេវ បរាមដ្ឋា ចា’’តិបិ, ‘‘បរាមដ្ឋា ចេវ នោ ច បរាមាសា’’តិបិ. នវិន្ទ្រិយា ន វត្តព្ពា – ‘‘បរាមាសា ចេវ បរាមដ្ឋា ចា’’តិ, សិយា បរាមដ្ឋា ចេវ នោ ច បរាមាសា, សិយា ន វត្តព្ពា – ‘‘បរាមដ្ឋា ចេវ នោ ច បរាមាសា’’តិ. ទសិន្ទ្រិយា បរាមាសវិប្បយុត្តបរាមដ្ឋា. តីណិន្ទ្រិយា បរាមាសវិប្បយុត្តអបរាមដ្ឋា. តីណិន្ទ្រិយា សិយា បរាមាសវិប្បយុត្តបរាមដ្ឋា, សិយា បរាមាសវិប្បយុត្តអបរាមដ្ឋា. ឆ ឥន្ទ្រិយា សិយា បរាមាសវិប្បយុត្តបរាមដ្ឋា, សិយា បរាមាសវិប្បយុត្តអបរាមដ្ឋា, សិយា ន វត្តព្ពា – ‘‘បរាមាសវិប្បយុត្តបរាមដ្ឋា’’តិបិ, ‘‘បរាមាសវិប្បយុត្តអបរាមដ្ឋា’’តិបិ.

សត្តិន្ទ្រិយា អនារម្មណា. ចុទ្ទសិន្ទ្រិយា សារម្មណា. ជីវិតិន្ទ្រិយំ សិយា សារម្មណំ, សិយា អនារម្មណំ. ឯកវីសតិន្ទ្រិយា នោ ចិត្តា. មនិន្ទ្រិយំ ចិត្តំ. តេរសិន្ទ្រិយា ចេតសិកា. អដ្ឋិន្ទ្រិយា អចេតសិកា. ជីវិតិន្ទ្រិយំ សិយា ចេតសិកំ, សិយា អចេតសិកំ. តេរសិន្ទ្រិយា ចិត្តសម្បយុត្តា. សត្តិន្ទ្រិយា ចិត្តវិប្បយុត្តា. ជីវិតិន្ទ្រិយំ សិយា ចិត្តសម្បយុត្តំ, សិយា ចិត្តវិប្បយុត្តំ. មនិន្ទ្រិយំ ន វត្តព្ពំ – ‘‘ចិត្តេន សម្បយុត្ត’’ន្តិបិ, ‘‘ចិត្តេន វិប្បយុត្ត’’ន្តិបិ.

តេរសិន្ទ្រិយា ចិត្តសំសដ្ឋា. សត្តិន្ទ្រិយា ចិត្តវិសំសដ្ឋា. ជីវិតិន្ទ្រិយំ សិយា ចិត្តសំសដ្ឋំ, សិយា ចិត្តវិសំសដ្ឋំ. មនិន្ទ្រិយំ ន វត្តព្ពំ – ‘‘ចិត្តេន សំសដ្ឋ’’ន្តិបិ, ‘‘ចិត្តេន វិសំសដ្ឋ’’ន្តិបិ. តេរសិន្ទ្រិយា ចិត្តសមុដ្ឋានា. អដ្ឋិន្ទ្រិយា នោ ចិត្តសមុដ្ឋានា. ជីវិតិន្ទ្រិយំ សិយា ចិត្តសមុដ្ឋានំ, សិយា នោ ចិត្តសមុដ្ឋានំ.

តេរសិន្ទ្រិយា ចិត្តសហភុនោ. អដ្ឋិន្ទ្រិយា នោ ចិត្តសហភុនោ. ជីវិតិន្ទ្រិយំ សិយា ចិត្តសហភូ, សិយា នោ ចិត្តសហភូ. តេរសិន្ទ្រិយា ចិត្តានុបរិវត្តិនោ. អដ្ឋិន្ទ្រិយា នោ ចិត្តានុបរិវត្តិនោ. ជីវិតិន្ទ្រិយំ សិយា ចិត្តានុបរិវត្តិ, សិយា នោ ចិត្តានុបរិវត្តិ.

តេរសិន្ទ្រិយា ចិត្តសំសដ្ឋសមុដ្ឋានា. អដ្ឋិន្ទ្រិយា នោ ចិត្តសំសដ្ឋសមុដ្ឋានា. ជីវិតិន្ទ្រិយំ សិយា ចិត្តសំសដ្ឋសមុដ្ឋានំ, សិយា នោ ចិត្តសំសដ្ឋសមុដ្ឋានំ. តេរសិន្ទ្រិយា ចិត្តសំសដ្ឋសមុដ្ឋានសហភុនោ. អដ្ឋិន្ទ្រិយា នោ ចិត្តសំសដ្ឋសមុដ្ឋានសហភុនោ. ជីវិតិន្ទ្រិយំ សិយា ចិត្តសំសដ្ឋសមុដ្ឋានសហភូ, សិយា នោ ចិត្តសំសដ្ឋសមុដ្ឋានសហភូ. តេរសិន្ទ្រិយា ចិត្តសំសដ្ឋសមុដ្ឋានានុបរិវត្តិនោ. អដ្ឋិន្ទ្រិយា នោ ចិត្តសំសដ្ឋសមុដ្ឋានានុបរិវត្តិនោ. ជីវិតិន្ទ្រិយំ សិយា ចិត្តសំសដ្ឋសមុដ្ឋានានុបរិវត្តិ, សិយា នោ ចិត្តសំសដ្ឋសមុដ្ឋានានុបរិវត្តិ. ឆ ឥន្ទ្រិយា អជ្ឈត្តិកា. សោឡសិន្ទ្រិយា ពាហិរា.

សត្តិន្ទ្រិយា ឧបាទា. ចុទ្ទសិន្ទ្រិយា នោ ឧបាទា. ជីវិតិន្ទ្រិយំ សិយា ឧបាទា, សិយា នោ ឧបាទា. នវិន្ទ្រិយា ឧបាទិន្នា. ចត្តារិន្ទ្រិយា អនុបាទិន្នា. នវិន្ទ្រិយា សិយា ឧបាទិន្នា, សិយា អនុបាទិន្នា. នោ ឧបាទានា. ទសិន្ទ្រិយា ឧបាទានិយា. តីណិន្ទ្រិយា អនុបាទានិយា. នវិន្ទ្រិយា សិយា ឧបាទានិយា, សិយា អនុបាទានិយា. សោឡសិន្ទ្រិយា ឧបាទានវិប្បយុត្តា. ឆ ឥន្ទ្រិយា សិយា ឧបាទានសម្បយុត្តា, សិយា ឧបាទានវិប្បយុត្តា. ទសិន្ទ្រិយា ន វត្តព្ពា – ‘‘ឧបាទានា ចេវ ឧបាទានិយា ចា’’តិ, ឧបាទានិយា ចេវ នោ ច ឧបាទានា. តីណិន្ទ្រិយា ន វត្តព្ពា – ‘‘ឧបាទានា ចេវ ឧបាទានិយា ចា’’តិបិ, ‘‘ឧបាទានិយា ចេវ នោ ច ឧបាទានា’’តិបិ. នវិន្ទ្រិយា ន វត្តព្ពា – ‘‘ឧបាទានា ចេវ ឧបាទានិយា ចា’’តិ, សិយា ឧបាទានិយា ចេវ នោ ច ឧបាទានា. ទសិន្ទ្រិយា សិយា ឧបាទានិយា ចេវ នោ ច ឧបាទានា, សិយា ន វត្តព្ពា – ‘‘ឧបាទានិយា ចេវ នោ ច ឧបាទានា’’តិ.

សោឡសិន្ទ្រិយា ន វត្តព្ពា – ‘‘ឧបាទានា ចេវ ឧបាទានសម្បយុត្តា ចា’’តិបិ, ‘‘ឧបាទានសម្បយុត្តា ចេវ នោ ច ឧបាទានា’’តិបិ. ឆ ឥន្ទ្រិយា ន វត្តព្ពា – ‘‘ឧបាទានា ចេវ ឧបាទានសម្បយុត្តា ចា’’តិ, សិយា ឧបាទានសម្បយុត្តា ចេវ នោ ច ឧបាទានា, សិយា ន វត្តព្ពា – ‘‘ឧបាទានសម្បយុត្តា ចេវ នោ ច ឧបាទានា’’តិ. ទសិន្ទ្រិយា ឧបាទានវិប្បយុត្តឧបាទានិយា. តីណិន្ទ្រិយា ឧបាទានវិប្បយុត្តអនុបាទានិយា. តីណិន្ទ្រិយា សិយា ឧបាទានវិប្បយុត្តឧបាទានិយា, សិយា ឧបាទានវិប្បយុត្តអនុបាទានិយា. ឆ ឥន្ទ្រិយា សិយា ឧបាទានវិប្បយុត្តឧបាទានិយា, សិយា ឧបាទានវិប្បយុត្តអនុបាទានិយា, សិយា ន វត្តព្ពា – ‘‘ឧបាទានវិប្បយុត្តឧបាទានិយា’’តិបិ, ‘‘ឧបាទានវិប្បយុត្តអនុបាទានិយា’’តិបិ.

នោ កិលេសា. ទសិន្ទ្រិយា សំកិលេសិកា. តីណិន្ទ្រិយា អសំកិលេសិកា. នវិន្ទ្រិយា សិយា សំកិលេសិកា, សិយា អសំកិលេសិកា. បន្នរសិន្ទ្រិយា អសំកិលិដ្ឋា. ទោមនស្សិន្ទ្រិយំ សំកិលិដ្ឋំ. ឆ ឥន្ទ្រិយា សិយា សំកិលិដ្ឋា, សិយា អសំកិលិដ្ឋា. បន្នរសិន្ទ្រិយា កិលេសវិប្បយុត្តា. ទោមនស្សិន្ទ្រិយំ កិលេសសម្បយុត្តំ. ឆ ឥន្ទ្រិយា សិយា កិលេសសម្បយុត្តា, សិយា កិលេសវិប្បយុត្តា. ទសិន្ទ្រិយា ន វត្តព្ពា – ‘‘កិលេសា ចេវ សំកិលេសិកា ចា’’តិ, សំកិលេសិកា ចេវ នោ ច កិលេសា. តីណិន្ទ្រិយា ន វត្តព្ពា – ‘‘កិលេសា ចេវ សំកិលេសិកា ចា’’តិបិ, ‘‘សំកិលេសិកា ចេវ នោ ច កិលេសា’’តិបិ. នវិន្ទ្រិយា ន វត្តព្ពា – ‘‘កិលេសា ចេវ សំកិលេសិកា ចា’’តិ, សិយា សំកិលេសិកា ចេវ នោ ច កិលេសា, សិយា ន វត្តព្ពា – ‘‘សំកិលេសិកា ចេវ នោ ច កិលេសា’’តិ.

បន្នរសិន្ទ្រិយា ន វត្តព្ពា – ‘‘កិលេសា ចេវ សំកិលិដ្ឋា ចា’’តិបិ, ‘‘សំកិលិដ្ឋា ចេវ នោ ច កិលេសា’’តិបិ. ទោមនស្សិន្ទ្រិយំ ន វត្តព្ពំ – ‘‘កិលេសោ ចេវ សំកិលិដ្ឋញ្ចា’’តិ, សំកិលិដ្ឋញ្ចេវ នោ ច កិលេសោ. ឆ ឥន្ទ្រិយា ន វត្តព្ពា – ‘‘កិលេសា ចេវ សំកិលិដ្ឋា ចា’’តិ, សិយា សំកិលិដ្ឋា ចេវ នោ ច កិលេសា, សិយា ន វត្តព្ពា – ‘‘សំកិលិដ្ឋា ចេវ នោ ច កិលេសា’’តិ.

បន្នរសិន្ទ្រិយា ន វត្តព្ពា – ‘‘កិលេសា ចេវ កិលេសសម្បយុត្តា ចា’’តិបិ, ‘‘កិលេសសម្បយុត្តា ចេវ នោ ច កិលេសា’’តិបិ. ទោមនស្សិន្ទ្រិយំ ន វត្តព្ពំ – ‘‘កិលេសោ ចេវ កិលេសសម្បយុត្តញ្ចា’’តិ, កិលេសសម្បយុត្តញ្ចេវ នោ ច កិលេសោ. ឆ ឥន្ទ្រិយា ន វត្តព្ពា – ‘‘កិលេសា ចេវ កិលេសសម្បយុត្តា ចា’’តិ, សិយា កិលេសសម្បយុត្តា ចេវ នោ ច កិលេសា, សិយា ន វត្តព្ពា – ‘‘កិលេសសម្បយុត្តា ចេវ នោ ច កិលេសា’’តិ. នវិន្ទ្រិយា កិលេសវិប្បយុត្តសំកិលេសិកា. តីណិន្ទ្រិយា កិលេសវិប្បយុត្តអសំកិលេសិកា. ទោមនស្សិន្ទ្រិយំ ន វត្តព្ពំ – ‘‘កិលេសវិប្បយុត្តសំកិលេសិក’’ន្តិបិ, ‘‘កិលេសវិប្បយុត្តអសំកិលេសិក’’ន្តិបិ. តីណិន្ទ្រិយា សិយា កិលេសវិប្បយុត្តសំកិលេសិកា, សិយា កិលេសវិប្បយុត្តអសំកិលេសិកា. ឆ ឥន្ទ្រិយា សិយា កិលេសវិប្បយុត្តសំកិលេសិកា, សិយា កិលេសវិប្បយុត្តអសំកិលេសិកា, សិយា ន វត្តព្ពា – ‘‘កិលេសវិប្បយុត្តសំកិលេសិកា’’តិបិ, ‘‘កិលេសវិប្បយុត្តអសំកិលេសិកា’’តិបិ.

បន្នរសិន្ទ្រិយា ន ទស្សនេន បហាតព្ពា. សត្តិន្ទ្រិយា សិយា ទស្សនេន បហាតព្ពា, សិយា ន ទស្សនេន បហាតព្ពា. បន្នរសិន្ទ្រិយា ន ភាវនាយ បហាតព្ពា. សត្តិន្ទ្រិយា សិយា ភាវនាយ បហាតព្ពា, សិយា ន ភាវនាយ បហាតព្ពា. បន្នរសិន្ទ្រិយា ន ទស្សនេន បហាតព្ពហេតុកា. សត្តិន្ទ្រិយា សិយា ទស្សនេន បហាតព្ពហេតុកា, សិយា ន ទស្សនេន បហាតព្ពហេតុកា. បន្នរសិន្ទ្រិយា ន ភាវនាយ បហាតព្ពហេតុកា. សត្តិន្ទ្រិយា សិយា ភាវនាយ បហាតព្ពហេតុកា, សិយា ន ភាវនាយ បហាតព្ពហេតុកា.

នវិន្ទ្រិយា អវិតក្កា. ទោមនស្សិន្ទ្រិយំ សវិតក្កំ. ទ្វាទសិន្ទ្រិយា សិយា សវិតក្កា, សិយា អវិតក្កា. នវិន្ទ្រិយា អវិចារា. ទោមនស្សិន្ទ្រិយំ សវិចារំ. ទ្វាទសិន្ទ្រិយា សិយា សវិចារា, សិយា អវិចារា. ឯកាទសិន្ទ្រិយា អប្បីតិកា. ឯកាទសិន្ទ្រិយា សិយា សប្បីតិកា, សិយា អប្បីតិកា. ឯកាទសិន្ទ្រិយា ន បីតិសហគតា. ឯកាទសិន្ទ្រិយា សិយា បីតិសហគតា, សិយា ន បីតិសហគតា. ទ្វាទសិន្ទ្រិយា ន សុខសហគតា. ទសិន្ទ្រិយា សិយា សុខសហគតា, សិយា ន សុខសហគតា. ទ្វាទសិន្ទ្រិយា ន ឧបេក្ខាសហគតា. ទសិន្ទ្រិយា សិយា ឧបេក្ខាសហគតា, សិយា ន ឧបេក្ខាសហគតា.

ទសិន្ទ្រិយា កាមាវចរា. តីណិន្ទ្រិយា ន កាមាវចរា. នវិន្ទ្រិយា សិយា កាមាវចរា, សិយា ន កាមាវចរា. តេរសិន្ទ្រិយា ន រូបាវចរា. នវិន្ទ្រិយា សិយា រូបាវចរា, សិយា ន រូបាវចរា. ចុទ្ទសិន្ទ្រិយា ន អរូបាវចរា. អដ្ឋិន្ទ្រិយា សិយា អរូបាវចរា, សិយា ន អរូបាវចរា. ទសិន្ទ្រិយា បរិយាបន្នា. តីណិន្ទ្រិយា អបរិយាបន្នា. នវិន្ទ្រិយា សិយា បរិយាបន្នា, សិយា អបរិយាបន្នា. ឯកាទសិន្ទ្រិយា អនិយ្យានិកា. អនញ្ញាតញ្ញស្សាមីតិន្ទ្រិយំ និយ្យានិកំ. ទសិន្ទ្រិយា សិយា និយ្យានិកា, សិយា អនិយ្យានិកា. ទសិន្ទ្រិយា អនិយតា. អនញ្ញាតញ្ញស្សាមីតិន្ទ្រិយំ និយតំ. ឯកាទសិន្ទ្រិយា សិយា និយតា, សិយា អនិយតា. ទសិន្ទ្រិយា សឧត្តរា. តីណិន្ទ្រិយា អនុត្តរា. នវិន្ទ្រិយា សិយា សឧត្តរា, សិយា អនុត្តរា. បន្នរសិន្ទ្រិយា អរណា. ទោមនស្សិន្ទ្រិយំ សរណំ. ឆ ឥន្ទ្រិយា សិយា សរណា, សិយា អរណាតិ.

បញ្ហាបុច្ឆកំ.

ឥន្ទ្រិយវិភង្គោ និដ្ឋិតោ.