៥. បញ្ចកនិទ្ទេសោ

៨០៤. (១) តត្ថ កតមោ បញ្ចង្គិកោ សម្មាសមាធិ? បីតិផរណតា, សុខផរណតា, ចេតោផរណតា, អាលោកផរណតា, បច្ចវេក្ខណានិមិត្តំ. ទ្វីសុ ឈានេសុ បញ្ញា បីតិផរណតា. តីសុ ឈានេសុ បញ្ញា សុខផរណតា. បរចិត្តេ ញាណំ ចេតោផរណតា. ទិព្ពចក្ខុ អាលោកផរណតា. តម្ហា តម្ហា សមាធិម្ហា វុដ្ឋិតស្ស បច្ចវេក្ខណាញាណំ បច្ចវេក្ខណានិមិត្តំ. អយំ វុច្ចតិ បញ្ចង្គិកោ សម្មាសមាធិ.

(២) តត្ថ កតមោ បញ្ចញាណិកោ សម្មាសមាធិ? ‘‘អយំ សមាធិ បច្ចុប្បន្នសុខោ ចេវ អាយតិញ្ច សុខវិបាកោ’’តិ បច្ចត្តញ្ញេវ ញាណំ ឧប្បជ្ជតិ. ‘‘អយំ សមាធិ អរិយោ និរាមិសោ’’តិ បច្ចត្តញ្ញេវ ញាណំ ឧប្បជ្ជតិ. ‘‘អយំ សមាធិ អកាបុរិសសេវិតោ’’តិ បច្ចត្តញ្ញេវ ញាណំ ឧប្បជ្ជតិ. ‘‘អយំ សមាធិ សន្តោ បណីតោ បដិប្បស្សទ្ធលទ្ធោ ឯកោទិភាវាធិគតោ ន សសង្ខារនិគ្គយ្ហវារិតគតោ’’តិ បច្ចត្តញ្ញេវ ញាណំ ឧប្បជ្ជតិ. សោ ខោ បនាហំ ឥមំ សមាធិំ សតោ សមាបជ្ជាមិ សតោ វុដ្ឋហាមី’’តិ បច្ចត្តញ្ញេវ ញាណំ ឧប្បជ្ជតិ. អយំ បញ្ចញាណិកោ សម្មាសមាធិ. ឯវំ បញ្ចវិធេន ញាណវត្ថុ.

បញ្ចកំ.