១០. ពោជ្ឈង្គវិភង្គោ

១. សុត្តន្តភាជនីយំ

៤៦៦. សត្ត ពោជ្ឈង្គា – សតិសម្ពោជ្ឈង្គោ, ធម្មវិចយសម្ពោជ្ឈង្គោ, វីរិយសម្ពោជ្ឈង្គោ, បីតិសម្ពោជ្ឈង្គោ, បស្សទ្ធិសម្ពោជ្ឈង្គោ, សមាធិសម្ពោជ្ឈង្គោ, ឧបេក្ខាសម្ពោជ្ឈង្គោ.

៤៦៧. តត្ថ កតមោ សតិសម្ពោជ្ឈង្គោ? ឥធ ភិក្ខុ សតិមា ហោតិ បរមេន សតិនេបក្កេន សមន្នាគតោ, ចិរកតម្បិ ចិរភាសិតម្បិ សរិតា ហោតិ អនុស្សរិតា – អយំ វុច្ចតិ ‘‘សតិសម្ពោជ្ឈង្គោ’’.

សោ តថា សតោ វិហរន្តោ តំ ធម្មំ បញ្ញាយ បវិចិនតិ បវិចរតិ បរិវីមំសមាបជ្ជតិ – អយំ វុច្ចតិ ‘‘ធម្មវិចយសម្ពោជ្ឈង្គោ’’.

តស្ស តំ ធម្មំ បញ្ញាយ បវិចិនតោ បវិចរតោ បរិវីមំសមាបជ្ជតោ អារទ្ធំ ហោតិ វីរិយំ អសល្លីនំ – អយំ វុច្ចតិ ‘‘វីរិយសម្ពោជ្ឈង្គោ’’.

អារទ្ធវីរិយស្ស ឧប្បជ្ជតិ បីតិ និរាមិសា – អយំ វុច្ចតិ ‘‘បីតិសម្ពោជ្ឈង្គោ’’.

បីតិមនស្ស កាយោបិ បស្សម្ភតិ, ចិត្តម្បិ បស្សម្ភតិ – អយំ វុច្ចតិ ‘‘បស្សទ្ធិសម្ពោជ្ឈង្គោ’’.

បស្សទ្ធកាយស្ស សុខិនោ ចិត្តំ សមាធិយតិ – អយំ វុច្ចតិ ‘‘សមាធិសម្ពោជ្ឈង្គោ’’.

សោ តថា សមាហិតំ ចិត្តំ សាធុកំ អជ្ឈុបេក្ខិតា ហោតិ – អយំ វុច្ចតិ ‘‘ឧបេក្ខាសម្ពោជ្ឈង្គោ’’.

៤៦៨. សត្ត ពោជ្ឈង្គា – សតិសម្ពោជ្ឈង្គោ, ធម្មវិចយសម្ពោជ្ឈង្គោ, វីរិយសម្ពោជ្ឈង្គោ, បីតិសម្ពោជ្ឈង្គោ, បស្សទ្ធិសម្ពោជ្ឈង្គោ, សមាធិសម្ពោជ្ឈង្គោ, ឧបេក្ខាសម្ពោជ្ឈង្គោ.

៤៦៩. តត្ថ កតមោ សតិសម្ពោជ្ឈង្គោ? អត្ថិ អជ្ឈត្តំ ធម្មេសុ សតិ, អត្ថិ ពហិទ្ធា ធម្មេសុ សតិ. យទបិ អជ្ឈត្តំ ធម្មេសុ សតិ តទបិ សតិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ ពហិទ្ធា ធម្មេសុ សតិ តទបិ សតិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

តត្ថ កតមោ ធម្មវិចយសម្ពោជ្ឈង្គោ? អត្ថិ អជ្ឈត្តំ ធម្មេសុ បវិចយោ, អត្ថិ ពហិទ្ធា ធម្មេសុ បវិចយោ. យទបិ អជ្ឈត្តំ ធម្មេសុ បវិចយោ តទបិ ធម្មវិចយសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ ពហិទ្ធា ធម្មេសុ បវិចយោ តទបិ ធម្មវិចយសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

តត្ថ កតមោ វីរិយសម្ពោជ្ឈង្គោ? អត្ថិ កាយិកំ វីរិយំ, អត្ថិ ចេតសិកំ វីរិយំ. យទបិ កាយិកំ វីរិយំ តទបិ វីរិយសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ ចេតសិកំ វីរិយំ តទបិ វីរិយសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

តត្ថ កតមោ បីតិសម្ពោជ្ឈង្គោ? អត្ថិ សវិតក្កសវិចារា បីតិ, អត្ថិ អវិតក្កអវិចារា បីតិ. យទបិ សវិតក្កសវិចារា បីតិ តទបិ បីតិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ អវិតក្កអវិចារា បីតិ តទបិ បីតិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

តត្ថ កតមោ បស្សទ្ធិសម្ពោជ្ឈង្គោ? អត្ថិ កាយបស្សទ្ធិ [កាយប្បស្សទ្ធិ (ស្យា. ក.)], អត្ថិ ចិត្តបស្សទ្ធិ [ចិត្តប្បស្សទ្ធិ (ស្យា. ក.)]. យទបិ កាយបស្សទ្ធិ តទបិ បស្សទ្ធិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ ចិត្តបស្សទ្ធិ តទបិ បស្សទ្ធិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

តត្ថ កតមោ សមាធិសម្ពោជ្ឈង្គោ? អត្ថិ សវិតក្កោ សវិចារោ សមាធិ, អត្ថិ អវិតក្កោ អវិចារោ សមាធិ. យទបិ សវិតក្កោ សវិចារោ សមាធិ តទបិ សមាធិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ អវិតក្កោ អវិចារោ សមាធិ តទបិ សមាធិសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

តត្ថ កតមោ ឧបេក្ខាសម្ពោជ្ឈង្គោ? អត្ថិ អជ្ឈត្តំ ធម្មេសុ ឧបេក្ខា, អត្ថិ ពហិទ្ធា ធម្មេសុ ឧបេក្ខា. យទបិ អជ្ឈត្តំ ធម្មេសុ ឧបេក្ខា តទបិ ឧបេក្ខាសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ. យទបិ ពហិទ្ធា ធម្មេសុ ឧបេក្ខា តទបិ ឧបេក្ខាសម្ពោជ្ឈង្គោ អភិញ្ញាយ សម្ពោធាយ និព្ពានាយ សំវត្តតិ.

៤៧០. សត្ត ពោជ្ឈង្គា – សតិសម្ពោជ្ឈង្គោ, ធម្មវិចយសម្ពោជ្ឈង្គោ, វីរិយសម្ពោជ្ឈង្គោ, បីតិសម្ពោជ្ឈង្គោ, បស្សទ្ធិសម្ពោជ្ឈង្គោ, សមាធិសម្ពោជ្ឈង្គោ, ឧបេក្ខាសម្ពោជ្ឈង្គោ.

៤៧១. តត្ថ កតមោ សតិសម្ពោជ្ឈង្គោ? ឥធ ភិក្ខុ សតិសម្ពោជ្ឈង្គំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមិំ, ធម្មវិចយសម្ពោជ្ឈង្គំ ភាវេតិ…បេ… វីរិយសម្ពោជ្ឈង្គំ ភាវេតិ… បីតិសម្ពោជ្ឈង្គំ ភាវេតិ… បស្សទ្ធិសម្ពោជ្ឈង្គំ ភាវេតិ… សមាធិសម្ពោជ្ឈង្គំ ភាវេតិ… ឧបេក្ខាសម្ពោជ្ឈង្គំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមិំ.

សុត្តន្តភាជនីយំ.

២. អភិធម្មភាជនីយំ

៤៧២. សត្ត ពោជ្ឈង្គា – សតិសម្ពោជ្ឈង្គោ, ធម្មវិចយសម្ពោជ្ឈង្គោ, វីរិយសម្ពោជ្ឈង្គោ, បីតិសម្ពោជ្ឈង្គោ, បស្សទ្ធិសម្ពោជ្ឈង្គោ, សមាធិសម្ពោជ្ឈង្គោ, ឧបេក្ខាសម្ពោជ្ឈង្គោ.

៤៧៣. តត្ថ កតមេ សត្ត ពោជ្ឈង្គា? ឥធ ភិក្ខុ យស្មិំ សមយេ លោកុត្តរំ ឈានំ ភាវេតិ និយ្យានិកំ អបចយគាមិំ ទិដ្ឋិគតានំ បហានាយ បឋមាយ ភូមិយា បត្តិយា វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, តស្មិំ សមយេ សត្ត ពោជ្ឈង្គា ហោន្តិ – សតិសម្ពោជ្ឈង្គោ…បេ… ឧបេក្ខាសម្ពោជ្ឈង្គោ.

៤៧៤. តត្ថ កតមោ សតិសម្ពោជ្ឈង្គោ? យា សតិ អនុស្សតិ…បេ… សម្មាសតិ សតិសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘សតិសម្ពោជ្ឈង្គោ’’.

តត្ថ កតមោ ធម្មវិចយសម្ពោជ្ឈង្គោ? យា បញ្ញា បជាននា…បេ… អមោហោ ធម្មវិចយោ សម្មាទិដ្ឋិ ធម្មវិចយសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘ធម្មវិចយសម្ពោជ្ឈង្គោ’’.

តត្ថ កតមោ វីរិយសម្ពោជ្ឈង្គោ? យោ ចេតសិកោ វីរិយារម្ភោ…បេ… សម្មាវាយាមោ វីរិយសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘វីរិយសម្ពោជ្ឈង្គោ’’.

តត្ថ កតមោ បីតិសម្ពោជ្ឈង្គោ? យា បីតិ បាមោជ្ជំ អាមោទនា បមោទនា ហាសោ បហាសោ វិត្តិ ឱទគ្យំ [ឱទគ្គំ (សី.) ធ. ស. ៩] អត្តមនតា ចិត្តស្ស បីតិសម្ពោជ្ឈង្គោ – អយំ វុច្ចតិ ‘‘បីតិសម្ពោជ្ឈង្គោ’’.

តត្ថ កតមោ បស្សទ្ធិសម្ពោជ្ឈង្គោ? យា វេទនាក្ខន្ធស្ស សញ្ញាក្ខន្ធស្ស សង្ខារក្ខន្ធស្ស វិញ្ញាណក្ខន្ធស្ស បស្សទ្ធិ បដិប្បស្សទ្ធិ បស្សម្ភនា បដិប្បស្សម្ភនា បដិប្បស្សម្ភិតត្តំ បស្សទ្ធិសម្ពោជ្ឈង្គោ – អយំ វុច្ចតិ ‘‘បស្សទ្ធិសម្ពោជ្ឈង្គោ’’.

តត្ថ កតមោ សមាធិសម្ពោជ្ឈង្គោ? យា ចិត្តស្ស ឋិតិ…បេ… សម្មាសមាធិ សមាធិសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘សមាធិសម្ពោជ្ឈង្គោ’’.

តត្ថ កតមោ ឧបេក្ខាសម្ពោជ្ឈង្គោ? យា ឧបេក្ខា ឧបេក្ខនា អជ្ឈុបេក្ខនា មជ្ឈត្តតា ចិត្តស្ស ឧបេក្ខាសម្ពោជ្ឈង្គោ – អយំ វុច្ចតិ ‘‘ឧបេក្ខាសម្ពោជ្ឈង្គោ’’. ឥមេ វុច្ចន្តិ សត្ត ពោជ្ឈង្គា. អវសេសា ធម្មា សត្តហិ ពោជ្ឈង្គេហិ សម្បយុត្តា.

៤៧៥. សត្ត ពោជ្ឈង្គា – សតិសម្ពោជ្ឈង្គោ…បេ… ឧបេក្ខាសម្ពោជ្ឈង្គោ.

៤៧៦. តត្ថ កតមោ សតិសម្ពោជ្ឈង្គោ? ឥធ ភិក្ខុ យស្មិំ សមយេ លោកុត្តរំ ឈានំ ភាវេតិ និយ្យានិកំ អបចយគាមិំ ទិដ្ឋិគតានំ បហានាយ បឋមាយ ភូមិយា បត្តិយា វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, យា តស្មិំ សមយេ សតិ អនុស្សតិ សម្មាសតិ សតិសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘សតិសម្ពោជ្ឈង្គោ’’. អវសេសា ធម្មា សតិសម្ពោជ្ឈង្គសម្បយុត្តា…បេ… អវសេសា ធម្មា ធម្មវិចយសម្ពោជ្ឈង្គសម្បយុត្តា…បេ… អវសេសា ធម្មា វីរិយសម្ពោជ្ឈង្គសម្បយុត្តា…បេ… អវសេសា ធម្មា បីតិសម្ពោជ្ឈង្គសម្បយុត្តា…បេ… អវសេសា ធម្មា បស្សទ្ធិសម្ពោជ្ឈង្គសម្បយុត្តា…បេ… អវសេសា ធម្មា សមាធិសម្ពោជ្ឈង្គសម្បយុត្តា.

តត្ថ កតមោ ឧបេក្ខាសម្ពោជ្ឈង្គោ? ឥធ ភិក្ខុ យស្មិំ សមយេ លោកុត្តរំ ឈានំ ភាវេតិ និយ្យានិកំ អបចយគាមិំ ទិដ្ឋិគតានំ បហានាយ បឋមាយ ភូមិយា បត្តិយា វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, យា តស្មិំ សមយេ ឧបេក្ខា ឧបេក្ខនា អជ្ឈុបេក្ខនា មជ្ឈត្តតា ចិត្តស្ស ឧបេក្ខាសម្ពោជ្ឈង្គោ – អយំ វុច្ចតិ ‘‘ឧបេក្ខាសម្ពោជ្ឈង្គោ’’. អវសេសា ធម្មា ឧបេក្ខាសម្ពោជ្ឈង្គសម្បយុត្តា.

៤៧៧. សត្ត ពោជ្ឈង្គា – សតិសម្ពោជ្ឈង្គោ…បេ… ឧបេក្ខាសម្ពោជ្ឈង្គោ.

៤៧៨. តត្ថ កតមេ សត្ត ពោជ្ឈង្គា? ឥធ ភិក្ខុ យស្មិំ សមយេ លោកុត្តរំ ឈានំ ភាវេតិ និយ្យានិកំ អបចយគាមិំ ទិដ្ឋិគតានំ បហានាយ បឋមាយ ភូមិយា បត្តិយា វិវិច្ចេវ កាមេហិ …បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, យោ តស្មិំ សមយេ ផស្សោ ហោតិ…បេ… អវិក្ខេបោ ហោតិ – ឥមេ ធម្មា កុសលា. តស្សេវ លោកុត្តរស្ស កុសលស្ស ឈានស្ស កតត្តា ភាវិតត្តា វិបាកំ វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ សុញ្ញតំ, តស្មិំ សមយេ សត្ត ពោជ្ឈង្គា ហោន្តិ – សតិសម្ពោជ្ឈង្គោ…បេ… ឧបេក្ខាសម្ពោជ្ឈង្គោ.

៤៧៩. តត្ថ កតមោ សតិសម្ពោជ្ឈង្គោ? យា សតិ អនុស្សតិ…បេ… សម្មាសតិ សតិសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘សតិសម្ពោជ្ឈង្គោ’’…បេ….

តត្ថ កតមោ ឧបេក្ខាសម្ពោជ្ឈង្គោ? យា ឧបេក្ខា ឧបេក្ខនា អជ្ឈុបេក្ខនា មជ្ឈត្តតា ចិត្តស្ស ឧបេក្ខាសម្ពោជ្ឈង្គោ – អយំ វុច្ចតិ ‘‘ឧបេក្ខាសម្ពោជ្ឈង្គោ’’. ឥមេ វុច្ចន្តិ ‘‘សត្ត ពោជ្ឈង្គា’’. អវសេសា ធម្មា សត្តហិ ពោជ្ឈង្គេហិ សម្បយុត្តា.

៤៨០. សត្ត ពោជ្ឈង្គា – សតិសម្ពោជ្ឈង្គោ…បេ… ឧបេក្ខាសម្ពោជ្ឈង្គោ.

៤៨១. តត្ថ កតមោ សតិសម្ពោជ្ឈង្គោ? ឥធ ភិក្ខុ យស្មិំ សមយេ លោកុត្តរំ ឈានំ ភាវេតិ និយ្យានិកំ អបចយគាមិំ ទិដ្ឋិគតានំ បហានាយ បឋមាយ ភូមិយា បត្តិយា វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, តស្មិំ សមយេ ផស្សោ ហោតិ…បេ… អវិក្ខេបោ ហោតិ. ឥមេ ធម្មា កុសលា. តស្សេវ លោកុត្តរស្ស កុសលស្ស ឈានស្ស កតត្តា ភាវិតត្តា វិបាកំ វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, យា តស្មិំ សមយេ សតិ អនុស្សតិ សម្មាសតិ សតិសម្ពោជ្ឈង្គោ មគ្គង្គំ មគ្គបរិយាបន្នំ – អយំ វុច្ចតិ ‘‘សតិសម្ពោជ្ឈង្គោ’’. អវសេសា ធម្មា សតិសម្ពោជ្ឈង្គសម្បយុត្តា…បេ… អវសេសា ធម្មា ធម្មវិចយសម្ពោជ្ឈង្គសម្បយុត្តា …បេ… អវសេសា ធម្មា វីរិយសម្ពោជ្ឈង្គសម្បយុត្តា…បេ… អវសេសា ធម្មា បីតិសម្ពោជ្ឈង្គសម្បយុត្តា…បេ… អវសេសា ធម្មា បស្សទ្ធិសម្ពោជ្ឈង្គសម្បយុត្តា…បេ… អវសេសា ធម្មា សមាធិសម្ពោជ្ឈង្គសម្បយុត្តា.

តត្ថ កតមោ ឧបេក្ខាសម្ពោជ្ឈង្គោ? ឥធ ភិក្ខុ យស្មិំ សមយេ លោកុត្តរំ ឈានំ ភាវេតិ និយ្យានិកំ អបចយគាមិំ ទិដ្ឋិគតានំ បហានាយ បឋមាយ ភូមិយា បត្តិយា វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ, តស្មិំ សមយេ ផស្សោ ហោតិ…បេ… អវិក្ខេបោ ហោតិ. ឥមេ ធម្មា កុសលា. តស្សេវ លោកុត្តរស្ស កុសលស្ស ឈានស្ស កតត្តា ភាវិតត្តា វិបាកំ វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ ទុក្ខបដិបទំ ទន្ធាភិញ្ញំ សុញ្ញតំ, យា តស្មិំ សមយេ ឧបេក្ខា ឧបេក្ខនា អជ្ឈុបេក្ខនា មជ្ឈត្តតា ចិត្តស្ស ឧបេក្ខាសម្ពោជ្ឈង្គោ – អយំ វុច្ចតិ ‘‘ឧបេក្ខាសម្ពោជ្ឈង្គោ’’. អវសេសា ធម្មា ឧបេក្ខាសម្ពោជ្ឈង្គសម្បយុត្តា.

អភិធម្មភាជនីយំ.

៣. បញ្ហាបុច្ឆកំ

៤៨២. សត្ត ពោជ្ឈង្គា – សតិសម្ពោជ្ឈង្គោ, ធម្មវិចយសម្ពោជ្ឈង្គោ, វីរិយសម្ពោជ្ឈង្គោ, បីតិសម្ពោជ្ឈង្គោ, បស្សទ្ធិសម្ពោជ្ឈង្គោ, សមាធិសម្ពោជ្ឈង្គោ, ឧបេក្ខាសម្ពោជ្ឈង្គោ.

៤៨៣. សត្តន្នំ ពោជ្ឈង្គានំ កតិ កុសលា, កតិ អកុសលា, កតិ អព្យាកតា…បេ… កតិ សរណា, កតិ អរណា?

១. តិកំ

៤៨៤. សិយា កុសលា, សិយា អព្យាកតា. បីតិសម្ពោជ្ឈង្គោ សុខាយ វេទនាយ សម្បយុត្តោ; ឆ ពោជ្ឈង្គា សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. សិយា វិបាកា, សិយា វិបាកធម្មធម្មា. អនុបាទិន្នអនុបាទានិយា. អសំកិលិដ្ឋអសំកិលេសិកា. សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. បីតិសម្ពោជ្ឈង្គោ ន បីតិសហគតោ, សុខសហគតោ, ន ឧបេក្ខាសហគតោ; ឆ ពោជ្ឈង្គា សិយា បីតិសហគតា, សិយា សុខសហគតា, សិយា ឧបេក្ខាសហគតា. នេវ ទស្សនេន ន ភាវនាយ បហាតព្ពា. នេវ ទស្សនេន ន ភាវនាយ បហាតព្ពហេតុកា. សិយា អបចយគាមិនោ, សិយា នេវាចយគាមិនាបចយគាមិនោ. សិយា សេក្ខា, សិយា អសេក្ខា. អប្បមាណា. អប្បមាណារម្មណា. បណីតា. សិយា សម្មត្តនិយតា, សិយា អនិយតា. ន មគ្គារម្មណា, សិយា មគ្គហេតុកា, សិយា មគ្គាធិបតិនោ; សិយា ន វត្តព្ពា មគ្គហេតុកាតិបិ, មគ្គាធិបតិនោតិបិ. សិយា ឧប្បន្នា, សិយា អនុប្បន្នា, សិយា ឧប្បាទិនោ. សិយា អតីតា, សិយា អនាគតា, សិយា បច្ចុប្បន្នា. ន វត្តព្ពា អតីតារម្មណាតិបិ, អនាគតារម្មណាតិបិ, បច្ចុប្បន្នារម្មណាតិបិ. សិយា អជ្ឈត្តា, សិយា ពហិទ្ធា, សិយា អជ្ឈត្តពហិទ្ធា. ពហិទ្ធារម្មណា. អនិទស្សនអប្បដិឃា.

២. ទុកំ

៤៨៥. ធម្មវិចយសម្ពោជ្ឈង្គោ ហេតុ, ឆ ពោជ្ឈង្គា ហេតុសម្បយុត្តា. ធម្មវិចយសម្ពោជ្ឈង្គោ ហេតុ ចេវ សហេតុកោ ច, ឆ ពោជ្ឈង្គា ន វត្តព្ពា ហេតូ ចេវ សហេតុកា ចាតិ, សហេតុកា ចេវ ន ច ហេតូ. ធម្មវិចយសម្ពោជ្ឈង្គោ ហេតុ ចេវ ហេតុសម្បយុត្តោ ច, ឆ ពោជ្ឈង្គា ន វត្តព្ពា ហេតូ ចេវ ហេតុសម្បយុត្តា ចាតិ, ហេតុសម្បយុត្តា ចេវ ន ច ហេតូ. ឆ ពោជ្ឈង្គា ន ហេតូ សហេតុកា, ធម្មវិចយសម្ពោជ្ឈង្គោ ន វត្តព្ពោ ន ហេតុសហេតុកោតិបិ, ន ហេតុអហេតុកោតិបិ. សប្បច្ចយា. សង្ខតា. អនិទស្សនា. អប្បដិឃា. អរូបា. លោកុត្តរា. កេនចិ វិញ្ញេយ្យា, កេនចិ ន វិញ្ញេយ្យា. នោ អាសវា. អនាសវា អាសវវិប្បយុត្តា. ន វត្តព្ពា អាសវា ចេវ សាសវា ចាតិបិ, សាសវា ចេវ នោ ច អាសវាតិបិ. អាសវា ចេវ អាសវសម្បយុត្តា ចាតិបិ, អាសវសម្បយុត្តា ចេវ នោ ច អាសវាតិបិ. អាសវវិប្បយុត្តា. អនាសវា. នោ សំយោជនា…បេ… នោ គន្ថា…បេ… នោ ឱឃា…បេ… នោ យោគា…បេ… នោ នីវរណា…បេ… នោ បរាមាសា…បេ… សារម្មណា. នោ ចិត្តា. ចេតសិកា. ចិត្តសម្បយុត្តា. ចិត្តសំសដ្ឋា. ចិត្តសមុដ្ឋានា. ចិត្តសហភុនោ. ចិត្តានុបរិវត្តិនោ. ចិត្តសំសដ្ឋសមុដ្ឋានា. ចិត្តសំសដ្ឋសមុដ្ឋានសហភុនោ. ចិត្តសំសដ្ឋសមុដ្ឋានានុបរិវត្តិនោ. ពាហិរា. នោ ឧបាទា. អនុបាទិន្នា. នោ ឧបាទានា…បេ… នោ កិលេសា…បេ… ន ទស្សនេន បហាតព្ពា. ន ភាវនាយ បហាតព្ពា. ន ទស្សនេន បហាតព្ពហេតុកា. ន ភាវនាយ បហាតព្ពហេតុកា. សិយា សវិតក្កា, សិយា អវិតក្កា. សិយា សវិចារា, សិយា អវិចារា.

បីតិសម្ពោជ្ឈង្គោ អប្បីតិកោ, ឆ ពោជ្ឈង្គា សិយា សប្បីតិកា, សិយា អប្បីតិកា. បីតិសម្ពោជ្ឈង្គោ ន បីតិសហគតោ, ឆ ពោជ្ឈង្គា សិយា បីតិសហគតា, សិយា ន បីតិសហគតា. បីតិសម្ពោជ្ឈង្គោ សុខសហគតោ, ឆ ពោជ្ឈង្គា សិយា សុខសហគតា, សិយា ន សុខសហគតា. បីតិសម្ពោជ្ឈង្គោ ន ឧបេក្ខាសហគតោ, ឆ ពោជ្ឈង្គា សិយា ឧបេក្ខាសហគតា, សិយា ន ឧបេក្ខាសហគតា. ន កាមាវចរា. ន រូបាវចរា. ន អរូបាវចរា. អបរិយាបន្នា. សិយា និយ្យានិកា, សិយា អនិយ្យានិកា. សិយា និយតា, សិយា អនិយតា. អនុត្តរា. អរណាតិ.

បញ្ហាបុច្ឆកំ.

ពោជ្ឈង្គវិភង្គោ និដ្ឋិតោ.