៣. សញ្ញាក្ខន្ធោ

៦២. តត្ថ កតមោ សញ្ញាក្ខន្ធោ? ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ.

តិវិធេន សញ្ញាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ.

ចតុព្ពិធេន សញ្ញាក្ខន្ធោ – អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ.

បញ្ចវិធេន សញ្ញាក្ខន្ធោ – អត្ថិ សុខិន្ទ្រិយសម្បយុត្តោ, អត្ថិ ទុក្ខិន្ទ្រិយសម្បយុត្តោ, អត្ថិ សោមនស្សិន្ទ្រិយសម្បយុត្តោ, អត្ថិ ទោមនស្សិន្ទ្រិយសម្បយុត្តោ, អត្ថិ ឧបេក្ខិន្ទ្រិយសម្បយុត្តោ. ឯវំ បញ្ចវិធេន សញ្ញាក្ខន្ធោ.

ឆព្ពិធេន សញ្ញាក្ខន្ធោ – ចក្ខុសម្ផស្សជា សញ្ញា, សោតសម្ផស្សជា សញ្ញា, ឃានសម្ផស្សជា សញ្ញា, ជិវ្ហាសម្ផស្សជា សញ្ញា, កាយសម្ផស្សជា សញ្ញា, មនោសម្ផស្សជា សញ្ញា. ឯវំ ឆព្ពិធេន សញ្ញាក្ខន្ធោ.

សត្តវិធេន សញ្ញាក្ខន្ធោ – ចក្ខុសម្ផស្សជា សញ្ញា, សោតសម្ផស្សជា សញ្ញា, ឃានសម្ផស្សជា សញ្ញា, ជិវ្ហាសម្ផស្សជា សញ្ញា, កាយសម្ផស្សជា សញ្ញា, មនោធាតុសម្ផស្សជា សញ្ញា, មនោវិញ្ញាណធាតុសម្ផស្សជា សញ្ញា. ឯវំ សត្តវិធេន សញ្ញាក្ខន្ធោ.

អដ្ឋវិធេន សញ្ញាក្ខន្ធោ – ចក្ខុសម្ផស្សជា សញ្ញា…បេ… កាយសម្ផស្សជា សញ្ញា អត្ថិ សុខសហគតា, អត្ថិ ទុក្ខសហគតា, មនោធាតុសម្ផស្សជា សញ្ញា, មនោវិញ្ញាណធាតុសម្ផស្សជា សញ្ញា. ឯវំ អដ្ឋវិធេន សញ្ញាក្ខន្ធោ.

នវវិធេន សញ្ញាក្ខន្ធោ – ចក្ខុសម្ផស្សជា សញ្ញា…បេ… កាយសម្ផស្សជា សញ្ញា, មនោធាតុសម្ផស្សជា សញ្ញា, មនោវិញ្ញាណធាតុសម្ផស្សជា សញ្ញា អត្ថិ កុសលា, អត្ថិ អកុសលា, អត្ថិ អព្យាកតា. ឯវំ នវវិធេន សញ្ញាក្ខន្ធោ.

ទសវិធេន សញ្ញាក្ខន្ធោ – ចក្ខុសម្ផស្សជា សញ្ញា…បេ… កាយសម្ផស្សជា សញ្ញា អត្ថិ សុខសហគតា, អត្ថិ ទុក្ខសហគតា, មនោធាតុសម្ផស្សជា សញ្ញា, មនោវិញ្ញាណធាតុសម្ផស្សជា សញ្ញា អត្ថិ កុសលា, អត្ថិ អកុសលា, អត្ថិ អព្យាកតា. ឯវំ ទសវិធេន សញ្ញាក្ខន្ធោ.

៦៣. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ.

តិវិធេន សញ្ញាក្ខន្ធោ – អត្ថិ សុខាយ វេទនាយ សម្បយុត្តោ, អត្ថិ ទុក្ខាយ វេទនាយ សម្បយុត្តោ, អត្ថិ អទុក្ខមសុខាយ វេទនាយ សម្បយុត្តោ…បេ…. ឯវំ ទសវិធេន សញ្ញាក្ខន្ធោ.

៦៤. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ.

តិវិធេន សញ្ញាក្ខន្ធោ – អត្ថិ វិបាកោ, អត្ថិ វិបាកធម្មធម្មោ, អត្ថិ នេវវិបាកនវិបាកធម្មធម្មោ. អត្ថិ ឧបាទិន្នុបាទានិយោ, អត្ថិ អនុបាទិន្នុបាទានិយោ, អត្ថិ អនុបាទិន្នអនុបាទានិយោ. អត្ថិ សំកិលិដ្ឋសំកិលេសិកោ, អត្ថិ អសំកិលិដ្ឋសំកិលេសិកោ, អត្ថិ អសំកិលិដ្ឋអសំកិលេសិកោ. អត្ថិ សវិតក្កសវិចារោ, អត្ថិ អវិតក្កវិចារមត្តោ, អត្ថិ អវិតក្កអវិចារោ. អត្ថិ បីតិសហគតោ, អត្ថិ សុខសហគតោ, អត្ថិ ឧបេក្ខាសហគតោ. អត្ថិ ទស្សនេន បហាតព្ពោ, អត្ថិ ភាវនាយ បហាតព្ពោ, អត្ថិ នេវ ទស្សនេន ន ភាវនាយ បហាតព្ពោ. អត្ថិ ទស្សនេន បហាតព្ពហេតុកោ, អត្ថិ ភាវនាយ បហាតព្ពហេតុកោ, អត្ថិ នេវ ទស្សនេន ន ភាវនាយ បហាតព្ពហេតុកោ. អត្ថិ អាចយគាមី, អត្ថិ អបចយគាមី, អត្ថិ នេវាចយគាមិនាបចយគាមី. អត្ថិ សេក្ខោ, អត្ថិ អសេក្ខោ, អត្ថិ នេវសេក្ខនាសេក្ខោ. អត្ថិ បរិត្តោ, អត្ថិ មហគ្គតោ, អត្ថិ អប្បមាណោ. អត្ថិ បរិត្តារម្មណោ, អត្ថិ មហគ្គតារម្មណោ, អត្ថិ អប្បមាណារម្មណោ. អត្ថិ ហីនោ, អត្ថិ មជ្ឈិមោ, អត្ថិ បណីតោ. អត្ថិ មិច្ឆត្តនិយតោ, អត្ថិ សម្មត្តនិយតោ, អត្ថិ អនិយតោ. អត្ថិ មគ្គារម្មណោ, អត្ថិ មគ្គហេតុកោ, អត្ថិ មគ្គាធិបតិ. អត្ថិ ឧប្បន្នោ, អត្ថិ អនុប្បន្នោ, អត្ថិ ឧប្បាទី. អត្ថិ អតីតោ, អត្ថិ អនាគតោ, អត្ថិ បច្ចុប្បន្នោ. អត្ថិ អតីតារម្មណោ, អត្ថិ អនាគតារម្មណោ, អត្ថិ បច្ចុប្បន្នារម្មណោ. អត្ថិ អជ្ឈត្តោ, អត្ថិ ពហិទ្ធោ, អត្ថិ អជ្ឈត្តពហិទ្ធោ. អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ… ឯវំ ទសវិធេន សញ្ញាក្ខន្ធោ.

៦៥. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ. អត្ថិ ន ហេតុសហេតុកោ, អត្ថិ ន ហេតុអហេតុកោ. អត្ថិ លោកិយោ, អត្ថិ លោកុត្តរោ. អត្ថិ កេនចិ វិញ្ញេយ្យោ, អត្ថិ កេនចិ ន វិញ្ញេយ្យោ. អត្ថិ សាសវោ, អត្ថិ អនាសវោ. អត្ថិ អាសវសម្បយុត្តោ, អត្ថិ អាសវវិប្បយុត្តោ. អត្ថិ អាសវវិប្បយុត្តសាសវោ, អត្ថិ អាសវវិប្បយុត្តអនាសវោ. អត្ថិ សំយោជនិយោ, អត្ថិ អសំយោជនិយោ. អត្ថិ សំយោជនសម្បយុត្តោ, អត្ថិ សំយោជនវិប្បយុត្តោ. អត្ថិ សំយោជនវិប្បយុត្តសំយោជនិយោ, អត្ថិ សំយោជនវិប្បយុត្តអសំយោជនិយោ. អត្ថិ គន្ថនិយោ, អត្ថិ អគន្ថនិយោ. អត្ថិ គន្ថសម្បយុត្តោ, អត្ថិ គន្ថវិប្បយុត្តោ. អត្ថិ គន្ថវិប្បយុត្តគន្ថនិយោ, អត្ថិ គន្ថវិប្បយុត្តអគន្ថនិយោ. អត្ថិ ឱឃនិយោ, អត្ថិ អនោឃនិយោ. អត្ថិ ឱឃសម្បយុត្តោ, អត្ថិ ឱឃវិប្បយុត្តោ. អត្ថិ ឱឃវិប្បយុត្តឱឃនិយោ, អត្ថិ ឱឃវិប្បយុត្តអនោឃនិយោ. អត្ថិ យោគនិយោ, អត្ថិ អយោគនិយោ. អត្ថិ យោគសម្បយុត្តោ, អត្ថិ យោគវិប្បយុត្តោ. អត្ថិ យោគវិប្បយុត្តយោគនិយោ, អត្ថិ យោគវិប្បយុត្តអយោគនិយោ. អត្ថិ នីវរណិយោ, អត្ថិ អនីវរណិយោ. អត្ថិ នីវរណសម្បយុត្តោ, អត្ថិ នីវរណវិប្បយុត្តោ. អត្ថិ នីវរណវិប្បយុត្តនីវរណិយោ, អត្ថិ នីវរណវិប្បយុត្តអនីវរណិយោ. អត្ថិ បរាមដ្ឋោ, អត្ថិ អបរាមដ្ឋោ. អត្ថិ បរាមាសសម្បយុត្តោ, អត្ថិ បរាមាសវិប្បយុត្តោ. អត្ថិ បរាមាសវិប្បយុត្តបរាមដ្ឋោ, អត្ថិ បរាមាសវិប្បយុត្តអបរាមដ្ឋោ. អត្ថិ ឧបាទិន្នោ, អត្ថិ អនុបាទិន្នោ. អត្ថិ ឧបាទានិយោ, អត្ថិ អនុបាទានិយោ. អត្ថិ ឧបាទានសម្បយុត្តោ, អត្ថិ ឧបាទានវិប្បយុត្តោ. អត្ថិ ឧបាទានវិប្បយុត្តឧបាទានិយោ, អត្ថិ ឧបាទានវិប្បយុត្តអនុបាទានិយោ. អត្ថិ សំកិលេសិកោ, អត្ថិ អសំកិលេសិកោ. អត្ថិ សំកិលិដ្ឋោ, អត្ថិ អសំកិលិដ្ឋោ. អត្ថិ កិលេសសម្បយុត្តោ, អត្ថិ កិលេសវិប្បយុត្តោ. អត្ថិ កិលេសវិប្បយុត្តសំកិលេសិកោ, អត្ថិ កិលេសវិប្បយុត្តអសំកិលេសិកោ. អត្ថិ ទស្សនេន បហាតព្ពោ, អត្ថិ ន ទស្សនេន បហាតព្ពោ. អត្ថិ ភាវនាយ បហាតព្ពោ, អត្ថិ ន ភាវនាយ បហាតព្ពោ. អត្ថិ ទស្សនេន បហាតព្ពហេតុកោ, អត្ថិ ន ទស្សនេន បហាតព្ពហេតុកោ. អត្ថិ ភាវនាយ បហាតព្ពហេតុកោ, អត្ថិ ន ភាវនាយ បហាតព្ពហេតុកោ. អត្ថិ សវិតក្កោ, អត្ថិ អវិតក្កោ. អត្ថិ សវិចារោ, អត្ថិ អវិចារោ. អត្ថិ សប្បីតិកោ, អត្ថិ អប្បីតិកោ. អត្ថិ បីតិសហគតោ, អត្ថិ ន បីតិសហគតោ. អត្ថិ សុខសហគតោ, អត្ថិ ន សុខសហគតោ. អត្ថិ ឧបេក្ខាសហគតោ, អត្ថិ ន ឧបេក្ខាសហគតោ. អត្ថិ កាមាវចរោ, អត្ថិ ន កាមាវចរោ. អត្ថិ រូបាវចរោ, អត្ថិ ន រូបាវចរោ. អត្ថិ អរូបាវចរោ, អត្ថិ ន អរូបាវចរោ. អត្ថិ បរិយាបន្នោ, អត្ថិ អបរិយាបន្នោ. អត្ថិ និយ្យានិកោ, អត្ថិ អនិយ្យានិកោ. អត្ថិ និយតោ, អត្ថិ អនិយតោ. អត្ថិ សឧត្តរោ, អត្ថិ អនុត្តរោ. អត្ថិ សរណោ, អត្ថិ អរណោ.

តិវិធេន សញ្ញាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ…បេ…. ឯវំ ទសវិធេន សញ្ញាក្ខន្ធោ.

៦៦. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សរណោ, អត្ថិ អរណោ.

តិវិធេន សញ្ញាក្ខន្ធោ – អត្ថិ សុខាយ វេទនាយ សម្បយុត្តោ, អត្ថិ ទុក្ខាយ វេទនាយ សម្បយុត្តោ, អត្ថិ អទុក្ខមសុខាយ វេទនាយ សម្បយុត្តោ. អត្ថិ វិបាកោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ…. ឯវំ ទសវិធេន សញ្ញាក្ខន្ធោ.

(យថា កុសលត្តិកេ វិត្ថារោ, ឯវំ សព្ពេបិ តិកា វិត្ថារេតព្ពា.)

ទុកមូលកំ.

៦៧. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ.

៦៨. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ…បេ… អត្ថិ សរណោ, អត្ថិ អរណោ.

៦៩. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ.

៧០. ឯកវិធេន សញ្ញាក្ខន្ធោ – ផស្សសម្បយុត្តោ.

តិវិធេន សញ្ញាក្ខន្ធោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ…. ឯវំ ទសវិធេន សញ្ញាក្ខន្ធោ.

តិកមូលកំ.

៧១. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ.

៧២. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ហេតុសម្បយុត្តោ, អត្ថិ ហេតុវិប្បយុត្តោ.

៧៣. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ន ហេតុ សហេតុកោ, អត្ថិ ន ហេតុ អហេតុកោ.

តិវិធេន សញ្ញាក្ខន្ធោ – អត្ថិ វិបាកោ, អត្ថិ វិបាកធម្មធម្មោ, អត្ថិ នេវវិបាកនវិបាកធម្មធម្មោ…បេ…. ឯវំ ទសវិធេន សញ្ញាក្ខន្ធោ.

៧៤. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ លោកិយោ, អត្ថិ លោកុត្តរោ.

តិវិធេន សញ្ញាក្ខន្ធោ – អត្ថិ ឧបាទិន្នុបាទានិយោ, អត្ថិ អនុបាទិន្នុបាទានិយោ, អត្ថិ អនុបាទិន្នអនុបាទានិយោ…បេ…. ឯវំ ទសវិធេន សញ្ញាក្ខន្ធោ.

៧៥. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ កេនចិ វិញ្ញេយ្យោ, អត្ថិ កេនចិ ន វិញ្ញេយ្យោ.

តិវិធេន សញ្ញាក្ខន្ធោ – អត្ថិ សំកិលិដ្ឋសំកិលេសិកោ, អត្ថិ អសំកិលិដ្ឋសំកិលេសិកោ, អត្ថិ អសំកិលិដ្ឋអសំកិលេសិកោ…បេ…. ឯវំ ទសវិធេន សញ្ញាក្ខន្ធោ.

៧៦. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សាសវោ, អត្ថិ អនាសវោ.

តិវិធេន សញ្ញាក្ខន្ធោ – អត្ថិ សវិតក្កសវិចារោ, អត្ថិ អវិតក្កវិចារមត្តោ, អត្ថិ អវិតក្កអវិចារោ…បេ…. ឯវំ ទសវិធេន សញ្ញាក្ខន្ធោ.

៧៧. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ អាសវសម្បយុត្តោ, អត្ថិ អាសវវិប្បយុត្តោ.

តិវិធេន សញ្ញាក្ខន្ធោ – អត្ថិ បីតិសហគតោ, អត្ថិ សុខសហគតោ, អត្ថិ ឧបេក្ខាសហគតោ…បេ…. ឯវំ ទសវិធេន សញ្ញាក្ខន្ធោ.

៧៨. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ អាសវវិប្បយុត្តសាសវោ, អត្ថិ អាសវវិប្បយុត្តអនាសវោ.

តិវិធេន សញ្ញាក្ខន្ធោ – អត្ថិ ទស្សនេន បហាតព្ពោ, អត្ថិ ភាវនាយ បហាតព្ពោ, អត្ថិ នេវ ទស្សនេន ន ភាវនាយ បហាតព្ពោ…បេ…. ឯវំ ទសវិធេន សញ្ញាក្ខន្ធោ.

៧៩. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សំយោជនិយោ, អត្ថិ អសំយោជនិយោ.

តិវិធេន សញ្ញាក្ខន្ធោ – អត្ថិ ទស្សនេន បហាតព្ពហេតុកោ, អត្ថិ ភាវនាយ បហាតព្ពហេតុកោ, អត្ថិ នេវ ទស្សនេន ន ភាវនាយ បហាតព្ពហេតុកោ…បេ…. ឯវំ ទសវិធេន សញ្ញាក្ខន្ធោ.

៨០. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សំយោជនសម្បយុត្តោ, អត្ថិ សំយោជនវិប្បយុត្តោ.

តិវិធេន សញ្ញាក្ខន្ធោ – អត្ថិ អាចយគាមី, អត្ថិ អបចយគាមី, អត្ថិ នេវាចយគាមិនាបចយគាមី…បេ…. ឯវំ ទសវិធេន សញ្ញាក្ខន្ធោ.

៨១. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ សំយោជនវិប្បយុត្តសំយោជនិយោ, អត្ថិ សំយោជនវិប្បយុត្តអសំយោជនិយោ.

តិវិធេន សញ្ញាក្ខន្ធោ – អត្ថិ សេក្ខោ, អត្ថិ អសេក្ខោ, អត្ថិ នេវសេក្ខនាសេក្ខោ…បេ…. ឯវំ ទសវិធេន សញ្ញាក្ខន្ធោ.

៨២. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ គន្ថនិយោ, អត្ថិ អគន្ថនិយោ.

តិវិធេន សញ្ញាក្ខន្ធោ – អត្ថិ បរិត្តោ, អត្ថិ មហគ្គតោ, អត្ថិ អប្បមាណោ…បេ…. ឯវំ ទសវិធេន សញ្ញាក្ខន្ធោ.

៨៣. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ គន្ថសម្បយុត្តោ, អត្ថិ គន្ថវិប្បយុត្តោ.

តិវិធេន សញ្ញាក្ខន្ធោ – អត្ថិ បរិត្តារម្មណោ, អត្ថិ មហគ្គតារម្មណោ, អត្ថិ អប្បមាណារម្មណោ…បេ…. ឯវំ ទសវិធេន សញ្ញាក្ខន្ធោ.

៨៤. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ គន្ថវិប្បយុត្តគន្ថនិយោ, អត្ថិ គន្ថវិប្បយុត្តអគន្ថនិយោ.

តិវិធេន សញ្ញាក្ខន្ធោ – អត្ថិ ហីនោ, អត្ថិ មជ្ឈិមោ, អត្ថិ បណីតោ…បេ…. ឯវំ ទសវិធេន សញ្ញាក្ខន្ធោ.

៨៥. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ឱឃនិយោ, អត្ថិ អនោឃនិយោ.

តិវិធេន សញ្ញាក្ខន្ធោ – អត្ថិ មិច្ឆត្តនិយតោ, អត្ថិ សម្មត្តនិយតោ, អត្ថិ អនិយតោ…បេ…. ឯវំ ទសវិធេន សញ្ញាក្ខន្ធោ.

៨៦. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ឱឃសម្បយុត្តោ, អត្ថិ ឱឃវិប្បយុត្តោ.

តិវិធេន សញ្ញាក្ខន្ធោ – អត្ថិ មគ្គារម្មណោ, អត្ថិ មគ្គហេតុកោ, អត្ថិ មគ្គាធិបតិ…បេ…. ឯវំ ទសវិធេន សញ្ញាក្ខន្ធោ.

៨៧. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ ឱឃវិប្បយុត្តឱឃនិយោ, អត្ថិ ឱឃវិប្បយុត្តអនោឃនិយោ.

តិវិធេន សញ្ញាក្ខន្ធោ – អត្ថិ ឧប្បន្នោ, អត្ថិ អនុប្បន្នោ, អត្ថិ ឧប្បាទី…បេ…. ឯវំ ទសវិធេន សញ្ញាក្ខន្ធោ.

៨៨. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ យោគនិយោ, អត្ថិ អយោគនិយោ.

តិវិធេន សញ្ញាក្ខន្ធោ – អត្ថិ អតីតោ, អត្ថិ អនាគតោ, អត្ថិ បច្ចុប្បន្នោ…បេ…. ឯវំ ទសវិធេន សញ្ញាក្ខន្ធោ.

៨៩. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ យោគសម្បយុត្តោ, អត្ថិ យោគវិប្បយុត្តោ.

តិវិធេន សញ្ញាក្ខន្ធោ – អត្ថិ អតីតារម្មណោ, អត្ថិ អនាគតារម្មណោ, អត្ថិ បច្ចុប្បន្នារម្មណោ…បេ…. ឯវំ ទសវិធេន សញ្ញាក្ខន្ធោ.

៩០. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ យោគវិប្បយុត្តយោគនិយោ, អត្ថិ យោគវិប្បយុត្តអយោគនិយោ.

តិវិធេន សញ្ញាក្ខន្ធោ – អត្ថិ អជ្ឈត្តោ, អត្ថិ ពហិទ្ធោ, អត្ថិ អជ្ឈត្តពហិទ្ធោ…បេ…. ឯវំ ទសវិធេន សញ្ញាក្ខន្ធោ.

៩១. ឯកវិធេន សញ្ញាក្ខន្ធោ – ផស្សសម្បយុត្តោ.

ទុវិធេន សញ្ញាក្ខន្ធោ – អត្ថិ នីវរណិយោ, អត្ថិ អនីវរណិយោ.

តិវិធេន សញ្ញាក្ខន្ធោ – អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ…បេ…. ឯវំ ទសវិធេន សញ្ញាក្ខន្ធោ.

ឧភតោវឌ្ឍកំ.

សត្តវិធេន សញ្ញាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ. ឯវំ សត្តវិធេន សញ្ញាក្ខន្ធោ.

អបរោបិ សត្តវិធេន សញ្ញាក្ខន្ធោ – អត្ថិ សុខាយ វេទនាយ សម្បយុត្តោ, អត្ថិ ទុក្ខាយ វេទនាយ សម្បយុត្តោ, អត្ថិ អទុក្ខមសុខាយ វេទនាយ សម្បយុត្តោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ. ឯវំ សត្តវិធេន សញ្ញាក្ខន្ធោ.

ចតុវីសតិវិធេន សញ្ញាក្ខន្ធោ – ចក្ខុសម្ផស្សបច្ចយា សញ្ញាក្ខន្ធោ អត្ថិ កុសលោ, អត្ថិ អកុសលោ, អត្ថិ អព្យាកតោ; សោតសម្ផស្សបច្ចយា…បេ… ឃានសម្ផស្សបច្ចយា…បេ… ជិវ្ហាសម្ផស្សបច្ចយា…បេ… កាយសម្ផស្សបច្ចយា…បេ… មនោសម្ផស្សបច្ចយា សញ្ញាក្ខន្ធោ អត្ថិ កុសលោ, អត្ថិ អកុសលោ, អត្ថិ អព្យាកតោ; ចក្ខុសម្ផស្សជា សញ្ញា, សោតសម្ផស្សជា សញ្ញា, ឃានសម្ផស្សជា សញ្ញា, ជិវ្ហាសម្ផស្សជា សញ្ញា, កាយសម្ផស្សជា សញ្ញា, មនោសម្ផស្សជា សញ្ញា. ឯវំ ចតុវីសតិវិធេន សញ្ញាក្ខន្ធោ.

អបរោបិ ចតុវីសតិវិធេន សញ្ញាក្ខន្ធោ – ចក្ខុសម្ផស្សបច្ចយា សញ្ញាក្ខន្ធោ អត្ថិ សុខាយ វេទនាយ សម្បយុត្តោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ, ចក្ខុសម្ផស្សជា សញ្ញា…បេ… មនោសម្ផស្សជា សញ្ញា. សោតសម្ផស្សបច្ចយា…បេ… ឃានសម្ផស្សបច្ចយា…បេ… ជិវ្ហាសម្ផស្សបច្ចយា…បេ… កាយសម្ផស្សបច្ចយា…បេ… មនោសម្ផស្សបច្ចយា សញ្ញាក្ខន្ធោ អត្ថិ សុខាយ វេទនាយ សម្បយុត្តោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ; ចក្ខុសម្ផស្សជា សញ្ញា…បេ… មនោសម្ផស្សជា សញ្ញា. ឯវំ ចតុវីសតិវិធេន សញ្ញាក្ខន្ធោ.

តិំសតិវិធេន សញ្ញាក្ខន្ធោ – ចក្ខុសម្ផស្សបច្ចយា សញ្ញាក្ខន្ធោ អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ, សោតសម្ផស្សបច្ចយា…បេ… ឃានសម្ផស្សបច្ចយា …បេ… ជិវ្ហាសម្ផស្សបច្ចយា…បេ… កាយសម្ផស្សបច្ចយា…បេ… មនោសម្ផស្សបច្ចយា សញ្ញាក្ខន្ធោ អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ, ចក្ខុសម្ផស្សជា សញ្ញា…បេ… មនោសម្ផស្សជា សញ្ញា. ឯវំ តិំសតិវិធេន សញ្ញាក្ខន្ធោ.

ពហុវិធេន សញ្ញាក្ខន្ធោ – ចក្ខុសម្ផស្សបច្ចយា សញ្ញាក្ខន្ធោ អត្ថិ កុសលោ, អត្ថិ អកុសលោ, អត្ថិ អព្យាកតោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ, សោតសម្ផស្សបច្ចយា …បេ… ឃានសម្ផស្សបច្ចយា…បេ… ជិវ្ហាសម្ផស្សបច្ចយា…បេ… កាយសម្ផស្សបច្ចយា…បេ… មនោសម្ផស្សបច្ចយា សញ្ញាក្ខន្ធោ អត្ថិ កុសលោ, អត្ថិ អកុសលោ, អត្ថិ អព្យាកតោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ, ចក្ខុសម្ផស្សជា សញ្ញា…បេ… មនោសម្ផស្សជា សញ្ញា. ឯវំ ពហុវិធេន សញ្ញាក្ខន្ធោ.

អបរោបិ ពហុវិធេន សញ្ញាក្ខន្ធោ – ចក្ខុសម្ផស្សបច្ចយា សញ្ញាក្ខន្ធោ អត្ថិ សុខាយ វេទនាយ សម្បយុត្តោ…បេ… អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ, សោតសម្ផស្សបច្ចយា…បេ… ឃានសម្ផស្សបច្ចយា…បេ… ជិវ្ហាសម្ផស្សបច្ចយា…បេ… កាយសម្ផស្សបច្ចយា…បេ… មនោសម្ផស្សបច្ចយា សញ្ញាក្ខន្ធោ អត្ថិ អជ្ឈត្តារម្មណោ, អត្ថិ ពហិទ្ធារម្មណោ, អត្ថិ អជ្ឈត្តពហិទ្ធារម្មណោ, អត្ថិ កាមាវចរោ, អត្ថិ រូបាវចរោ, អត្ថិ អរូបាវចរោ, អត្ថិ អបរិយាបន្នោ, ចក្ខុសម្ផស្សជា សញ្ញា, សោតសម្ផស្សជា សញ្ញា, ឃានសម្ផស្សជា សញ្ញា, ជិវ្ហាសម្ផស្សជា សញ្ញា, កាយសម្ផស្សជា សញ្ញា, មនោសម្ផស្សជា សញ្ញា. ឯវំ ពហុវិធេន សញ្ញាក្ខន្ធោ.

អយំ វុច្ចតិ សញ្ញាក្ខន្ធោ.