៦. នហេតុសហេតុកទុកំ

១-៧. បដិច្ចវារាទិ

១៣. នហេតុំ នសហេតុកំ ធម្មំ បដិច្ច នហេតុ នសហេតុកោ ធម្មោ ឧប្បជ្ជតិ ហេតុបច្ចយា – ឯកំ មហាភូតំ បដិច្ច តយោ មហាភូតា…បេ…. នហេតុំ នសហេតុកំ ធម្មំ បដិច្ច នហេតុ នអហេតុកោ ធម្មោ ឧប្បជ្ជតិ ហេតុបច្ចយា – បដិសន្ធិក្ខណេ វត្ថុំ បដិច្ច នហេតុសហេតុកា ខន្ធា. នហេតុំ នសហេតុកំ ធម្មំ បដិច្ច នហេតុ នសហេតុកោ ច នហេតុ នអហេតុកោ ច ធម្មា ឧប្បជ្ជន្តិ ហេតុបច្ចយា. (៣)

នហេតុំ នអហេតុកំ ធម្មំ បដិច្ច នហេតុ នអហេតុកោ ធម្មោ ឧប្បជ្ជតិ ហេតុបច្ចយា. នហេតុំ នអហេតុកំ ធម្មំ បដិច្ច នហេតុ នសហេតុកោ ធម្មោ ឧប្បជ្ជតិ ហេតុបច្ចយា. នហេតុំ នអហេតុកំ ធម្មំ បដិច្ច នហេតុ នសហេតុកោ ច នហេតុ នអហេតុកោ ច ធម្មា ឧប្បជ្ជន្តិ ហេតុបច្ចយា. (៣)

នហេតុំ នសហេតុកញ្ច នហេតុំ នអហេតុកញ្ច ធម្មំ បដិច្ច នហេតុ នសហេតុកោ ធម្មោ ឧប្បជ្ជតិ ហេតុបច្ចយា. នហេតុំ នសហេតុកញ្ច នហេតុំ នអហេតុកញ្ច ធម្មំ បដិច្ច នហេតុ នអហេតុកោ ធម្មោ ឧប្បជ្ជតិ ហេតុបច្ចយា. នហេតុំ នសហេតុកញ្ច នហេតុំ នអហេតុកញ្ច ធម្មំ បដិច្ច នហេតុ នសហេតុកោ ច នហេតុ នអហេតុកោ ច ធម្មា ឧប្បជ្ជន្តិ ហេតុបច្ចយា. (៣) (សំខិត្តំ.)

១៤. ហេតុយា នវ, អារម្មណេ ចត្តារិ…បេ… អវិគតេ នវ.

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ.)

អារម្មណបច្ចយោ

១៥. នហេតុ នសហេតុកោ ធម្មោ នហេតុស្ស នសហេតុកស្ស ធម្មស្ស អារម្មណបច្ចយេន បច្ចយោ. នហេតុ នសហេតុកោ ធម្មោ នហេតុស្ស នអហេតុកស្ស ធម្មស្ស អារម្មណបច្ចយេន បច្ចយោ. (២)

នហេតុ នអហេតុកោ ធម្មោ នហេតុស្ស នអហេតុកស្ស ធម្មស្ស អារម្មណបច្ចយេន បច្ចយោ. នហេតុ នអហេតុកោ ធម្មោ នហេតុស្ស នសហេតុកស្ស ធម្មស្ស អារម្មណបច្ចយេន បច្ចយោ. (២) (សំខិត្តំ.)

១៦. អារម្មណេ ចត្តារិ…បេ… អវិគតេ សត្ត.

ហេតុគោច្ឆកំ និដ្ឋិតំ.