១-៧. បដិច្ចវារាទិ

បច្ចយចតុក្កំ

ហេតុបច្ចយោ

៥. នសហេតុកំ ធម្មំ បដិច្ច នសហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច ចិត្តសមុដ្ឋានំ រូបំ, ឯកំ មហាភូតំ បដិច្ច តយោ មហាភូតា…បេ… ទ្វេ មហាភូតេ បដិច្ច ទ្វេ មហាភូតា, មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. នសហេតុកំ ធម្មំ បដិច្ច នអហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច សម្បយុត្តកា ខន្ធា; បដិសន្ធិក្ខណេ វត្ថុំ បដិច្ច សហេតុកា ខន្ធា. នសហេតុកំ ធម្មំ បដិច្ច នសហេតុកោ ច នអហេតុកោ ច ធម្មា ឧប្បជ្ជន្តិ ហេតុបច្ចយា. (៣)

នអហេតុកំ ធម្មំ បដិច្ច នអហេតុកោ ធម្មោ ឧប្បជ្ជតិ ហេតុបច្ចយា… តីណិ.

នសហេតុកញ្ច នអហេតុកញ្ច ធម្មំ បដិច្ច នសហេតុកោ ធម្មោ ឧប្បជ្ជតិ ហេតុបច្ចយា. នសហេតុកញ្ច នអហេតុកញ្ច ធម្មំ បដិច្ច នអហេតុកោ ធម្មោ ឧប្បជ្ជតិ ហេតុបច្ចយា. នសហេតុកញ្ច នអហេតុកញ្ច ធម្មំ បដិច្ច នសហេតុកោ ច នអហេតុកោ ច ធម្មា ឧប្បជ្ជន្តិ ហេតុបច្ចយា. (៣) (សំខិត្តំ.)

៦. ហេតុយា នវ, អារម្មណេ ឆ…បេ… អវិគតេ នវ.

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ ឯវំ វិត្ថារេតព្ពំ.)

ហេតុ-អារម្មណបច្ចយា

៧. នសហេតុកោ ធម្មោ នសហេតុកស្ស ធម្មស្ស ហេតុបច្ចយេន បច្ចយោ. នសហេតុកោ ធម្មោ នអហេតុកស្ស ធម្មស្ស ហេតុបច្ចយេន បច្ចយោ. នសហេតុកោ ធម្មោ នសហេតុកស្ស ច នអហេតុកស្ស ច ធម្មស្ស ហេតុបច្ចយេន បច្ចយោ. (៣)

នអហេតុកោ ធម្មោ នអហេតុកស្ស ធម្មស្ស ហេតុបច្ចយេន បច្ចយោ… តីណិ.

នសហេតុកោ ធម្មោ នសហេតុកស្ស ធម្មស្ស អារម្មណបច្ចយេន បច្ចយោ (សំខិត្តំ.)

៨. ហេតុយា ឆ, អារម្មណេ នវ…បេ… អវិគតេ នវ.

(យថា កុសលត្តិកេ បញ្ហាវារំ, ឯវំ វិត្ថារេតព្ពំ.)