១-៧. បដិច្ចវារាទិ

បច្ចយចតុក្កំ

ហេតុបច្ចយោ

១. នហេតុំ ធម្មំ បដិច្ច នហេតុ ធម្មោ ឧប្បជ្ជតិ ហេតុបច្ចយា – នហេតុំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ…បេ… (យាវ មហាភូតា). នហេតុំ ធម្មំ បដិច្ច ន នហេតុ ធម្មោ ឧប្បជ្ជតិ ហេតុបច្ចយា – នហេតូ ខន្ធេ បដិច្ច ហេតូ; បដិសន្ធិក្ខណេ…បេ… នហេតុំ ធម្មំ បដិច្ច នហេតុ ច ន នហេតុ ច ធម្មា ឧប្បជ្ជន្តិ ហេតុបច្ចយា. (៣)

ន នហេតុំ ធម្មំ បដិច្ច ន នហេតុ ធម្មោ ឧប្បជ្ជតិ ហេតុបច្ចយា. ន នហេតុំ ធម្មំ បដិច្ច នហេតុ ធម្មោ ឧប្បជ្ជតិ ហេតុបច្ចយា. ន នហេតុំ ធម្មំ បដិច្ច នហេតុ ច ន នហេតុ ច ធម្មា ឧប្បជ្ជន្តិ ហេតុបច្ចយា. (៣)

នហេតុញ្ច ន នហេតុញ្ច ធម្មំ បដិច្ច នហេតុ ធម្មោ ឧប្បជ្ជតិ ហេតុបច្ចយា. នហេតុញ្ច ន នហេតុញ្ច ធម្មំ បដិច្ច ន នហេតុ ធម្មោ ឧប្បជ្ជតិ ហេតុបច្ចយា. នហេតុញ្ច ន នហេតុញ្ច ធម្មំ បដិច្ច នហេតុ ច ន នហេតុ ច ធម្មា ឧប្បជ្ជន្តិ ហេតុបច្ចយា. (៣) (សំខិត្តំ.)

២. ហេតុយា នវ, អារម្មណេ នវ…បេ… អវិគតេ នវ.

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ ឯវំ វិត្ថារេតព្ពំ.)

ហេតុ-អារម្មណបច្ចយា

៣. ន នហេតុ ធម្មោ ន នហេតុស្ស ធម្មស្ស ហេតុបច្ចយេន បច្ចយោ. ន នហេតុ ធម្មោ នហេតុស្ស ធម្មស្ស ហេតុបច្ចយេន បច្ចយោ. ន នហេតុ ធម្មោ នហេតុស្ស ច ន នហេតុស្ស ច ធម្មស្ស ហេតុបច្ចយេន បច្ចយោ. (៣)

នហេតុ ធម្មោ នហេតុស្ស ធម្មស្ស អារម្មណបច្ចយេន បច្ចយោ. នហេតុ ធម្មោ ន នហេតុស្ស ធម្មស្ស អារម្មណបច្ចយេន បច្ចយោ. នហេតុ ធម្មោ នហេតុស្ស ច ន នហេតុស្ស ច ធម្មស្ស អារម្មណបច្ចយេន បច្ចយោ. (៣)

ន នហេតុ ធម្មោ ន នហេតុស្ស ធម្មស្ស អារម្មណបច្ចយេន បច្ចយោ. ន នហេតុ ធម្មោ នហេតុស្ស ធម្មស្ស អារម្មណបច្ចយេន បច្ចយោ. ន នហេតុ ធម្មោ នហេតុស្ស ច ន នហេតុស្ស ច ធម្មស្ស អារម្មណបច្ចយេន បច្ចយោ. (៣)

នហេតុ ច ន នហេតុ ច ធម្មា នហេតុស្ស ធម្មស្ស អារម្មណបច្ចយេន បច្ចយោ. នហេតុ ច ន នហេតុ ច ធម្មា ន នហេតុស្ស ធម្មស្ស អារម្មណបច្ចយេន បច្ចយោ. នហេតុ ច ន នហេតុ ច ធម្មា នហេតុស្ស ច ន នហេតុស្ស ច ធម្មស្ស អារម្មណបច្ចយេន បច្ចយោ. (៣) (សំខិត្តំ.)

៤. ហេតុយា តីណិ, អារម្មណេ នវ…បេ… អវិគតេ នវ. (យថា កុសលត្តិកេ បញ្ហាវារំ, ឯវំ វិត្ថារេតព្ពំ.)