១-៧. បដិច្ចវារាទិ

២៧. នកេនចិ វិញ្ញេយ្យំ ធម្មំ បដិច្ច នកេនចិ វិញ្ញេយ្យោ ធម្មោ ឧប្បជ្ជតិ ហេតុបច្ចយា. នកេនចិ វិញ្ញេយ្យំ ធម្មំ បដិច្ច ននកេនចិ វិញ្ញេយ្យោ ធម្មោ ឧប្បជ្ជតិ ហេតុបច្ចយា. នកេនចិ វិញ្ញេយ្យំ ធម្មំ បដិច្ច នកេនចិ វិញ្ញេយ្យោ ច ននកេនចិ វិញ្ញេយ្យោ ច ធម្មា ឧប្បជ្ជន្តិ ហេតុបច្ចយា. (៣)

ននកេនចិ វិញ្ញេយ្យំ ធម្មំ បដិច្ច ននកេនចិ វិញ្ញេយ្យោ ធម្មោ ឧប្បជ្ជតិ ហេតុបច្ចយា… តីណិ.

នកេនចិ វិញ្ញេយ្យញ្ច ននកេនចិ វិញ្ញេយ្យញ្ច ធម្មំ បដិច្ច នកេនចិ វិញ្ញេយ្យោ ធម្មោ ឧប្បជ្ជតិ ហេតុបច្ចយា… តីណិ. (សំខិត្តំ.)

ហេតុយា នវ…បេ… អវិគតេ នវ. (សព្ពត្ថ វិត្ថារោ.)

ចូឡន្តរទុកំ និដ្ឋិតំ.