១-៧. បដិច្ចវារាទិ

២១. នសប្បដិឃំ ធម្មំ បដិច្ច នសប្បដិឃោ ធម្មោ ឧប្បជ្ជតិ ហេតុបច្ចយា. នសប្បដិឃំ ធម្មំ បដិច្ច នអប្បដិឃោ ធម្មោ ឧប្បជ្ជតិ ហេតុបច្ចយា. នសប្បដិឃំ ធម្មំ បដិច្ច នសប្បដិឃោ ច នអប្បដិឃោ ច ធម្មា ឧប្បជ្ជន្តិ ហេតុបច្ចយា. (៣)

នអប្បដិឃំ ធម្មំ បដិច្ច នអប្បដិឃោ ធម្មោ ឧប្បជ្ជតិ ហេតុបច្ចយា… តីណិ.

នសប្បដិឃញ្ច នអប្បដិឃញ្ច ធម្មំ បដិច្ច នសប្បដិឃោ ធម្មោ ឧប្បជ្ជតិ ហេតុបច្ចយា… តីណិ. (សំខិត្តំ.)

ហេតុយា នវ, អារម្មណេ ឯកំ.

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ.)

២២. នសប្បដិឃោ ធម្មោ នសប្បដិឃស្ស ធម្មស្ស ហេតុបច្ចយេន បច្ចយោ. នសប្បដិឃោ ធម្មោ នអប្បដិឃស្ស ធម្មស្ស ហេតុបច្ចយេន បច្ចយោ. នសប្បដិឃោ ធម្មោ នសប្បដិឃស្ស ច នអប្បដិឃស្ស ច ធម្មស្ស ហេតុបច្ចយេន បច្ចយោ. (៣)

នសប្បដិឃោ ធម្មោ នសប្បដិឃស្ស ធម្មស្ស អារម្មណបច្ចយេន បច្ចយោ. នអប្បដិឃោ ធម្មោ នសប្បដិឃស្ស ធម្មស្ស អារម្មណបច្ចយេន បច្ចយោ. (២) (សំខិត្តំ.)

២៣. ហេតុយា តីណិ, អារម្មណេ ទ្វេ, អធិបតិយា ចត្តារិ…បេ… អវិគតេ នវ.