ធម្មបច្ចនីយានុលោមេ តិកទុកបដ្ឋានំ

១-១. កុសលត្តិក-ហេតុទុកំ

១. នកុសលំ នហេតុំ ធម្មំ បដិច្ច អកុសលោ ហេតុ ធម្មោ ឧប្បជ្ជតិ ហេតុបច្ចយា. នកុសលំ នហេតុំ ធម្មំ បដិច្ច អព្យាកតោ ហេតុ ធម្មោ ឧប្បជ្ជតិ ហេតុបច្ចយា. (២)

នអកុសលំ នហេតុំ ធម្មំ បដិច្ច កុសលោ ហេតុ ធម្មោ ឧប្បជ្ជតិ ហេតុបច្ចយា. នអកុសលំ នហេតុំ ធម្មំ បដិច្ច អព្យាកតោ ហេតុ ធម្មោ ឧប្បជ្ជតិ ហេតុបច្ចយា. (២)

នអព្យាកតំ នហេតុំ ធម្មំ បដិច្ច កុសលោ ហេតុ ធម្មោ ឧប្បជ្ជតិ ហេតុបច្ចយា. នអព្យាកតំ នហេតុំ ធម្មំ បដិច្ច អកុសលោ ហេតុ ធម្មោ ឧប្បជ្ជតិ ហេតុបច្ចយា. (២)

នកុសលំ នហេតុញ្ច នអព្យាកតំ នហេតុញ្ច ធម្មំ បដិច្ច អកុសលោ ហេតុ ធម្មោ ឧប្បជ្ជតិ ហេតុបច្ចយា. នអកុសលំ នហេតុញ្ច នអព្យាកតំ នហេតុញ្ច ធម្មំ បដិច្ច កុសលោ ហេតុ ធម្មោ ឧប្បជ្ជតិ ហេតុបច្ចយា. នកុសលំ នហេតុញ្ច នអកុសលំ នហេតុញ្ច ធម្មំ បដិច្ច អព្យាកតោ ហេតុ ធម្មោ ឧប្បជ្ជតិ ហេតុបច្ចយា. តីណិ. (សំខិត្តំ.) ហេតុយា នវ.

២. នកុសលំ ននហេតុំ ធម្មំ បដិច្ច អកុសលោ នហេតុ ធម្មោ ឧប្បជ្ជតិ ហេតុបច្ចយា. នកុសលំ ននហេតុំ ធម្មំ បដិច្ច អព្យាកតោ នហេតុ ធម្មោ ឧប្បជ្ជតិ ហេតុបច្ចយា. នកុសលំ ននហេតុំ ធម្មំ បដិច្ច អកុសលោ នហេតុ ច អព្យាកតោ នហេតុ ច ធម្មា ឧប្បជ្ជន្តិ ហេតុបច្ចយា. តីណិ.

នអកុសលំ ននហេតុំ ធម្មំ បដិច្ច កុសលោ នហេតុ ធម្មោ ឧប្បជ្ជតិ ហេតុបច្ចយា. នអកុសលំ ននហេតុំ ធម្មំ បដិច្ច អព្យាកតោ នហេតុ ធម្មោ ឧប្បជ្ជតិ ហេតុបច្ចយា. នអកុសលំ ននហេតុំ ធម្មំ បដិច្ច កុសលោ នហេតុ ច អព្យាកតោ នហេតុ ច ធម្មា ឧប្បជ្ជន្តិ ហេតុបច្ចយា. តីណិ.

នអព្យាកតំ ននហេតុំ ធម្មំ បដិច្ច អព្យាកតោ នហេតុ ធម្មោ ឧប្បជ្ជតិ ហេតុបច្ចយា… បញ្ច.

នកុសលំ ននហេតុញ្ច នអព្យាកតំ ននហេតុញ្ច ធម្មំ បដិច្ច អកុសលោ នហេតុ ធម្មោ ឧប្បជ្ជតិ ហេតុបច្ចយា… តីណិ.

នអកុសលំ ននហេតុញ្ច នអព្យាកតំ ននហេតុញ្ច ធម្មំ បដិច្ច កុសលោ នហេតុ ធម្មោ ឧប្បជ្ជតិ ហេតុបច្ចយា… តីណិ.

នកុសលំ ននហេតុញ្ច នអកុសលំ ននហេតុញ្ច ធម្មំ បដិច្ច អព្យាកតោ នហេតុ ធម្មោ ឧប្បជ្ជតិ ហេតុបច្ចយា. ឯកំ… ហេតុយា អដ្ឋារស.

១-២. កុសលត្តិក-សហេតុកទុកំ

៣. នកុសលំ នសហេតុកំ ធម្មំ បដិច្ច អកុសលោ សហេតុកោ ធម្មោ ឧប្បជ្ជតិ ហេតុបច្ចយា. នកុសលំ នសហេតុកំ ធម្មំ បដិច្ច អព្យាកតោ សហេតុកោ ធម្មោ ឧប្បជ្ជតិ ហេតុបច្ចយា. នអកុសលំ នសហេតុកំ ធម្មំ បដិច្ច អព្យាកតោ សហេតុកោ ធម្មោ ឧប្បជ្ជតិ ហេតុបច្ចយា. នអព្យាកតំ នសហេតុកំ ធម្មំ បដិច្ច អកុសលោ សហេតុកោ ធម្មោ ឧប្បជ្ជតិ ហេតុបច្ចយា. នកុសលំ នសហេតុកញ្ច នអព្យាកតំ នសហេតុកញ្ច ធម្មំ បដិច្ច អកុសលោ សហេតុកោ ធម្មោ ឧប្បជ្ជតិ ហេតុបច្ចយា. នកុសលំ នសហេតុកញ្ច នអកុសលំ នសហេតុកញ្ច ធម្មំ បដិច្ច អព្យាកតោ សហេតុកោ ធម្មោ ឧប្បជ្ជតិ ហេតុបច្ចយា. ហេតុយា ឆ.

៤. នកុសលំ នអហេតុកំ ធម្មំ បដិច្ច អព្យាកតោ អហេតុកោ ធម្មោ ឧប្បជ្ជតិ ហេតុបច្ចយា. នអកុសលំ នអហេតុកំ ធម្មំ បដិច្ច អព្យាកតោ អហេតុកោ ធម្មោ ឧប្បជ្ជតិ ហេតុបច្ចយា. នអព្យាកតំ នអហេតុកំ ធម្មំ បដិច្ច អព្យាកតោ អហេតុកោ ធម្មោ ឧប្បជ្ជតិ ហេតុបច្ចយា. នកុសលំ នអហេតុកញ្ច នអព្យាកតំ នអហេតុកញ្ច ធម្មំ បដិច្ច អព្យាកតោ អហេតុកោ ធម្មោ ឧប្បជ្ជតិ ហេតុបច្ចយា. នអកុសលំ នអហេតុកញ្ច នអព្យាកតំ នអហេតុកញ្ច ធម្មំ បដិច្ច អព្យាកតោ អហេតុកោ ធម្មោ ឧប្បជ្ជតិ ហេតុបច្ចយា. នកុសលំ នអហេតុកញ្ច នអកុសលំ នអហេតុកញ្ច ធម្មំ បដិច្ច អព្យាកតោ អហេតុកោ ធម្មោ ឧប្បជ្ជតិ ហេតុបច្ចយា. ហេតុយា ឆ.

១-៣. កុសលត្តិក-ហេតុសម្បយុត្តទុកំ

៥. នកុសលំ នហេតុសម្បយុត្តំ ធម្មំ បដិច្ច អកុសលោ ហេតុសម្បយុត្តោ ធម្មោ ឧប្បជ្ជតិ ហេតុបច្ចយា. នកុសលំ នហេតុសម្បយុត្តំ ធម្មំ បដិច្ច អព្យាកតោ ហេតុសម្បយុត្តោ ធម្មោ ឧប្បជ្ជតិ ហេតុបច្ចយា. នអកុសលំ នហេតុសម្បយុត្តំ ធម្មំ បដិច្ច អព្យាកតោ ហេតុសម្បយុត្តោ ធម្មោ ឧប្បជ្ជតិ ហេតុបច្ចយា… ឆ. (សហេតុកសទិសំ.)

នកុសលំ នហេតុវិប្បយុត្តំ ធម្មំ បដិច្ច អព្យាកតោ ហេតុវិប្បយុត្តោ ធម្មោ ឧប្បជ្ជតិ ហេតុបច្ចយា… ឆ. (អហេតុកសទិសំ, សំខិត្តំ.)

១-៤-៦. កុសលត្តិក-ហេតុសហេតុកាទិទុកានិ

៦. នកុសលំ នហេតុញ្ចេវ នអហេតុកញ្ច ធម្មំ បដិច្ច អកុសលោ ហេតុ ចេវ សហេតុកោ ច ធម្មោ ឧប្បជ្ជតិ ហេតុបច្ចយា. នកុសលំ នហេតុញ្ចេវ នអហេតុកញ្ច ធម្មំ បដិច្ច អព្យាកតោ ហេតុ ចេវ សហេតុកោ ច ធម្មោ ឧប្បជ្ជតិ ហេតុបច្ចយា. ទ្វេ.

(នអកុសលេ ទ្វេ, នអព្យាកតេ ទ្វេ. បឋមំ គណិតកេន ឯកំ, ទុតិយំ គណិតកេន ឯកំ, តតិយំ គណិតកេន ឯកំ, សព្ពត្ថ នវ បញ្ហា.)

នកុសលំ នអហេតុកញ្ចេវ ន ច ហេតុំ ធម្មំ បដិច្ច អកុសលោ សហេតុកោ ចេវ ន ច ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៧. នកុសលំ នហេតុញ្ចេវ នហេតុវិប្បយុត្តញ្ច ធម្មំ បដិច្ច អកុសលោ ហេតុ ចេវ ហេតុសម្បយុត្តោ ច ធម្មោ ឧប្បជ្ជតិ ហេតុបច្ចយា… ហេតុយា នវ.

នកុសលំ នហេតុវិប្បយុត្តញ្ចេវ ននហេតុញ្ច ធម្មំ បដិច្ច អកុសលោ ហេតុសម្បយុត្តោ ចេវ ន ច ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៨. នកុសលំ នហេតុំ នសហេតុកំ ធម្មំ បដិច្ច អព្យាកតោ នហេតុ សហេតុកោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

៩. នកុសលំ នហេតុំ នអហេតុកំ ធម្មំ បដិច្ច អកុសលោ នហេតុ អហេតុកោ ធម្មោ ឧប្បជ្ជតិ ហេតុបច្ចយា. (១)

នអកុសលំ នហេតុំ នអហេតុកំ ធម្មំ បដិច្ច អព្យាកតោ នហេតុ អហេតុកោ ធម្មោ ឧប្បជ្ជតិ ហេតុបច្ចយា. (១)

នអព្យាកតំ នហេតុំ នអហេតុកំ ធម្មំ បដិច្ច អព្យាកតោ នហេតុ អហេតុកោ ធម្មោ ឧប្បជ្ជតិ ហេតុបច្ចយា. (១) (គណិតកេន តីណិ បញ្ហា.)… ហេតុយា ឆ.

១-៧-១៣. កុសលត្តិក-ចូឡន្តរទុកានិ

១០. នកុសលោ នសប្បច្ចយោ ធម្មោ កុសលស្ស សប្បច្ចយស្ស ធម្មស្ស អារម្មណបច្ចយេន បច្ចយោ… អារម្មណេ ឆ. (សង្ខតំ សប្បច្ចយសទិសំ.)

១១. នកុសលំ នសនិទស្សនំ ធម្មំ បដិច្ច អព្យាកតោ សនិទស្សនោ ធម្មោ ឧប្បជ្ជតិ ហេតុបច្ចយា… ហេតុយា ឆ.

នកុសលោ នអនិទស្សនោ ធម្មោ កុសលស្ស អនិទស្សនស្ស ធម្មស្ស អារម្មណបច្ចយេន បច្ចយោ. (នវ បញ្ហា កាតព្ពា).

១២. នកុសលំ នសប្បដិឃំ ធម្មំ បដិច្ច អព្យាកតោ សប្បដិឃោ ធម្មោ ឧប្បជ្ជតិ ហេតុបច្ចយា… ហេតុយា ឆ.

នកុសលំ នអប្បដិឃំ ធម្មំ បដិច្ច អព្យាកតោ អប្បដិឃោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

១៣. នកុសលំ នរូបិំ ធម្មំ បដិច្ច អព្យាកតោ រូបី ធម្មោ ឧប្បជ្ជតិ ហេតុបច្ចយា… ហេតុយា ឆ.

នកុសលំ នអរូបិំ ធម្មំ បដិច្ច អព្យាកតោ អរូបី ធម្មោ ឧប្បជ្ជតិ ហេតុបច្ចយា… ហេតុយា តីណិ.

១៤. នកុសលំ នលោកិយំ ធម្មំ បដិច្ច អព្យាកតោ លោកិយោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

នកុសលំ នលោកុត្តរំ ធម្មំ បច្ចយា កុសលោ លោកុត្តរោ ធម្មោ ឧប្បជ្ជតិ ហេតុបច្ចយា. នកុសលំ នលោកុត្តរំ ធម្មំ បច្ចយា អព្យាកតោ លោកុត្តរោ ធម្មោ ឧប្បជ្ជតិ ហេតុបច្ចយា. (ឆ បញ្ហា កាតព្ពា.)

១៥. នកុសលំ នកេនចិ វិញ្ញេយ្យំ ធម្មំ បដិច្ច អកុសលោ កេនចិ វិញ្ញេយ្យោ ធម្មោ ឧប្បជ្ជតិ ហេតុបច្ចយា… ហេតុយា អដ្ឋារស.

នកុសលំ នកេនចិ នវិញ្ញេយ្យំ ធម្មំ បដិច្ច អកុសលោ កេនចិ វិញ្ញេយ្យោ ធម្មោ ឧប្បជ្ជតិ ហេតុបច្ចយា… ហេតុយា អដ្ឋារស.

១-១៤. កុសលត្តិក-អាសវគោច្ឆកំ

១៦. នកុសលំ នោអាសវំ ធម្មំ បដិច្ច អកុសលោ អាសវោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ ននោអាសវំ ធម្មំ បដិច្ច អកុសលោ នោអាសវោ ធម្មោ ឧប្បជ្ជតិ ហេតុបច្ចយា… ហេតុយា នវ.

១៧. នកុសលំ នសាសវំ ធម្មំ បដិច្ច អព្យាកតោ សាសវោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

នកុសលំ នអនាសវំ ធម្មំ បច្ចយា កុសលោ អនាសវោ ធម្មោ ឧប្បជ្ជតិ ហេតុបច្ចយា. (សំខិត្តំ.) ហេតុយា ឆ…បេ… វិបាកេ តីណិ…បេ… អវិគតេ ឆ.

១៨. នកុសលំ នអាសវសម្បយុត្តំ ធម្មំ បដិច្ច អកុសលោ អាសវសម្បយុត្តោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ នអាសវវិប្បយុត្តំ ធម្មំ បដិច្ច អកុសលោ អាសវវិប្បយុត្តោ ធម្មោ ឧប្បជ្ជតិ ហេតុបច្ចយា… ហេតុយា នវ.

១៩. នកុសលំ នអាសវញ្ចេវ នអនាសវញ្ច ធម្មំ បដិច្ច អកុសលោ អាសវោ ចេវ សាសវោ ច ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ នអនាសវញ្ចេវ ននោ ច អាសវំ ធម្មំ បដិច្ច អកុសលោ សាសវោ ចេវ នោ ច អាសវោ ធម្មោ ឧប្បជ្ជតិ ហេតុបច្ចយា… ហេតុយា នវ.

២០. នកុសលំ នអាសវញ្ចេវ នអាសវវិប្បយុត្តញ្ច ធម្មំ បដិច្ច អកុសលោ អាសវោ ចេវ អាសវសម្បយុត្តោ ច ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ នអាសវវិប្បយុត្តញ្ចេវ ននោ ច អាសវំ ធម្មំ បដិច្ច អកុសលោ អាសវសម្បយុត្តោ ចេវ នោ ច អាសវោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

២១. នកុសលំ អាសវវិប្បយុត្តំ នសាសវំ ធម្មំ បដិច្ច អព្យាកតោ អាសវវិប្បយុត្តោ សាសវោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

១-២០-៥៤. កុសលត្តិក-សញ្ញោជនាទិគោច្ឆកានិ

២២. នកុសលំ នោសញ្ញោជនំ ធម្មំ បដិច្ច អកុសលោ សញ្ញោជនោ ធម្មោ ឧប្បជ្ជតិ ហេតុបច្ចយា.

២៣. នកុសលំ នោគន្ថំ ធម្មំ បដិច្ច អកុសលោ គន្ថោ ធម្មោ ឧប្បជ្ជតិ ហេតុបច្ចយា.

២៤. នកុសលំ នោឱឃំ ធម្មំ បដិច្ច អកុសលោ ឱឃោ ធម្មោ ឧប្បជ្ជតិ ហេតុបច្ចយា.

២៥. នកុសលំ នោយោគំ ធម្មំ បដិច្ច អកុសលោ យោគោ ធម្មោ ឧប្បជ្ជតិ ហេតុបច្ចយា.

២៦. នកុសលំ នោនីវរណំ ធម្មំ បដិច្ច អកុសលោ នីវរណោ ធម្មោ ឧប្បជ្ជតិ ហេតុបច្ចយា.

២៧. នកុសលំ នោបរាមាសំ ធម្មំ បដិច្ច អកុសលោ បរាមាសោ ធម្មោ ឧប្បជ្ជតិ ហេតុបច្ចយា.

១-៥៥-៩២. កុសលត្តិក-មហន្តរទុកានិ

២៨. នកុសលំ នសារម្មណំ ធម្មំ បដិច្ច អព្យាកតោ សារម្មណោ ធម្មោ ឧប្បជ្ជតិ ហេតុបច្ចយា…បេ….

១-៩៣. កុសលត្តិក-កាមាវចរទុកំ

២៩. នកុសលំ នកាមាវចរំ ធម្មំ បដិច្ច អព្យាកតោ កាមាវចរោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

នកុសលំ ននកាមាវចរំ ធម្មំ បដិច្ច អព្យាកតោ នកាមាវចរោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

១-៩៤. កុសលត្តិក-រូបាវចរទុកំ

៣០. នកុសលំ នរូបាវចរំ ធម្មំ បដិច្ច អព្យាកតោ រូបាវចរោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ ននរូបាវចរំ ធម្មំ បដិច្ច អព្យាកតោ នរូបាវចរោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

១-៩៥. កុសលត្តិក-អរូបាវចរទុកំ

៣១. នកុសលំ នអរូបាវចរំ ធម្មំ បច្ចយា កុសលោ អរូបាវចរោ ធម្មោ ឧប្បជ្ជតិ ហេតុបច្ចយា… ហេតុយា ឆ.

នកុសលំ ននអរូបាវចរំ ធម្មំ បដិច្ច អព្យាកតោ នអរូបាវចរោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

១-៩៦. កុសលត្តិក-បរិយាបន្នទុកំ

៣២. នកុសលំ នបរិយាបន្នំ ធម្មំ បដិច្ច អព្យាកតោ បរិយាបន្នោ ធម្មោ ឧប្បជ្ជតិ ហេតុបច្ចយា. នអកុសលំ នបរិយាបន្នំ ធម្មំ បដិច្ច អព្យាកតោ បរិយាបន្នោ ធម្មោ ឧប្បជ្ជតិ ហេតុបច្ចយា. នអព្យាកតំ នបរិយាបន្នំ ធម្មំ បដិច្ច អព្យាកតោ បរិយាបន្នោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

នកុសលំ នអបរិយាបន្នំ ធម្មំ បច្ចយា កុសលោ អបរិយាបន្នោ ធម្មោ ឧប្បជ្ជតិ ហេតុបច្ចយា. នកុសលំ នអបរិយាបន្នំ ធម្មំ បច្ចយា អព្យាកតោ អបរិយាបន្នោ ធម្មោ ឧប្បជ្ជតិ ហេតុបច្ចយា. ទ្វេ. (អកុសលមូលេ ទ្វេ, ទុកមូលេ ទ្វេ.)… ហេតុយា ឆ.

១-៩៧. កុសលត្តិក-និយ្យានិកទុកំ

៣៣. នកុសលំ ននិយ្យានិកំ ធម្មំ បច្ចយា កុសលោ និយ្យានិកោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ នអនិយ្យានិកំ ធម្មំ បដិច្ច អព្យាកតោ អនិយ្យានិកោ ធម្មោ ឧប្បជ្ជតិ ហេតុបច្ចយា. នអព្យាកតំ នអនិយ្យានិកំ ធម្មំ បដិច្ច អព្យាកតោ អនិយ្យានិកោ ធម្មោ ឧប្បជ្ជតិ ហេតុបច្ចយា. នអកុសលំ នអនិយ្យានិកញ្ច នអព្យាកតំ នអនិយ្យានិកញ្ច ធម្មំ បដិច្ច អព្យាកតោ អនិយ្យានិកោ ធម្មោ ឧប្បជ្ជតិ ហេតុបច្ចយា. ហេតុយា តីណិ.

១-៩៨. កុសលត្តិក-និយតទុកំ

៣៤. នកុសលំ ននិយតំ ធម្មំ បច្ចយា កុសលោ និយតោ ធម្មោ ឧប្បជ្ជតិ ហេតុបច្ចយា… (អបរិយាបន្នសទិសំ ឆ បញ្ហា).

នកុសលំ នអនិយតំ ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. នអកុសលំ នអនិយតំ ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. នអព្យាកតំ នអនិយតំ ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. នកុសលំ នអនិយតញ្ច នអព្យាកតំ នអនិយតញ្ច ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. នអកុសលំ នអនិយតញ្ច នអព្យាកតំ នអនិយតញ្ច ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. ហេតុយា បញ្ច.

១-៩៩. កុសលត្តិក-សឧត្តរទុកំ

៣៥. នកុសលំ នសឧត្តរំ ធម្មំ បដិច្ច អព្យាកតោ សឧត្តរោ ធម្មោ ឧប្បជ្ជតិ ហេតុបច្ចយា. នអកុសលំ នសឧត្តរំ ធម្មំ បដិច្ច អព្យាកតោ សឧត្តរោ ធម្មោ ឧប្បជ្ជតិ ហេតុបច្ចយា. នអព្យាកតំ នសឧត្តរំ ធម្មំ បដិច្ច អព្យាកតោ សឧត្តរោ ធម្មោ ឧប្បជ្ជតិ ហេតុបច្ចយា. នអកុសលំ នសឧត្តរញ្ច នអព្យាកតំ នសឧត្តរញ្ច ធម្មំ បដិច្ច អព្យាកតោ សឧត្តរោ ធម្មោ ឧប្បជ្ជតិ ហេតុបច្ចយា. នកុសលំ នសឧត្តរញ្ច នអកុសលំ នសឧត្តរញ្ច ធម្មំ បដិច្ច អព្យាកតោ សឧត្តរោ ធម្មោ ឧប្បជ្ជតិ ហេតុបច្ចយា. ហេតុយា បញ្ច.

នកុសលំ នអនុត្តរំ ធម្មំ បច្ចយា កុសលោ អនុត្តរោ ធម្មោ ឧប្បជ្ជតិ ហេតុបច្ចយា… (សំខិត្តំ.) ហេតុយា ឆ…បេ… វិបាកេ តីណិ…បេ… អវិគតេ ឆ.

១-១០០. កុសលត្តិក-សរណទុកំ

៣៦. នកុសលំ នសរណំ ធម្មំ បច្ចយា អកុសលោ សរណោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នកុសលំ នអរណំ ធម្មំ បដិច្ច អព្យាកតោ អរណោ ធម្មោ ឧប្បជ្ជតិ ហេតុបច្ចយា. នអព្យាកតំ នអរណំ ធម្មំ បដិច្ច អព្យាកតោ អរណោ ធម្មោ ឧប្បជ្ជតិ ហេតុបច្ចយា. នកុសលំ នអរណញ្ច នអព្យាកតំ នអរណញ្ច ធម្មំ បដិច្ច អព្យាកតោ អរណោ ធម្មោ ឧប្បជ្ជតិ ហេតុបច្ចយា. ហេតុយា តីណិ.

២-១. វេទនាត្តិក-ហេតុទុកំ

៣៧. នសុខាយ វេទនាយ សម្បយុត្តំ នហេតុំ ធម្មំ បដិច្ច សុខាយ វេទនាយ សម្បយុត្តោ ហេតុ ធម្មោ ឧប្បជ្ជតិ ហេតុបច្ចយា. នសុខាយ វេទនាយ សម្បយុត្តំ នហេតុំ ធម្មំ បដិច្ច ទុក្ខាយ វេទនាយ សម្បយុត្តោ ហេតុ ធម្មោ ឧប្បជ្ជតិ ហេតុបច្ចយា. នសុខាយ វេទនាយ សម្បយុត្តំ នហេតុំ ធម្មំ បដិច្ច អទុក្ខមសុខាយ វេទនាយ សម្បយុត្តោ ហេតុ ធម្មោ ឧប្បជ្ជតិ ហេតុបច្ចយា. តីណិ.

នទុក្ខាយ វេទនាយ សម្បយុត្តំ នហេតុំ ធម្មំ បដិច្ច ទុក្ខាយ វេទនាយ សម្បយុត្តោ ហេតុ ធម្មោ ឧប្បជ្ជតិ ហេតុបច្ចយា… តីណិ.

នអទុក្ខមសុខាយ វេទនាយ សម្បយុត្តំ នហេតុំ ធម្មំ បដិច្ច អទុក្ខមសុខាយ វេទនាយ សម្បយុត្តោ ហេតុ ធម្មោ ឧប្បជ្ជតិ ហេតុបច្ចយា… តីណិ.

នសុខាយ វេទនាយ សម្បយុត្តំ នហេតុញ្ច នអទុក្ខមសុខាយ វេទនាយ សម្បយុត្តំ នហេតុញ្ច ធម្មំ បដិច្ច សុខាយ វេទនាយ សម្បយុត្តោ ហេតុ ធម្មោ ឧប្បជ្ជតិ ហេតុបច្ចយា… តីណិ (ទុតិយំ គណិតកេន តីណិ). ហេតុយា ឯកវីស.

នសុខាយ វេទនាយ សម្បយុត្តំ ននហេតុំ ធម្មំ បដិច្ច ទុក្ខាយ វេទនាយ សម្បយុត្តោ នហេតុ ធម្មោ ឧប្បជ្ជតិ ហេតុបច្ចយា… ទ្វេ.

នទុក្ខាយ វេទនាយ សម្បយុត្តំ ននហេតុំ ធម្មំ បដិច្ច… (ទ្វេ បញ្ហាយេវ).

នអទុក្ខមសុខាយ វេទនាយ សម្បយុត្តំ ននហេតុំ ធម្មំ បដិច្ច… (ទ្វេយេវ. បឋមំ គណិតកេន ឯកំ, ទុតិយំ គណិតកេន ឯកំ, តតិយំ គណិតកេន ឯកំ កាតព្ពំ.) ហេតុយា នវ.

៣-១. វិបាកត្តិក-ហេតុទុកំ

៣៨. នវិបាកំ នហេតុំ ធម្មំ បដិច្ច វិបាកោ ហេតុ ធម្មោ ឧប្បជ្ជតិ ហេតុបច្ចយា. នវិបាកំ នហេតុំ ធម្មំ បដិច្ច វិបាកធម្មធម្មោ ហេតុ ធម្មោ ឧប្បជ្ជតិ ហេតុបច្ចយា. នវិបាកំ នហេតុំ ធម្មំ បដិច្ច នេវវិបាកនវិបាកធម្មធម្មោ ហេតុ ធម្មោ ឧប្បជ្ជតិ ហេតុបច្ចយា. តីណិ.

នវិបាកធម្មធម្មំ នហេតុំ ធម្មំ បដិច្ច វិបាកោ ហេតុ ធម្មោ ឧប្បជ្ជតិ ហេតុបច្ចយា. នវិបាកធម្មធម្មំ នហេតុំ ធម្មំ បដិច្ច នេវវិបាកនវិបាកធម្មធម្មោ ហេតុ ធម្មោ ឧប្បជ្ជតិ ហេតុបច្ចយា. ទ្វេ.

ននេវវិបាកនវិបាកធម្មធម្មំ នហេតុំ ធម្មំ បដិច្ច វិបាកោ ហេតុ ធម្មោ ឧប្បជ្ជតិ ហេតុបច្ចយា. ននេវវិបាកនវិបាកធម្មធម្មំ នហេតុំ ធម្មំ បដិច្ច វិបាកធម្មធម្មោ ហេតុ ធម្មោ ឧប្បជ្ជតិ ហេតុបច្ចយា. ទ្វេ.

នវិបាកំ នហេតុញ្ច ននេវវិបាកនវិបាកធម្មធម្មំ នហេតុញ្ច ធម្មំ បដិច្ច វិបាកធម្មធម្មោ ហេតុ ធម្មោ ឧប្បជ្ជតិ ហេតុបច្ចយា. ឯកំ.

នវិបាកធម្មធម្មំ នហេតុញ្ច ននេវវិបាកនវិបាកធម្មធម្មំ នហេតុញ្ច ធម្មំ បដិច្ច វិបាកោ ហេតុ ធម្មោ ឧប្បជ្ជតិ ហេតុបច្ចយា. ឯកំ.

នវិបាកំ នហេតុញ្ច នវិបាកធម្មធម្មំ នហេតុញ្ច ធម្មំ បដិច្ច វិបាកោ ហេតុ ធម្មោ ឧប្បជ្ជតិ ហេតុបច្ចយា. នវិបាកំ នហេតុញ្ច នវិបាកធម្មធម្មំ នហេតុញ្ច ធម្មំ បដិច្ច នេវវិបាកនវិបាកធម្មធម្មោ ហេតុ ធម្មោ ឧប្បជ្ជតិ ហេតុបច្ចយា. ទ្វេ. (សំខិត្តំ.) ហេតុយា ឯកាទស.

នវិបាកំ ននហេតុំ ធម្មំ បដិច្ច វិបាកធម្មធម្មោ នហេតុ ធម្មោ ឧប្បជ្ជតិ ហេតុបច្ចយា… ហេតុយា អដ្ឋារស. (សំខិត្តំ.)

៤-១. ឧបាទិន្នត្តិក-ហេតុទុកំ

៣៩. នឧបាទិន្នុបាទានិយំ នហេតុំ ធម្មំ បដិច្ច អនុបាទិន្នុបាទានិយោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

នឧបាទិន្នុបាទានិយំ ននហេតុំ ធម្មំ បដិច្ច អនុបាទិន្នុបាទានិយោ នហេតុ ធម្មោ ឧប្បជ្ជតិ ហេតុបច្ចយា… ហេតុយា អដ្ឋារស.

៥-១. សំកិលិដ្ឋត្តិក-ហេតុទុកំ

៤០. នសំកិលិដ្ឋសំកិលេសិកំ នហេតុំ ធម្មំ បដិច្ច អសំកិលិដ្ឋសំកិលេសិកោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៦-១១-១. វិតក្កាទិត្តិកានិ-ហេតុទុកំ

៤១. នសវិតក្កសវិចារំ នហេតុំ ធម្មំ បដិច្ច សវិតក្កសវិចារោ ហេតុ ធម្មោ ឧប្បជ្ជតិ ហេតុបច្ចយា… ហេតុយា បន្នរស.

៤២. នបីតិសហគតំ នហេតុំ ធម្មំ បដិច្ច បីតិសហគតោ ហេតុ ធម្មោ ឧប្បជ្ជតិ ហេតុបច្ចយា… ហេតុយា អដ្ឋវីស.

៤៣. នទស្សនេន បហាតព្ពំ នហេតុំ ធម្មំ បដិច្ច ភាវនាយ បហាតព្ពោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៤៤. នទស្សនេន បហាតព្ពហេតុកំ នហេតុំ ធម្មំ បដិច្ច ភាវនាយ បហាតព្ពហេតុកោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៤៥. នអាចយគាមិំ នហេតុំ ធម្មំ បដិច្ច អបចយគាមី ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៤៦. នសេក្ខំ នហេតុំ ធម្មំ បដិច្ច អសេក្ខោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

១២-១៣-១. បរិត្តត្តិកទ្វយ-ហេតុទុកំ

៤៧. នបរិត្តំ នហេតុំ ធម្មំ បដិច្ច មហគ្គតោ ហេតុ ធម្មោ ឧប្បជ្ជតិ ហេតុបច្ចយា… ហេតុយា ឯកាទស.

៤៨. នបរិត្តារម្មណំ នហេតុំ ធម្មំ បដិច្ច បរិត្តារម្មណោ ហេតុ ធម្មោ ឧប្បជ្ជតិ ហេតុបច្ចយា… ហេតុយា តេរស.

១៤-១៧-១. ហីនាទិត្តិកានិ-ហេតុទុកំ

៤៩. នហីនំ នហេតុំ ធម្មំ បដិច្ច មជ្ឈិមោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៥០. នមិច្ឆត្តនិយតំ នហេតុំ ធម្មំ បដិច្ច សម្មត្តនិយតោ ហេតុ ធម្មោ ឧប្បជ្ជតិ ហេតុបច្ចយា… ហេតុយា នវ.

៥១. នមគ្គារម្មណំ នហេតុំ ធម្មំ បដិច្ច មគ្គហេតុកោ ហេតុ ធម្មោ ឧប្បជ្ជតិ ហេតុបច្ចយា… (សំខិត្តំ.) ហេតុយា ទស.

៥២. នអនុប្បន្នោ ននហេតុ ធម្មោ ឧប្បន្នស្ស នហេតុស្ស ធម្មស្ស ហេតុបច្ចយេន បច្ចយោ. នឧប្បាទី ននហេតុ ធម្មោ ឧប្បន្នស្ស នហេតុស្ស ធម្មស្ស ហេតុបច្ចយេន បច្ចយោ. នអនុប្បន្នោ ននហេតុ ច នឧប្បាទី ននហេតុ ច ធម្មា ឧប្បន្នស្ស នហេតុស្ស ធម្មស្ស ហេតុបច្ចយេន បច្ចយោ. ហេតុយា តីណិ.

១៨-១៩-១. អតីតត្តិកទ្វយ-ហេតុទុកំ

៥៣. នអតីតោ ននហេតុ ធម្មោ បច្ចុប្បន្នស្ស នហេតុស្ស ធម្មស្ស ហេតុបច្ចយេន បច្ចយោ. នអនាគតោ ននហេតុ ធម្មោ បច្ចុប្បន្នស្ស នហេតុស្ស ធម្មស្ស ហេតុបច្ចយេន បច្ចយោ. នអតីតោ ននហេតុ ច នអនាគតោ ននហេតុ ច ធម្មា បច្ចុប្បន្នស្ស នហេតុស្ស ធម្មស្ស ហេតុបច្ចយេន បច្ចយោ. ហេតុយា តីណិ.

៥៤. នអតីតារម្មណំ នហេតុំ ធម្មំ បដិច្ច អតីតារម្មណោ ហេតុ ធម្មោ ឧប្បជ្ជតិ ហេតុបច្ចយា… ហេតុយា សត្តរស.

២០-២១-១. អជ្ឈត្តត្តិកទ្វយ-ហេតុទុកំ

៥៥. នអជ្ឈត្តំ នហេតុំ ធម្មំ បដិច្ច ពហិទ្ធា ហេតុ ធម្មោ ឧប្បជ្ជតិ ហេតុបច្ចយា.

នពហិទ្ធា នហេតុំ ធម្មំ បដិច្ច អជ្ឈត្តោ ហេតុ ធម្មោ ឧប្បជ្ជតិ ហេតុបច្ចយា… ហេតុយា ទ្វេ.

៥៦. នអជ្ឈត្តារម្មណំ នហេតុំ ធម្មំ បដិច្ច អជ្ឈត្តារម្មណោ ហេតុ ធម្មោ ឧប្បជ្ជតិ ហេតុបច្ចយា… ទ្វេ.

នពហិទ្ធារម្មណំ នហេតុំ ធម្មំ បដិច្ច ពហិទ្ធារម្មណោ ហេតុ ធម្មោ ឧប្បជ្ជតិ ហេតុបច្ចយា… ហេតុយា ឆ.

២២-១. សនិទស្សនត្តិក-ហេតុទុកំ

៥៧. នសនិទស្សនសប្បដិឃំ នហេតុំ ធម្មំ បដិច្ច អនិទស្សនអប្បដិឃោ ហេតុ ធម្មោ ឧប្បជ្ជតិ ហេតុបច្ចយា. នអនិទស្សនសប្បដិឃំ នហេតុំ ធម្មំ បដិច្ច អនិទស្សនអប្បដិឃោ ហេតុ ធម្មោ ឧប្បជ្ជតិ ហេតុបច្ចយា. នសនិទស្សនសប្បដិឃំ នហេតុញ្ច នអនិទស្សនសប្បដិឃំ នហេតុញ្ច ធម្មំ បដិច្ច អនិទស្សនអប្បដិឃោ ហេតុ ធម្មោ ឧប្បជ្ជតិ ហេតុបច្ចយា. ហេតុយា តីណិ.

នសនិទស្សនសប្បដិឃំ ននហេតុំ ធម្មំ បដិច្ច សនិទស្សនសប្បដិឃោ នហេតុ ធម្មោ ឧប្បជ្ជតិ ហេតុបច្ចយា. នសនិទស្សនសប្បដិឃំ ននហេតុំ ធម្មំ បដិច្ច អនិទស្សនសប្បដិឃោ នហេតុ ធម្មោ ឧប្បជ្ជតិ ហេតុបច្ចយា. (នហេតុ ននហេតុ ឱវត្តា, តីណិ មូលានិ, ឯកវីសតិ បញ្ហា កាតព្ពា.)

២២-២. សនិទស្សនត្តិក-សហេតុកទុកំ

៥៨. នសនិទស្សនសប្បដិឃំ នសហេតុកំ ធម្មំ បដិច្ច អនិទស្សនអប្បដិឃោ សហេតុកោ ធម្មោ ឧប្បជ្ជតិ ហេតុបច្ចយា. នអនិទស្សនសប្បដិឃំ នសហេតុកំ ធម្មំ បដិច្ច អនិទស្សនអប្បដិឃោ សហេតុកោ ធម្មោ ឧប្បជ្ជតិ ហេតុបច្ចយា. នសនិទស្សនសប្បដិឃំ នសហេតុកញ្ច នអនិទស្សនសប្បដិឃំ នសហេតុកញ្ច ធម្មំ បដិច្ច អនិទស្សនអប្បដិឃោ សហេតុកោ ធម្មោ ឧប្បជ្ជតិ ហេតុបច្ចយា. ហេតុយា តីណិ.

នសនិទស្សនសប្បដិឃំ នអហេតុកំ ធម្មំ បដិច្ច សនិទស្សនសប្បដិឃោ អហេតុកោ ធម្មោ ឧប្បជ្ជតិ ហេតុបច្ចយា… សត្ត.

នអនិទស្សនសប្បដិឃំ នអហេតុកំ ធម្មំ បដិច្ច អនិទស្សនសប្បដិឃោ អហេតុកោ ធម្មោ ឧប្បជ្ជតិ ហេតុបច្ចយា… សត្ត.

នសនិទស្សនសប្បដិឃំ នអហេតុកញ្ច នអនិទស្សនសប្បដិឃំ នអហេតុកញ្ច ធម្មំ បដិច្ច អនិទស្សនសប្បដិឃោ អហេតុកោ ធម្មោ ឧប្បជ្ជតិ ហេតុបច្ចយា… សត្ត. ហេតុយា ឯកវីស.

២២-៣-៦. សនិទស្សនត្តិក-ហេតុសម្បយុត្តាទិទុកានិ

៥៩. នសនិទស្សនសប្បដិឃំ នហេតុសម្បយុត្តំ ធម្មំ បដិច្ច អនិទស្សនអប្បដិឃោ ហេតុសម្បយុត្តោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នសនិទស្សនសប្បដិឃំ នហេតុវិប្បយុត្តំ ធម្មំ បដិច្ច សនិទស្សនសប្បដិឃោ ហេតុវិប្បយុត្តោ ធម្មោ ឧប្បជ្ជតិ ហេតុបច្ចយា… ហេតុយា ឯកវីស.

៦០. នសនិទស្សនសប្បដិឃំ នហេតុញ្ចេវ នអហេតុកញ្ច ធម្មំ បដិច្ច អនិទស្សនអប្បដិឃោ ហេតុ ចេវ សហេតុកោ ច ធម្មោ ឧប្បជ្ជតិ ហេតុបច្ចយា… ហេតុយា តីណិ.

នសនិទស្សនសប្បដិឃំ នអហេតុកញ្ចេវ នន ច ហេតុំ ធម្មំ បដិច្ច អនិទស្សនអប្បដិឃោ សហេតុកោ ចេវ ន ច ហេតុ ធម្មោ ឧប្បជ្ជតិ ហេតុបច្ចយា… ហេតុយា តីណិ.

៦១. នសនិទស្សនសប្បដិឃំ នហេតុញ្ចេវ នហេតុវិប្បយុត្តញ្ច ធម្មំ បដិច្ច អនិទស្សនអប្បដិឃោ ហេតុ ចេវ ហេតុសម្បយុត្តោ ច ធម្មោ ឧប្បជ្ជតិ ហេតុបច្ចយា… ហេតុយា តីណិ.

នសនិទស្សនសប្បដិឃំ នហេតុវិប្បយុត្តញ្ចេវ នន ច ហេតុំ ធម្មំ បដិច្ច អនិទស្សនអប្បដិឃោ ហេតុសម្បយុត្តោ ចេវ ន ច ហេតុ ធម្មោ ឧប្បជ្ជតិ ហេតុបច្ចយា… ហេតុយា តីណិ.

៦២. នសនិទស្សនសប្បដិឃំ នហេតុំ នសហេតុកំ ធម្មំ បដិច្ច អនិទស្សនអប្បដិឃោ នហេតុ សហេតុកោ ធម្មោ ឧប្បជ្ជតិ ហេតុបច្ចយា… ហេតុយា តីណិ.

នសនិទស្សនសប្បដិឃំ នហេតុំ នអហេតុកំ ធម្មំ បដិច្ច សនិទស្សនសប្បដិឃោ នហេតុ អហេតុកោ ធម្មោ ឧប្បជ្ជតិ ហេតុបច្ចយា… ហេតុយា ឯកវីស.

២២-៧-១៣. សនិទស្សនត្តិក-ចូឡន្តរទុកានិ

៦៣. នសនិទស្សនសប្បដិឃោ នសប្បច្ចយោ ធម្មោ អនិទស្សនអប្បដិឃស្ស សប្បច្ចយស្ស ធម្មស្ស អារម្មណបច្ចយេន បច្ចយោ. (សំខិត្តំ.) អារម្មណេ តីណិ, អធិបតិយា ឧបនិស្សយេ តីណិ.

៦៤. នសនិទស្សនសប្បដិឃំ នសនិទស្សនំ ធម្មំ បដិច្ច សនិទស្សនសប្បដិឃោ សនិទស្សនោ ធម្មោ ឧប្បជ្ជតិ ហេតុបច្ចយា… ហេតុយា បញ្ច.

នអនិទស្សនអប្បដិឃោ ននសនិទស្សនោ ធម្មោ អនិទស្សនអប្បដិឃស្ស នសនិទស្សនស្ស ធម្មស្ស អារម្មណបច្ចយេន បច្ចយោ. (សំខិត្តំ.) អារម្មណេ តីណិ, អធិបតិយា ឧបនិស្សយេ បុរេជាតេ អត្ថិយា អវិគតេ តីណិ.