១-៧. បដិច្ចវារាទិ

បច្ចយចតុក្កំ

ហេតុបច្ចយោ

១. កុសលំ ហេតុំ ធម្មំ បដិច្ច នកុសលោ នហេតុ ធម្មោ ឧប្បជ្ជតិ ហេតុបច្ចយា. កុសលំ ហេតុំ ធម្មំ បដិច្ច នអកុសលោ នហេតុ ធម្មោ ឧប្បជ្ជតិ ហេតុបច្ចយា. កុសលំ ហេតុំ ធម្មំ បដិច្ច នអព្យាកតោ នហេតុ ធម្មោ ឧប្បជ្ជតិ ហេតុបច្ចយា. កុសលំ ហេតុំ ធម្មំ បដិច្ច នអកុសលោ នហេតុ ច នអព្យាកតោ នហេតុ ច ធម្មា ឧប្បជ្ជន្តិ ហេតុបច្ចយា. កុសលំ ហេតុំ ធម្មំ បដិច្ច នកុសលោ នហេតុ ច នអកុសលោ នហេតុ ច ធម្មា ឧប្បជ្ជន្តិ ហេតុបច្ចយា. (៥)

អកុសលំ ហេតុំ ធម្មំ បដិច្ច នអកុសលោ នហេតុ ធម្មោ ឧប្បជ្ជតិ ហេតុបច្ចយា. អកុសលំ ហេតុំ ធម្មំ បដិច្ច នកុសលោ នហេតុ ធម្មោ ឧប្បជ្ជតិ ហេតុបច្ចយា. អកុសលំ ហេតុំ ធម្មំ បដិច្ច នអព្យាកតោ នហេតុ ធម្មោ ឧប្បជ្ជតិ ហេតុបច្ចយា. អកុសលំ ហេតុំ ធម្មំ បដិច្ច នកុសលោ នហេតុ ច នអព្យាកតោ នហេតុ ច ធម្មា ឧប្បជ្ជន្តិ ហេតុបច្ចយា. អកុសលំ ហេតុំ ធម្មំ បដិច្ច នកុសលោ នហេតុ ច នអកុសលោ នហេតុ ច ធម្មា ឧប្បជ្ជន្តិ ហេតុបច្ចយា. (៥)

អព្យាកតំ ហេតុំ ធម្មំ បដិច្ច នកុសលោ នហេតុ ធម្មោ ឧប្បជ្ជតិ ហេតុបច្ចយា. អព្យាកតំ ហេតុំ ធម្មំ បដិច្ច នអកុសលោ នហេតុ ធម្មោ ឧប្បជ្ជតិ ហេតុបច្ចយា. អព្យាកតំ ហេតុំ ធម្មំ បដិច្ច នកុសលោ នហេតុ ច នអកុសលោ នហេតុ ច ធម្មា ឧប្បជ្ជន្តិ ហេតុបច្ចយា. (៣) (សំខិត្តំ.)

ហេតុយា តេរស, អារម្មណេ នវ…បេ… អវិគតេ តេរស.

បច្ចនីយំ

នអារម្មណបច្ចយោ

២. កុសលំ ហេតុំ ធម្មំ បដិច្ច នកុសលោ នហេតុ ធម្មោ ឧប្បជ្ជតិ នអារម្មណបច្ចយា. (សំខិត្តំ.)

នអារម្មណេ នវ, នអធិបតិយា តេរស…បេ… នវិប្បយុត្តេ នវ.

(សហជាតវារម្បិ…បេ… សម្បយុត្តវារម្បិ បដិច្ចវារសទិសំ វិត្ថារេតព្ពំ.)

ហេតុ-អារម្មណបច្ចយា

៣. កុសលោ ហេតុ ធម្មោ នកុសលស្ស នហេតុស្ស ធម្មស្ស ហេតុបច្ចយេន បច្ចយោ. កុសលោ ហេតុ ធម្មោ នអកុសលស្ស នហេតុស្ស ធម្មស្ស ហេតុបច្ចយេន បច្ចយោ. កុសលោ ហេតុ ធម្មោ នអព្យាកតស្ស នហេតុស្ស ធម្មស្ស ហេតុបច្ចយេន បច្ចយោ. កុសលោ ហេតុ ធម្មោ នអកុសលស្ស នហេតុស្ស ច នអព្យាកតស្ស នហេតុស្ស ច ធម្មស្ស ហេតុបច្ចយេន បច្ចយោ. កុសលោ ហេតុ ធម្មោ នកុសលស្ស នហេតុស្ស ច នអកុសលស្ស នហេតុស្ស ច ធម្មស្ស ហេតុបច្ចយេន បច្ចយោ. (៥)

អកុសលោ ហេតុ ធម្មោ នអកុសលស្ស នហេតុស្ស ធម្មស្ស ហេតុបច្ចយេន បច្ចយោ… បញ្ច.

អព្យាកតោ ហេតុ ធម្មោ នកុសលស្ស នហេតុស្ស ធម្មស្ស ហេតុបច្ចយេន បច្ចយោ… តីណិ.

កុសលោ ហេតុ ធម្មោ នកុសលស្ស នហេតុស្ស ធម្មស្ស អារម្មណបច្ចយេន បច្ចយោ. (សំខិត្តំ.)

៤. ហេតុយា តេរស, អារម្មណេ អដ្ឋារស…បេ… អវិគតេ តេរស. (បញ្ហាវារំ វិត្ថារេតព្ពំ.)

៥. កុសលំ នហេតុំ ធម្មំ បដិច្ច នអកុសលោ ននហេតុ ធម្មោ ឧប្បជ្ជតិ ហេតុបច្ចយា. កុសលំ នហេតុំ ធម្មំ បដិច្ច នអព្យាកតោ ននហេតុ ធម្មោ ឧប្បជ្ជតិ ហេតុបច្ចយា. (សំខិត្តំ.)

ហេតុយា នវ, អារម្មណេ នវ…បេ… អវិគតេ នវ. (សព្ពត្ថ នវ.)