១-៧. បដិច្ចវារាទិ

បច្ចយចតុក្កំ

៦៣. អកុសលំ មិច្ឆត្តនិយតំ ធម្មំ បដិច្ច អកុសលោ មិច្ឆត្តនិយតោ ធម្មោ ឧប្បជ្ជតិ ហេតុបច្ចយា. (សំខិត្តំ.)

ហេតុយា ឯកំ…បេ… អវិគតេ ឯកំ. (សំខិត្តំ. សព្ពត្ថ វិត្ថារោ.)

៦៤. កុសលំ សម្មត្តនិយតំ ធម្មំ បដិច្ច កុសលោ សម្មត្តនិយតោ ធម្មោ ឧប្បជ្ជតិ ហេតុបច្ចយា. (សំខិត្តំ.)

ហេតុយា ឯកំ…បេ… អវិគតេ ឯកំ. (សំខិត្តំ. សហជាតវារេបិ…បេ… បញ្ហាវារេបិ សព្ពត្ថ ឯកំ.)

៦៥. កុសលំ អនិយតំ ធម្មំ បដិច្ច កុសលោ អនិយតោ ធម្មោ ឧប្បជ្ជតិ ហេតុបច្ចយា. កុសលំ អនិយតំ ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. កុសលំ អនិយតំ ធម្មំ បដិច្ច កុសលោ អនិយតោ ច អព្យាកតោ អនិយតោ ច ធម្មា ឧប្បជ្ជន្តិ ហេតុបច្ចយា. (៣)

អកុសលំ អនិយតំ ធម្មំ បដិច្ច អកុសលោ អនិយតោ ធម្មោ ឧប្បជ្ជតិ ហេតុបច្ចយា… តីណិ.

អព្យាកតំ អនិយតំ ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. (១)

កុសលំ អនិយតញ្ច អព្យាកតំ អនិយតញ្ច ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. (១)

អកុសលំ អនិយតញ្ច អព្យាកតំ អនិយតញ្ច ធម្មំ បដិច្ច អព្យាកតោ អនិយតោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

ហេតុយា នវ, អារម្មណេ តីណិ, អវិគតេ នវ. (សំខិត្តំ. សហជាតវារម្បិ…បេ… សម្បយុត្តវារម្បិ បដិច្ចវារសទិសំ.)

៦៦. កុសលោ អនិយតោ ធម្មោ កុសលស្ស អនិយតស្ស ធម្មស្ស ហេតុបច្ចយេន បច្ចយោ… តីណិ.

អកុសលោ អនិយតោ ធម្មោ អកុសលស្ស អនិយតស្ស ធម្មស្ស ហេតុបច្ចយេន បច្ចយោ… តីណិ.

អព្យាកតោ អនិយតោ ធម្មោ អព្យាកតស្ស អនិយតស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

ហេតុយា សត្ត, អារម្មណេ នវ, អវិគតេ តេរស. (សំខិត្តំ. យថា កុសលត្តិកេ បញ្ហាវារំ ឯវំ វិត្ថារេតព្ពំ.)