៥១-១. បរាមដ្ឋទុក-កុសលត្តិកំ

១-៧. បដិច្ចវារាទិ

បច្ចយចតុក្កំ

ហេតុបច្ចយោ

៩. បរាមដ្ឋំ កុសលំ ធម្មំ បដិច្ច បរាមដ្ឋោ កុសលោ ធម្មោ ឧប្បជ្ជតិ ហេតុបច្ចយា. (១)

អបរាមដ្ឋំ កុសលំ ធម្មំ បដិច្ច អបរាមដ្ឋោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១០. ហេតុយា ទ្វេ, អារម្មណេ ទ្វេ…បេ… អវិគតេ ទ្វេ (សំខិត្តំ).

(សហជាតវារោបិ …បេ… បញ្ហាវារោបិ វិត្ថារេតព្ពា.)

១១. បរាមដ្ឋំ អកុសលំ ធម្មំ បដិច្ច បរាមដ្ឋោ អកុសលោ ធម្មោ ឧប្បជ្ជតិ ហេតុបច្ចយា (សំខិត្តំ).

១២. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

១៣. បរាមដ្ឋំ អព្យាកតំ ធម្មំ បដិច្ច បរាមដ្ឋោ អព្យាកតោ ធម្មោ ឧប្បជ្ជតិ ហេតុបច្ចយា. (១)

អបរាមដ្ឋំ អព្យាកតំ ធម្មំ បដិច្ច អបរាមដ្ឋោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ.

បរាមដ្ឋំ អព្យាកតញ្ច អបរាមដ្ឋំ អព្យាកតញ្ច ធម្មំ បដិច្ច បរាមដ្ឋោ អព្យាកតោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១៤. ហេតុយា បញ្ច, អារម្មណេ ទ្វេ…បេ… អាសេវនេ ឯកំ…បេ… អវិគតេ បញ្ច (សំខិត្តំ). (សហជាតវារម្បិ…បេ… បញ្ហាវារម្បិ វិត្ថារេតព្ពំ.)