១. វិភង្គវារោ

ហេតុបច្ចយោ

១. ទស្សនេន បហាតព្ពំ ធម្មំ បដិច្ច ទស្សនេន បហាតព្ពោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

ទស្សនេន បហាតព្ពំ ធម្មំ បដិច្ច នទស្សនេន បហាតព្ពោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពេ ខន្ធេ បដិច្ច ចិត្តសមុដ្ឋានំ រូបំ. (២)

ទស្សនេន បហាតព្ពំ ធម្មំ បដិច្ច ទស្សនេន បហាតព្ពោ ច នទស្សនេន បហាតព្ពោ ច ធម្មា ឧប្បជ្ជន្តិ ហេតុបច្ចយា – ទស្សនេន បហាតព្ពំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច…បេ… ទ្វេ ខន្ធេ…បេ…. (៣)

នទស្សនេន បហាតព្ពំ ធម្មំ បដិច្ច នទស្សនេន បហាតព្ពោ ធម្មោ ឧប្បជ្ជតិ ហេតុបច្ចយា – នទស្សនេន បហាតព្ពំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ…. (១)

ទស្សនេន បហាតព្ពញ្ច នទស្សនេន បហាតព្ពញ្ច ធម្មំ បដិច្ច នទស្សនេន បហាតព្ពោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ (សំខិត្តំ). (១)